Read Муқаддас Китоб Uzbek Хўшея 13 Bible Online

Хўшея 13 - Муқаддас Китоб Uzbek bible

Хўшея 13

¹Эгамиз шундай дейди: “Илгари Эфрайим[107] гапирганда ҳаммани титроқ босарди, Исроилда унинг мартабаси улуғ эди. Аммо Эфрайим Баалга сажда қилиб, гуноҳ орттирди, Шундай қилиб, ўзини ўлимга маҳкум этди.

²Ҳозир ҳам халқим гуноҳ устига гуноҳ қилишар. Ўзларига бутлар ясашар, Кумушдан маҳорат билан санамлар ишлашар[108], Буларнинг барчаси бор — йўғи ҳунарманднинг иши — ку! Менинг халқимга шундай деб айтишяпти[109]: «Бутларга қурбонликлар келтиринглар! Олтин бузоқларни ўпинглар![110]»

³Шунинг учун улар тонгги тумандай бўлади, Бирпасда ғойиб бўладиган шудрингга ўхшаб қолади. Шамол хирмондан учирган тўпондай улар ғойиб бўлади, Мўридан чиқадиган тутунга ўхшаб қолади.

⁴Аммо Эгангиз Худо — Менман. Эй Исроил, сени Мисрдан олиб чиққанман. Мендан бошқа Худони сен билмайсан, Мендан бошқа йўқдир нажоткоринг.

⁵Мен саҳрода[111] сенга ғамхўрлик қилдим, Сувсиз қақраган чўлда сени боқдим.

⁶Серҳосил ўлкада қорнингни тўйғиздим[112], Аммо қорнинг тўйгач, манман бўлиб кетдинг, Шу сабабдан сен Мени унутдинг.

⁷Энди Мен йўлингни қоплондай пойлайман, Сенга бир шердай ҳужум қиламан.

⁸Болаларидан айрилган она айиқ каби ташланаман, Сени тилка — пора қиламан. Ўша жойдаёқ сени шердай ғажийман, Йиртқичга ўхшаб сени қонга белайман.

⁹Эй Исроил, ўз бошингга ўзинг бало орттирдинг, Ахир, Менга — Ўз Мададкорингга қарши чиқдинг.

¹⁰Шаҳарларингни қутқарадиган шоҳинг қани?! «Бизга шоҳу ҳокимлар бер», деб сўраган бошлиқларинг қани?!

¹¹Мен жаҳл устида сенга шоҳларни бердим, Ғазабга минганимда уларни олиб ташладим.

¹²Эфрайимнинг жинояти ёзиб қўйилган, Ҳа, унинг гуноҳи китобга битилган.

¹³Исроилнинг яшашга имконияти бор эди, Аммо у нодон болага ўхшади, Онани тўлғоқ тутганда, У қориндан чиқишни хоҳламади.

¹⁴Мен бу халқни ўликлар диёридан қутқарармиканман?! Уларни ўлимдан халос қилармиканман?![113] Эй ўлим, қирғин олиб келгин! Эй ўликлар диёри[114], ҳалокатли кучингни кўрсатгин![115] Энди Мен раҳм — шафқат қилмайман.”

¹⁵Исроил қариндошлари орасида Серпушт ва фаровон бўлса — да, Эгамиз унинг устига шарқ шамолини юборади, Саҳродан эсган гармселни[116] жўнатади. Исроилнинг булоғини қуритади, Унинг чашмасини қовжиратади. Хазинасидаги қимматбаҳо зийнатларини тортиб олади.