Read Муқаддас Китоб Uzbek Хўшея 6 Bible Online

Хўшея 6 - Муқаддас Китоб Uzbek bible

Хўшея 6

¹Бу халқ шундай дейди: “Келинглар, Эгамизга қайтайлик! У бизни тилка — пора қилди, Шифони ҳам Ўзи беради. Бизни ярадор қилди, Яраларимизни Ўзи боғлайди.

²Унинг ҳузурида яшай олишимиз учун, Икки кунда бизни ҳаётга қайтаради, Учинчи куни оёғимизга турғизади.

³Келинглар, Эгамизни билишга интилайлик. Тонг отиши муқаррар бўлгандай, У албатта бизга зоҳир бўлади, Куз ва баҳорда ёмғир ёғиши табиий бўлгандай, У албатта олдимизга келади.”

⁴Эгамиз шундай дейди: “Сени нима қилай, эй Эфрайим?![47] Сени нима қилай, эй Яҳудо?! Сенинг севгинг тонгдаги тумандай тез ғойиб бўлар, Саҳардаги шудринг каби буғланиб кетар.

⁵Шунинг учун сўзларим билан сени ўлгудай саваладим, Пайғамбарларим орқали сени чопиб ташладим. Чиқарган ҳукмим чақмоқ каби сени уради.

⁶Зеро, Мен қурбонликни эмас, Раҳм — шафқатни истайман, Куйдирилган қурбонликларни эмас, Мени таниб — билишингни афзал кўраман.

⁷Халқим Одам Атодай[48] аҳдни бузди, Эвоҳ, Менга бевафолик қилди.

⁸Гилад — ёвузларнинг шаҳридир, Кўчалари қон доғларига тўладир.

⁹Руҳонийлар қароқчиларга ўхшайди, Улар пистирмада ётиб, қурбонини пойлашади. Шакам шаҳри[49] йўлида қотилликлар қилишади, Ҳа, улар мудҳиш жиноятларга қўл урди.

¹⁰Мен Исроилда даҳшатли ҳодисани кўрдим: Эфрайим бевафолик қилди! Исроил ўзини булғади!

¹¹Эй Яҳудо, сен учун ҳам ўрим пайти белгиланди. Мен халқимни яна фаровонликка эриштирмоқчи бўлганимда,