Read Муқаддас Китоб Uzbek Хўшея 11 Bible Online

Хўшея 11 - Муқаддас Китоб Uzbek bible

Хўшея 11

¹Эгамиз шундай дейди: “Мен Исроилни болалигида яхши кўрар эдим, Ўз ўғлонимни Мисрдан чақириб олган эдим[81].

²Уни қанча кўп чақирсам, Мендан[82] шунча кўп узоқлашарди. Баалга қурбонликлар келтирарди, Бутларга тутатқилар назр қиларди.

³Эфрайимга[83] юришни Мен ўргатган эдим, Уни қўлларимда кўтариб юрган эдим. Аммо қилган ғамхўрлигимни у билмади.

⁴Мен эса уни меҳр ила етаклагандим, Муҳаббат ришталари ила олиб юрган эдим. Бўйнидан бўйинтуруқни[84] олиб ташлагандим, Мулойимлик билан уни боққандим.

⁵Халқим тавба қилишдан бош тортди. Шунинг учун Мен уларни энди Мисрга жўнатиб жазолайман[85], Ҳа, золим Оссурияга тобе қиламан.

⁶Шаҳарларида қилич ҳукм суради, Дарвозаларининг тамбаларини йўқ қилади. Ёвуз режалари туфайли халқим қиличдан ҳалок бўлади.

⁷Қачон қараманг, улар Мендан юзини ўгиришади. Пайғамбарларим халқни Менга қайтишга даъват қилса — да, Халқ Мендан — Худойи Таолодан мадад тиламайди[86].

⁸Эй Эфрайим, қандай қилиб сендан воз кечай?! Эй Исроил, қандай қилиб сени ташлаб кетай?! Адмани йўқ қилганимдай, сени йўқ қила олармиканман?! Завўйимга[87] қилганимни сенга қила олармиканман?! Бундай қилишга юрагим бетламас асло! Сенга бўлган меҳрим уйғонди.

⁹Йўқ, сочмайман сенга қаҳр — ғазабимни, Эй Эфрайим, қайта барбод қилмайман сени, Зеро, Мен Худоман, инсон эмас, Орангиздаги Муқаддас Худоман, Олдингизга жаҳл билан бормайман.

¹⁰Мен, Эгангиз, шердай ўкираман, Ўшанда халқим ортимдан эргашади, Овозимни эшитгач, фарзандларим ғарбдан шошиб келишади.

¹¹Улар қушлардай учиб келади Мисрдан, Каптарлардай етиб келади Оссурия юртидан[88]. Мен уларни уйларига элтиб қўяман. — Эгамизнинг каломи шудир. —

¹²Эфрайим атрофимни ёлғон билан ўраб ташлади, Исроил хонадони Мени ҳийлага кўмиб ташлади. Яҳудо халқи Менга қарши бош кўтарди, Мен, Муқаддас Худога улар итоат қилмаяпти[89].”