Read Муқаддас Китоб Uzbek Ишаё 25 Bible Online

Ишаё 25 - Муқаддас Китоб Uzbek bible

Ишаё 25

¹Эй Эгам, Сен менинг Худойимсан. Мен Сени улуғлайман, Сенга ҳамду санолар айтаман. Сен ажойиб ишлар қилгансан, Қадимдан тузган режаларингни, Садоқат билан амалга оширгансан.

²Яксон қилдинг душманларимиз қалъаларини, Вайронага айлантирдинг мустаҳкам шаҳарларини, Йўқ қилдинг узоқ юртдаги ажойиб саройларини, Улар ҳеч қачон қайта тикланмас.

³Энди кучли халқлар Сени иззат қилади, Шафқатсиз халқлар Сенга сажда қилади.

⁴Камбағал, бечоралар кулфатда қолганда, Сен уларга бошпана бўлдинг. Пешиндаги жазирамадан соя, Жаладан паноҳ бўлдинг. Ваҳший ғанимларнинг ҳужуми бўрондай бўлди. Сен эса бизнинг паноҳимиз бўлдинг.

⁵Душман шовқин — сурони Саҳро иссиғи каби бўлганда, Жазирама иссиқни Сен Булутлар сояси ила босдинг. Душманнинг севинч қўшиғи Садоларини ўчирдинг.

⁶Бу тоғда[152] Сарвари Олам Жамики халқлар учун Ажойиб зиёфат тайёрлар. Бой дастурхон, сара шароблар, Ёғли гўштлар, тиниқ шароб тортилади.

⁷Ўша куни Эгам жамики халқлар устидан Кафанларини ечиб ташлайди. Мана шу тоғда Эгам Халқларни ўраган, элатлар устидаги Ёпинчиқни олиб ташлайди.

⁸Ҳа, У ўлимни бутунлай ютиб юборади. Эгам Худо ҳамманинг кўз ёшларини артиб қўяди, Бутун ер юзида Ўз халқининг уятини олиб ташлайди. Ҳа, Эгам шундай деб айтган!

⁹Ўша куни улар шундай дейдилар: “Мана, бизнинг Худойимиз, Қутқарсин деб, Уни кутгандик, У бизга нажот берди. Келинглар, қувонайлик, севинайлик! Умид қилиб кутгандик, Мана, бизнинг Эгамиз.”

¹⁰Эгамнинг Ўзи бу тоғни ҳимоя қилар. Мўаб[153] халқи янчилган сомондай эзилар, Чиритиш учун гўнг чуқурга улоқтирилар.

¹¹Ҳа, улар бор кучи билан Сузувчига ўхшаб чуқурдан чиқишга интилар. Аммо Худо уларнинг ғурурини яксон қилар, Қўлларининг моҳирлиги фойда бермас.

¹²Мўабнинг қалъа деворлари бузиб ташланар, Вайронага айланар, ер билан яксон бўлар.