Read Муқаддас Китоб Uzbek Ишаё 35 Bible Online

Ишаё 35 - Муқаддас Китоб Uzbek bible

Ишаё 35

¹Чўлу биёбон шод бўлади, Саҳро қувониб, атиргулдай гуллайди.

²Ҳамма ёқда гул — чечаклар очилади, Чўл шодланиб, қувончдан ҳайқиради. Лубноннинг чиройи, Кармил тоғининг, Шарон текислигининг[201] улуғворлиги Унга берилади. Улар Эгамизнинг шуҳратини, Худойимизнинг улуғворлигини кўради.

³Қўллари чарчаганларга далда бергин, Тиззалари букилганларга мадад бергин.

⁴Қўрқоқ юракларга шундай деб айтгин: “Дадил бўлинг, қўрқманг! Мана, Худойингиз! Қасос келмоқда илоҳий интиқом ила, Унинг Ўзи сизларга нажот беради.”

⁵Ўша пайтда кўрларнинг кўзлари очилади, Карларнинг қулоқлари эса эшитади.

⁶Чўлоқ ҳам оҳудай сакрайди, Соқов шодликдан ҳайқиради. Мана, ахир, саҳрода сув шариллаб оқмоқда, Чўл жойлар эса ирмоқларга тўла.

⁷Қизиб ётган қум ҳовузга айланади, Қақраган ер қайнаётган булоқ бўлади. Олдин чиябўрилар яшаган масканларда Энди майса, қамиш, папируслар ўсади.

⁸Ўша ердан катта йўл ўтади, Муқаддас Йўл деб аталган йўл бўлади. Нопоклар у йўлга қадам босмайди, Бу йўл мана шу йўлдан юрадиганларга қарашлидир. Бу йўлдан юрадиганлар, Ҳатто идроксизлар ҳам адашмайди[202].

⁹У ерда шер бўлмайди. Йиртқич ҳайвон юрмайди. Улар бу ерда топилмайди. Ҳа, фақат нажот топганлар ўша ерда юради.

¹⁰Эгамиз қутқарганлар қайтиб келади, Улар қўшиқ айтиб, Қуддусга[203] киради. Бошларида абадий шодлик тожи бўлади, Шод — хуррамлик уларни қамраб олади, Қайғу, ғамлар йўқ бўлиб кетади.