Read Муқаддас Китоб Uzbek Ҳизқиёл 27 Bible Online

Ҳизқиёл 27 - Муқаддас Китоб Uzbek bible

Ҳизқиёл 27

¹Эгамиз менга Ўз сўзини аён қилди:

²“Эй инсон, Тир[119] ҳақида бир марсия куйла.

³Денгиз бўйидаги юртлар билан савдо — сотиқ қиладиган, денгиз дарвозасида ўрнашган Тир шаҳрига айт: «Эгамиз Раббий шундай демоқда: Эй Тир, сен: ‘Гўзалликда баркамолман’, дединг.

⁴Ҳа, сенинг чегараларинг денгиз бағридан ўтган, Қурувчиларинг гўзаллигингни баркамол қилган.

⁵Хермон тоғидаги[120] арча ёғочидан қурилган Улкан бир кемадай эдинг сен. Қурувчиларинг мачтангни ясаш учун Лубнондан келтирилган садр ёғочини[121] ишлатдилар.

⁶Эшкакларингни Башан эманларидан ясадилар. Кема саҳнини Кипр[122] қарағайларидан қилдилар, Фил суяги билан уни безатдилар.

⁷Елканларинг Мисрдан келтирилган нақшли матолардан эди, Улар сенга байроқ бўлиб хизмат қиларди. Элишох қирғоқларидан олиб келинган Кўк ва сафсар газламалар соябонинг эди.

⁸Сидон ва Арвод[123] одамлари эшкакларингни эшар эди, Ўз моҳир одамларинг эса кемаларингни бошқарар эди.

⁹Габоллик[124] тажрибали кемасозларинг бор эди, Улар кемангнинг ёриқларини сақичларди. Барча кемалару денгизчилар келиб, Сенинг молларингни сотиб олишар эди.

¹⁰Форс, Лидия ва Ливия[125] юртларининг аскарлари Сафларингда хизмат қилар эди. Қалқону дубулғаларини деворларингга осиб, Сени салобатли қилишар эди.

¹¹Арвод ва Хелекдан[126] келган одамлар Деворларингда соқчилик қилишарди, Гамадликлар минораларингни қўриқлашарди. Деворларингга қуролларини осиб, Гўзаллигингни баркамол қилишарди.

¹²Сенинг бойликларинг шу қадар кўп эдики, ҳатто Таршиш[127] аҳолиси сен билан савдо — сотиқ қиларди. Улар кумуш, темир, қалай ва қўрғошинни молларингга айирбошлашарди.

¹³Юнонлар[128], Тувал ва Мешех[129] халқлари сен билан савдо — сотиқ қилар эди. Молларинг эвазига қулларни ва бронза буюмларни беришар эди.

¹⁴Тўхармоликлар[130] аравага қўшиладиган отларни, жанг отларию хачирларини молларингга алмаштиришарди.

¹⁵Рўдон[131] халқи сен билан савдо — сотиқ қилар эди. Денгиз соҳилидаги кўп юртлар сенинг харидорларинг эди. Улар фил суяги ва обнус ёғочини[132] сенга тўлов сифатида беришарди.

¹⁶Молларинг беҳисоб бўлгани учун Орам[133] халқи ҳам сен билан савдо — сотиқ қиларди. Молларинг эвазига қимматбаҳо фируза тошларни, сафсар матоларни, нақш солинган газламаларни, майин зиғир матоларини, маржону ёқутларни олиб келарди.

¹⁷Яҳудо ва Исроил юртлари сен билан олди — сотди қилишарди. Улар молларинг эвазига Миннитдан келтирилган буғдойни, шунингдек, ширинликлар, асал, зайтун мойи ва мумиё олиб келишарди.

¹⁸Сенинг чексиз бойликларинг, турли хил молларинг туфайли, Дамашқ аҳолиси сен билан савдо — сотиқ қиларди. Молларинг эвазига улар Хелбон[134] шаробини ва оппоқ юнгни[135] олиб келишарди.

¹⁹Узол шаҳридан шароб келтириб[136], сен билан олди — сотди қилишарди. Ишлов берилган тоза темирни, долчин ва хушбўй қамишни молларингга алмаштиришарди.

²⁰Дедонликлар[137] сенга от терлигини[138] сотишар эди.

²¹Қўзичоқ, қўчқор ва эчкилар билан сени таъминлаган Арабистон ва Кедар[139] шаҳзодалари молларингни харид қилишарди.

²²Шава ва Рамо[140] савдогарлари сен билан савдо — сотиқ қилишарди. Молларинг эвазига энг аъло зираворларни, қимматбаҳо тошлару олтинни беришарди.

²³Хорон, Ханнох ва Эден шаҳарлари ҳамда Шава, Ошур ва Хилмад[141] савдогарлари сен билан савдо — сотиқ қилишарди.

²⁴Улар қимматбаҳо либослар, кўк матолар, нақш солинган кўйлаклар, ранг — баранг гиламлар, пухта эшилган арқонларни сенга сотишарди.

²⁵Таршиш[142] кемалари карвонларинг бўлиб хизмат қиларди. Сен денгизда сузган бир кемадайдирсан, Оғир юк сенга юкланган.

²⁶Эвоҳ, эшкакчиларинг сени очиқ денгизга олиб чиқишади. Шарқ шамоли сени денгиз бағрида парчалаб юборади.

²⁷Кеманг ҳалокатга учраган куни Молларинг, бойликларинг, Денгизчиларинг, дарғаларинг, Кемасозларинг, савдогарларинг, Жангчиларинг ва кемадаги одамларинг Денгиз тубига чўкиб, ҳалок бўладилар.

²⁸Чўкаётган дарғаларинг фарёд қилади, Додлари соҳилларни ларзага солади.

²⁹Ҳамма эшкакчилар кемаларини тарк этади, Денгизчилару дарғалар соҳилга чиқиб олади.

³⁰Улар сен учун фарёд қилади, Аччиқ — аччиқ кўз ёшлар тўкади. Бошларидан тупроқ сочади, Кулга беланиб, ётиб олади.

³¹Сени деб сочларини қирдиради, Қанорга ўраниб олади[143], Қайғудан юрак — бағри қон бўлади.

³²Улар йиғлаб, сен ҳақингда марсия куйлайди: ‘Тир каби биронта шаҳар борми?! Денгиз уни ўз қаърига тортиб кетди.’

³³Сен денгиз ортидан келтирган молларинг билан, Кўплаб халқларнинг эҳтиёжини қондирдинг. Чексиз зийнатлару молларинг билан Дунё шоҳларини сен бойитдинг.

³⁴Энди эса денгиз сени парчалади, Ўз домига сени тортиб кетди. Барча молларингу денгизчиларинг Сен билан бирга нобуд бўлди.

³⁵Соҳилдаги халқлар кулфатингни кўриб, даҳшатга тушади. Қўрқувдан шоҳларнинг афти буришиб кетади.

³⁶Аҳволингдан дунё савдогарлари ёқасини ушлайди. Ҳа, сенинг бошингга даҳшатли ўлим келди, Сен абадий йўқ бўласан.»”