Read Муқаддас Китоб Uzbek Ишаё 17 Bible Online

Ишаё 17 - Муқаддас Китоб Uzbek bible

Ишаё 17

¹Дамашқ[108] ҳақида башорат: “Ана, Дамашқ энди шаҳар бўлмайди! У вайроналар уюмига айланади!

²Арор шаҳарлари тарк этилади, Сурувлар масканига айланади, Ҳеч ким уларни ҳуркитмайди.

³Эфрайим юртининг[109] қалъаси йўқ бўлади, Дамашқнинг шоҳлиги кетади. Орам халқининг омон қолганлари ғойиб бўлади, Буларнинг ҳаммаси Исроил халқининг Шуҳрати сингари барҳам топади, — деб айтмоқда Сарвари Олам. —

⁴Ўша куни Ёқуб наслининг шуҳрати йўқолади, Танаси озиб — тўзиб кетади.

⁵Мана, ўроқчилар бошоқларни ўриб олади, Ўз қўллари билан дон ҳосилини йиғиштириб олади. Ўша далаларда терилган буғдой бошоқларидай Рафа водийсида[110] Ёқуб наслидан ҳам озчилик қолади.

⁶Ҳа, зайтун дарахти қоқилганда Дарахт учида икки — уч мева қолгандай, Ҳосилдор шохчаларда тўрт — беш мева қолгандай Ўша бошоқларда бир — икки дон қолади”, — деб башорат қилар Исроил халқининг Худоси — Эгамиз.

⁷Ўша куни ҳар бир одам Яратувчига қарайди, уларнинг кўзлари Исроил халқининг Муқаддас Худосини кўради.

⁸Инсон қурбонгоҳларга, қўлларининг ижодига қарамайди, ўз қўли билан ясаган нарсалар — Ашерага[111] аталган устунларни, тутатқи қурбонгоҳларини кўрмайди.

⁹Ўша куни мустаҳкам шаҳарлари ўрмонлардаги ташландиқ жойларга ўхшаб қолади. Одамлар ташлаб кетган қир тепаликлар каби бўлади. Исроил халқи дастидан бу шаҳарлар харобазорга айланади.

¹⁰Ахир, сен нажоткоринг Худони унутдинг, Паноҳ бўладиган Қоянгни эсламадинг. Мана, сен ёқимли ўсимликлар экасан, Бегона кўчатларни ўтқазасан.

¹¹Уларни авайлаб — асраб ўстирасан, Тонгда уруғдан куртак чиқартирасан, Аммо барча ҳосилинг йўқ бўлади. Фақат дард ва алам сенга насиб этади.

¹²Қаранг, халқларнинг кўплигини! Улар денгиз каби гувиллайди! Лашкарларнинг ҳайқириғи Тўлқинлар товушидай баланддир.

¹³Аммо Эгам уларга танбеҳ беради, Халқлар ҳам тўлқинлар каби йўқолиб кетади. Улар узоқларга қочиб қолади. Тоғлардаги шамолда учган хас — чўп каби қувилади, Қуюн олдидаги гирдоб каби ҳайдалади.

¹⁴Оқшом пайти! Қаранглар, кулфат! Тонг отмасдан улар йўқ бўлиб кетади. Бизни талайдиганларнинг қисмати шундай бўлади, Биздан тортиб олганларга мана шу насиб қилади.