Read Муқаддас Китоб Uzbek Ишаё 43 Bible Online

Ишаё 43 - Муқаддас Китоб Uzbek bible

Ишаё 43

¹Энди, эй Ёқуб насли, сени яратган Эгамиз гапирмоқда! Эй Исроил халқи, сени барпо қилган Эгамиз шундай айтмоқда: “Мен сени қутқардим, Сенинг исмингни айтиб чақирдим, Сен Меникисан, қўрқма!

²Сувлардан ўтганингда Мен сен билан бирга бўламан. Дарёлардан ўтганингда Сувлар сени кўммайди. Оловдан ўтганингда Аланга сени ёндирмайди, Олов тафти сени куйдирмайди.

³Ҳа, Мен Эганг Худодирман, Исроил халқининг Муқаддас Худоси — қутқарувчингман. Сен учун тўлов қилиб Мисрни бердим, Ҳабашистон[249], Саво[250] юртларини сенинг ўрнингга бердим.

⁴Кўз олдимда азизсан, қадрлисан, Мен сени севаман. Шу боис сенинг эвазингга одамни, Жонинг эвазига халқларни бераман.

⁵Қўрқма, Мен сен билан биргаман, Наслингни шарқдан олиб келаман, Сизларни ғарбдан йиғиб келаман.

⁶Шимолга: «Уларни бер», дейман. Жанубга: «Уларни ушлаб қолма», деб айтаман. Ўғилларим узоқлардан, Қизларим ернинг четларидан келсин.

⁷Менга тегишли бўлганларни Ўз шуҳратим ҳақи яратдим, Ўзим ижод қилиб, уларни бино қилдим.”

⁸Эгамиз шундай демоқда: “Халқимни йиғинглар. Кўзи бор, аммо кўр бўлган, Қулоғи бор, аммо кар бўлган халқимни тўпланглар.

⁹Жамики элатлар бирга йиғилсин. Қани, халқлар келиб қўшилсин. Уларнинг орасидан ким буни айтиб беради?! Ўтиб кетган нарсаларни ким бизга билдиради?! Гувоҳларини чақириб, ҳақлигини исботласин, Бошқалар эшитиб: «Бу тўғри», деб айтсин.”

¹⁰Эгамиз шундай айтмоқда: “Сизлар Менинг шоҳидимсизлар, Сизлар Менинг қулимсизлар. Мени билсин, Менга ишонсин, деб Танҳо Худо Мен эканлигимни билсин, деб Сизларни танладим. Мендан олдин бирон худо бўлмаган, Мендан кейин ҳам бўлмайди.

¹¹Мен Эгангизман! Ёлғиз Мен Эгангизман, Мендан бошқа қутқарувчи йўқ.

¹²Мен Ўзим айтдим, қутқардим, билдирдим, Орангизда бошқа бирон худо йўқ.” Эгамизнинг каломи шудир: “Мен Худоман, сизлар Менинг шоҳидларимсиз.

¹³Ҳа, азалдан буён Мен Ўшаман, Ҳеч ким Менинг қўлимдан қутула олмайди. Мен қилганимни ким бекор қила олади?!”

¹⁴Исроил халқининг Муқаддас Худоси, қутқарувчингиз — Эгамиз шундай демоқда: “Сизларни деб Бобил устига лашкар юбораман, Ўзлари фахрланган кемаларда Бобилликлар[251] қочишга мажбур бўладилар.

¹⁵Мен Муқаддас Худойингиз — Эгангизман, Исроил халқининг Яратувчиси — Шоҳингиз Менман.”

¹⁶Эгамиз шундай демоқда: “Мен денгизни бўлиб, йўл очдим, Баҳайбат сувлар ичра сўқмоқ қилдим[252].

¹⁷Жанг араваларию отларни, Лашкару жангчиларни олиб чиқдим. Ана улар ётибдилар, турмайдилар. Пиликдай милтираб, ўчиб қолганлар.

¹⁸Ўтмишдагиларни ёдга олманг, Қадимгиларни ўйлайверманг.

¹⁹Мана, Мен янги бир иш қиляпман. Шу пайтнинг ўзидаёқ содир бўляпти! Кўрмаяпсизми?! Мен саҳрода йўллар очаман, Ҳа, чўлда дарёлар яратаман.

²⁰Ҳатто ёввойи ҳайвонлар Мени улуғлайди, Чиябўри, туяқушлар ҳам Мени шарафлайди. Зотан, танлаган халқимга сув берай дея, Саҳрога сувлар юбордим, Чўлда дарёлар яратдим.

²¹Бу халқни Ўзим учун яратганман. Улар Менга ҳамду сано айтсинлар.

²²Сен эса, эй Ёқуб насли, Менга сажда қилмадинг! Эй Исроил халқи, сен Мендан безор бўлдинг!

²³Сен Менга қўйларингни атамадинг, Уларни куйдириладиган қурбонлик қилмадинг. Мени улуғлаш учун қурбонликлар келтирмадинг. Мен назр — қурбонликларни сендан Меъёридан кўп талаб қилмадим — ку! Хушбўй тутатқиларни сендан Ортиғи билан сўрамадим — ку!

²⁴Сен Менга хушбўй қамиш сотиб олмадинг. Қурбонликлар ёғини келтирмадинг, Мени рози қилмадинг. Эвоҳ, гуноҳларинг билан Менга юк бўлдинг, Айбларинг билан Мени чарчатдинг.

²⁵Ўзимнинг ҳақи — ҳурматим Айбларингни кечирадиган Менман. Гуноҳларингни ёдга олмайман.

²⁶Қани, бирга даъволашайлик. Гапир! Айбсизлигингни исботла — чи! Ёдимга сол — чи!

²⁷Ахир, энг катта бобонг[253] гуноҳ қилганди. Пайғамбару руҳонийларинг Менга қарши чиққанди.

²⁸Шу боис муқаддас масканнинг Бошлиқларини ҳаром қиламан. Ҳа, Ёқуб наслини ҳалокатга, Исроил наслини ҳақоратга ҳукм этаман.”