Read Муқаддас Китоб Uzbek Ҳизқиёл 19 Bible Online

Ҳизқиёл 19 - Муқаддас Китоб Uzbek bible

Ҳизқиёл 19

¹Эгамиз менга Исроилнинг икки шаҳзодаси[69] учун мана шу марсияни айтишимни буюрди:

²“Сенинг онанг[70] қўрқмас бир шер эди! У шерлар орасида ўрнашди, Ёш шерлар орасида болаларини ўстирди.

³Битта боласи[71] кучли бир шер бўлди. У ов қилишни ўрганди, Одамхўрлик қила бошлади.

⁴Буни халқлар эшитдилар, Шерни ўзларининг тузоғига туширдилар. Уни занжирбанд қилиб, Мисрга олиб кетдилар.

⁵Она шер умиди пучга чиққанини кўрди, Орзуси ушалмаганини билди. Шунда бошқа боласини[72] ўстирди, Уни кучли бир шер қилди.

⁶У катта бўлгач, Бошқа шерлар ила изғийдиган бўлди. Ов қилишни ўрганди, Одамхўрлик қила бошлади.

⁷Қалъаларини бузар эди[73], Шаҳарларини вайрон қиларди. Юрт ва унинг бутун аҳолиси У ўкирганда даҳшатга тушарди.

⁸Атрофдаги ҳудудлардан халқлар Унга ҳужум қилдилар. Устига тўр ташлаб, Тузоғига туширдилар.

⁹Занжирбанд қилиб, қафасга солдилар, Бобил шоҳи ҳузурига олиб бордилар. Исроил тоғларида унинг товуши Бошқа эшитилмасин дея, Уни зиндонга ташладилар.

¹⁰Сенинг онанг[74] узумзордаги токдай эди, Ариқ бўйига ўтқазилган эди. Сувга мириққанидан Серновдаю серҳосил эди.

¹¹Бақувват новдалари Салтанат ҳассаларига[75] айланди. Қалин шох — шаббадан ҳам баланд кўтарилди. Баландлиги, сербарглиги билан Кўзга ташланиб турар эди.

¹²Аммо ғазаб ичра ток суғуриб ташланди, Ерга улоқтириб юборилди. Шарқдан эсган шамол ҳосилини қуритди, Бақувват новдалари синиб қуриди. Ҳаммасини олов ямлаб юборди.

¹³Энди бу ток саҳрога ўтқазилган. Ҳа, сувсаган, қақроқ чўлга экилган.

¹⁴Унинг поясидан олов чиқди, Новдалару меваларини куйдириб юборди. Биронта бақувват новдаси қолмади, Салтанат ҳассасига ярамайдиган бўлди.” Бу марсия қўшиғидир, у мотам оҳангида куйланади.