Read Муқаддас Китоб Uzbek Ишаё 9 Bible Online

Ишаё 9 - Муқаддас Китоб Uzbek bible

Ишаё 9

¹Кулфат қамраган бу юртда энди азоб бўлмайди. Олдин Забулун ва Нафтали юрти[49] шарманда бўлган эди. Аммо келажакда денгиз бўйидаги ерлар, Иорданнинг нариги томонидаги ўлка[50] ва ғайрияҳудийлар Жалиласи[51] улуғланади.

²Зулматда юрган халқ ёрқин зиёни кўрди, Ўлим соя солган юрт аҳолиси устига нур сочилди.

³Бу халқни Сен кўпайтиргансан, Уларга кўп шодлик ато қилгансан. Ҳосил вақтидаги мамнунлик каби, Ўлжаларин бўлишиб олган пайтдаги каби, Улар ҳузурингда қувончга тўлган.

⁴Бу халқнинг оғир бўйинтуруғини, Елкасидаги таёғини Сен синдириб ташлагансан. Золимларнинг калтагини Мидиён халқи каби, Мағлуб қилгансан[52].

⁵Жангда кийилган этиклар, Қонга беланган ҳамма кийим Оловга ташланиб, ёқилажак.

⁶Мана биз учун бола туғилди, Ўғил бизга берилди. Ҳукмронлик Унинг зиммасидадир, Номи Ажойиб Маслаҳатчи[53], қудратли Худо, Абадий Ота, Тинчлик Шаҳзодасидир.

⁷Довуднинг тахтида Унинг ҳукмронлиги ортиб боради. Тинчлик то абад ҳукм суради. Ҳозирдан бошлаб, то абад У адолат ва ҳақиқат ила Шоҳлигини мустаҳкамлаб, барқарор қилади. Сарвари Олам жон куйдириб, Буни бажо айлайди.

⁸Ёқуб наслига қарши Раббий бир сўз юборди, Унинг сўзи Исроил халқига етиб келди.

⁹Эфрайимда[54], Самарияда яшайдиганлар, Жамики халқ бундан хабардор бўлди. Улар димоғдорлик, киборлик ила айтмоқда:

¹⁰“Ғиштин иморатлар вайрон бўлса, Йўнилган тошлар билан қурамиз. Шикамора — анжир дарахтлари[55] кесилган бўлса, Уларнинг ўрнига садр дарахтларини[56] экамиз.”

¹¹Ана, Орам шоҳи Ратанга қарши Эгам унинг душманларини қўзғатди, Ғанимларини даъват қилди.

¹²Шарқдан Орамлар, ғарбдан Филистлар Оғизларин катта очиб, Исроилни ютиб юборди. Аммо шундай бўлса ҳам, Эгам тушмас ғазабидан, Унинг қўли ҳамон Исроилга қарши кўтарилган.

¹³Бу халқ Сарвари Оламга юз бурмади, Жазо берган Зотга улар қайтмади.

¹⁴Шунда Эгам бир кунда Исроилнинг бошини ва қуйруғини, Хурмосини ва қамишини кесиб олди[57].

¹⁵Оқсоқоллар, амалдорлар бошдир, Сохта пайғамбарлар қуйруқдир.

¹⁶Улар бу халқни йўлдан адаштирган, Уларга эргашганлар боши берк кўчага кириб қолган.

¹⁷Ҳаммаси шаккок, қабиҳлик қилар, Барча оғизлардан аҳмоқона сўз чиқар. Раббий ёшлардан мамнун бўлмади, Етим ва беваларга шафқат кўрсатмади. Аммо шундай бўлса ҳам, Эгам тушмас ғазабидан, Унинг қўли ҳамон Исроилга қарши кўтарилган.

¹⁸Фосиқлик оловга ўхшаб ёнар, Еб битирар бутазору тиканзорларни. Ўрмондаги чангалзорларни ёндириб, Баландларга тутунини ўрлатади.

¹⁹Сарвари Оламнинг қаҳридан Юрт ёниб битар, Халқ оловга ёнилғи бўлар. Одамлар ўз яқинига шафқат қилмас,

²⁰Улар ўнг тарафга ҳамла қиладилар, Аммо оч қоладилар. Ютаман деб чап томонга ҳужум қиладилар, Аммо тўймайдилар. Ўз қўлининг гўштини ейди инсонлар.

²¹Манаше қабиласи ейди Эфрайим қабиласини, Эфрайим эса Манашени, Иккови бирлашиб Яҳудога[58] ҳужум қилади. Аммо шундай бўлса ҳам, Эгам тушмас ғазабидан, Унинг қўли ҳамон Исроилга қарши кўтарилган.