Read Муқаддас Китоб Uzbek Йўэл 3 Bible Online

Йўэл 3 - Муқаддас Китоб Uzbek bible

Йўэл 3

¹Эгамиз шундай дейди: “Ўша кунларда Мен Яҳудо ва Қуддуснинг олдинги мавқеини тиклайман.

²Сўнг барча халқларни йиғиб, Ҳукм водийсига[12] олиб тушаман. У ерда халқим Исроил ҳақи улар билан даъволашаман, чунки улар Менинг халқимни турли элларга тарқатиб юбордилар. Юртимни эса ўзаро бўлишиб олдилар.

³Улар халқим учун қуръа ташлаб, ўғил — қизларимни сотиб юбордилар. Тушган пулга фоҳишабозлигу айш — ишрат қилдилар.

⁴Эй Тир, Сидон[13] ва бутун Филист халқи, Менда нима қасдингиз бор?! Сизлар ҳали Мендан ўч олмоқчимисиз?! Борди — ю, ниятингиз шу бўлса, Мен ўша заҳотиёқ қилмишингизга яраша жазоингизни бераман.

⁵Сизлар олтину кумушларимни тортиб олдингиз, қимматбаҳо хазиналаримни саждагоҳларингизга олиб кетдингиз.

⁶Яҳудо ва Қуддус халқини юнонларга[14] сотиб, ўз ватанидан йироқ қилдингиз.

⁷Энди Мен Яҳудо ва Қуддус халқини сизлар сотган юртлардан олиб чиқаман. Қилмишингизга яраша жазоингизни бераман.

⁸Ўғил — қизларингизни Яҳудо халқига сотаман, улар эса фарзандларингизни олисдаги бир халққа — Саволикларга[15] сотишади.” Зотан, бу сўзларни Эгамиз айтди.

⁹Халқлар орасида шундай деб эълон қилинг: “Жангга тайёрланиб, жангчиларни сафарбар қилинг! Сипоҳларингиз ҳужум қилсин!

¹⁰Омочларингиздан ясанг қиличлар, Ўроқларингиздан қилинг найзалар. Заифлар ҳам қўлига қурол тутсин.

¹¹Эй теваракдаги халқлар, шошилинг[16], Қани, ҳаммангиз водийда тўпланинг.” Ўз сипоҳларингни, эй Эгам, чақир!

¹²Эгамиз шундай дейди: “Барча халқлар бўлсин сафарбар, Ҳукм водийсига[17] келишсин улар. Мен у ерда ўтирарман, Ҳамма халқлар устидан ҳукм чиқарарман.

¹³Қани, келинглар, Етилган буғдойни ўргандай уларни ўринглар, Пишган узумни эзгандай[18], босиб йўқ қилинглар, Хумлар тўлган, Уларнинг қабиҳликлари билан тўлиб — тошган.”

¹⁴Минг — минглаб оломон Тўпланган Ҳукм водийсида! Зотан, яқинлашгандир Эгамизнинг куни[19] Ҳукм водийсига.

¹⁵Қуёш ҳам, ой ҳам қорайган, Юлдузлар нури сўнган.

¹⁶Эгам Қуддусдан туриб ҳайқирар, Сиондан гулдурос овози янграр, Еру осмон ларзага келар. Аммо Эгам Ўз халқини паноҳига олар, У Исроил халқининг қўрғони бўлар.

¹⁷Эгамиз шундай дейди: “Эй халқим, шунда сизлар Эгангиз Худо Мен эканлигимни биласизлар. Мен муқаддас тоғим Сионда[20] қурганман маскан. Табаррук бир шаҳар бўлади Қуддус, Босқинчилар энди асло унга қилмас тажовуз.

¹⁸Ўша куни сут оқар қирлардан, Узум шарбати келар тоғлардан, Яҳудодаги ўзанлар сувга тўлар, Менинг уйимдан булоқ отилиб чиқар, Акас дарахтлари ўсадиган қақроқ сойликни[21] суғорар.

¹⁹Миср ҳувиллаб, Эдом[22] бўм — бўш саҳрога айланар. Оҳ, Яҳудо халқига зулм ўтказди улар, Бегуноҳ одамларнинг қонин тўкдилар.

²⁰Мен албатта жазолайман уларни! Асло оқламайман жиноятчиларни![23] Яҳудо эса абадий яшар, Қуддус авлодлар оша барқарор бўлар. Мен, Эгангиз, Сионда қурганман маскан.”