Read Муқаддас Китоб Uzbek Ишаё 32 Bible Online

Ишаё 32 - Муқаддас Китоб Uzbek bible

Ишаё 32

¹Ана, шоҳ солиҳлик билан ҳукмронлик қилади, Ҳукмдорлар адолат билан бошқаради.

²Ҳар бир одам шамолдан асрайдиган паноҳдай бўлади, Бўрондан сақлайдиган бошпана каби бўлади. Улар саҳродаги сув ўзанига ўхшайди, Ташна ердаги улкан қоянинг соясидай бўлади.

³Кўриб турганлар энди кўз юмиб юрмайди, Қулоғи борлар энди қулоқ солади.

⁴Идроксизнинг ақли англайдиган бўлади, Дудуқ одамнинг тили равон бўлади.

⁵Аҳмоқни энди аслзода деб чақирмайдилар, Ярамасни, ҳурматга сазовор, деб айтмайдилар.

⁶Мана, аҳмоқ калтафаҳмлик билан гапиради, Фикри — зикри эса ёвузлик билан банд. Қилганлари — нопоклик, Эгам ҳақида хато гапиради. Оч одамни у очлигича қолдиради, Чанқаганга сув бермайди.

⁷Баттолнинг усуллари ёвуздир, У ёмонликлар режалаштиради, Ёлғон гап — сўзлари билан Фақирнинг ҳақ даъвосини йўққа чиқариб, Бечорани нобуд қилади.

⁸Олижаноб одамлар эса яхши режалар тузади, Яхши ният қилиб, ўз сўзида туради.

⁹Эй сиз, беғам аёллар, Туринглар, Менга қулоқ солинглар! Эй сиз, ўзига ишонган қизлар, Менинг гапларимни эшитинглар!

¹⁰Эй сизлар, бепарво юрганлар, Бир йил ўтар — ўтмас титрай бошлайсиз. Узум ҳосили яхши бўлмайди, Мева ҳосил бермайди.

¹¹Қўрқинг, эй сиз, беғам аёллар, Қалтиранг, эй ўзига ишонган қизлар! Тавба қилиб, кийимингизни ечиб ташланг. Қанорга ўраниб, белингизни боғланг!

¹²Кўкрагингизга уриб йиғланг Ажойиб далаларингиз, Серҳосил узумзорларингиз учун!

¹³Халқимнинг ери учун йиғланг! У ерни тикан, янтоқ буталари босиб кетади. Ҳа, шодликка тўла бўлган уйлар учун, Қувноқ шаҳар учун аза тутинг!

¹⁴Мана, сарой ташландиқ бўлиб қолди, Гавжум шаҳар саҳрога айланди. Қалъаю минора то абад Ёввойи эшаклар яйрайдиган жой, Чорва учун яйлов бўлди.

¹⁵Токи юқоридан устимизга Руҳ ёғилмагунча шундай бўлади. Ундан кейин саҳролар серҳосил далага айланади, Серҳосил дала ўрмон сифат бўлади.

¹⁶Шунда одиллик саҳрода макон қилади, Солиҳлик серҳосил далада маскан қилади.

¹⁷Солиҳлик меваси тинчлик бўлади, Солиҳлик самараси то абад хотиржамлик, ишонч бўлади.

¹⁸Халқим яшайди сокин жойларда, Бехавотир уйларда, хотиржам масканларда.

¹⁹Ўша ўрмонни дўл яксон қилади, У шаҳар эса тамомила йўқ бўлади.

²⁰Шундай бўлса ҳам, нақадар бахтлисиз! Ирмоқлар бўйида экин экасиз. Чорваю подангиз яйловларни кезиб юради.