Read Муқаддас Китоб Uzbek Хўшея 12 Bible Online

Хўшея 12 - Муқаддас Китоб Uzbek bible

Хўшея 12

¹Эфрайим[90] гармсел[91] боқиб юрар, Кун бўйи шарқдан эсган шамол кетидан қувар. Ёлғону зўравонликни у орттирар. Оссурия билан сулҳ тузиб, Зайтун мойини Мисрга жўнатар.

²Яҳудога Эгамиз даъво қилади. Ёқуб наслининг[92] таъзирини У беради, Тутган йўлига яраша уни жазолайди.

³Онасининг қорнидаёқ Ёқуб акаси билан талашган[93], Улғайгач эса Худо билан олишган[94].

⁴Ҳа, фаришта[95] билан олишиб, уни енгган эди, Кейин йиғлаб, илтифот қилишини сўраганди. Байтилда[96] Ёқуб Худони топганди, Ўша ерда Худо билан суҳбат қурганди[97].

⁵Парвардигори Олам — Эгамиз Ўшадир, Эгамиздир Унинг номи!

⁶Эй Ёқуб насли, Худойингизга қайтинг. Севги ва адолатга интилинг, Сабр — тоқат ила Худодан умид қилинг.

⁷Эгамиз шундай дейди: “Халқим тарозидан урган савдогарга ўхшайди, Фирибгарлик қилишни улар хўп яхши кўради.

⁸«О, мен бойман, — деб мақтанасан, эй Эфрайим. — Мен ўзимга давлат орттирдим, Боримни пешана терим билан топдим. Ҳеч ким мени гуноҳда айблай олмас.»

⁹Аммо Эгангиз Худо — Менман, Сени Мисрдан олиб чиққанман. Мен сенга саҳрода зоҳир бўлар эдим, Ўша даврдагидай сени яна чодирларда яшаттираман[98].

¹⁰Мен пайғамбарларга гапиргандим, Ўзим уларга кўп ваҳийлар бергандим, Улар орқали сени, эй халқим, огоҳлантирган эдим.

¹¹Аммо Гиладдаги[99] ёвузлик тўхтамади, Гилгалда[100] буқалар бутларга аталиб Ҳамон қурбонлик қилинмоқда. Шунинг учун Гилад аҳли албатта барҳам топади, Гилгалдаги қурбонгоҳлар бузиб ташланади, Улар шудгор қилинадиган далалардан Улоқтириб ташланган тошлардай бўлиб қолади.”

¹²Ёқуб Орам[101] юртига қочиб борди[102], Хотин олиш учун у[103] қулдай ишлади, Қалин эвазига қўйлар боқди[104].

¹³Эгамиз вақти келиб пайғамбар[105] юборди, Ёқуб наслини[106] Мисрдаги қулликдан олиб чиқди, Ўша пайғамбари орқали уларни боқди.

¹⁴Аммо Эфрайим Эгамизни қаттиқ ранжитди. Тўккан қон учун Эфрайимни Раббий жазолайди, Уни ҳақоратлагани учун адабини беради.