Read Муқаддас Китоб Uzbek Ишаё 21 Bible Online

Ишаё 21 - Муқаддас Китоб Uzbek bible

Ишаё 21

¹Денгиз бўйидаги саҳро[124] ҳақида башорат: Нагав узра кетма — кет эсаётган бўронлар каби, Чўлдан — қўрқинчли юртдан келаётир босқинчи.

²Мен мудҳиш бир ваҳий кўрдим: Хоин хоинлик қилаётир, Босқинчи талон — тарож қилаётир. Эгамнинг сўзларини эшитдим: “Эй Элам халқи, ҳужум қил, Эй Мидия[125] халқи, қамал қил! Жамики нолаларга барҳам бераман!”

³Эвоҳ, кўрганларимдан ичимда оғриқ турди, Туғаётган аёл каби азоблар мени қамради. Икки букилдим эшитганларимдан, Даҳшатга тушдим кўрганларимдан.

⁴Юрагим увушиб кетди, Қўрқувдан титраб кетдим. Оқшомни кутгандим, Оқшом эса қўрқувга тўла.

⁵Бобилликлар гиламлар тўшаб, Дастурхон ҳозирламоқдалар, Улар еб — ичмоқдалар. Бирданига шундай овоз эшитилмоқда: “Қўзғалинг, эй раҳнамолар, қалқонларни ёғланг!”

⁶Раббий менга шундай деди: “Қани, бир қоровул қўй, Кўрганини етказсин.

⁷Жанг араваларининг, отлиқларнинг, Эшакларга, туяларга минганларнинг Жуфт — жуфт бўлиб келганини кўради. Яхшилаб эътибор берсин.”

⁸Шу лаҳзада қоровул шердай ўкириб қолди[126]: “Эй тўрам, мен кундузи ҳар доим Қоровул минорасида тураман, Ҳар тун ҳам жойимдаман.

⁹Ана, жанг аравалари, отлиқлар Жуфт — жуфт бўлиб келаётир!” Шу он у бақириб хабар берди: “Қулади, Бобил қулади![127] Бутлари синиб, ер билан битта бўлди!”

¹⁰Эҳ, халқим! Хирмонда буғдой каби янчилган[128] халқим! Исроил халқининг Худоси — Сарвари Оламдан Эшитганларимни сизга билдирдим.

¹¹Думах[129] ҳақида башорат: Сеирдан[130] мени чақиришар: “Эй посбон, қачон тонг отар? Қачон тонг отар?”

¹²Жавобим шудир: “Тонг отаётир, Аммо яна кеч киради. Кўпроқ билмоқчи бўлсангиз, Яна қайтиб келинг.”

¹³Арабистон ҳақида башорат: Ғарб ўрмонларида тунайсиз, Эй Дедон[131] карвонлари!

¹⁴Эй Темо[132] аҳолиси! Сув келтиринг, ташналарга пешвоз чиқинг! Қутулиб омон қолганларга нон беринг!

¹⁵Ахир, улар қочаётирлар қиличдан, Душманнинг кўтарилган қиличидан, Таранг тортилган ёйлардан, Шафқатсиз урушлардан.

¹⁶Раббий менга шундай деди: “Яна бир йилдан кейин, ёлланган ишчининг муддати каби, Кедарнинг[133] улуғворлиги барҳам топади.

¹⁷Кедарнинг жасур камонкашларидан озгинаси қолади.” Ҳа, Исроил халқининг Худоси — Эгамиз шундай деди.