Read Муқаддас Китоб Uzbek Амос 1 Bible Online

Амос 1 - Муқаддас Китоб Uzbek bible

Амос 1

¹Ушбу китобда Тахувада[2] чорвадор бўлган Амоснинг сўзлари баён этилган. Исроил[3] тўғрисидаги бу сўзлар Амосга зилзиладан[4] икки йил аввал ваҳий орқали аён бўлган эди. Ўша даврда Яҳудо юртида шоҳ Уззиё, Исроил юртида эса Ёҳўш[5] ўғли шоҳ Ёрубом[6] ҳукмронлик қилаётган эдилар.

²Амос шундай деди: “Эгамиз Қуддусдан туриб ҳайқиради, Сиондан[7] гулдурос овози янграйди! Чўпонларнинг яйловлари қуриб қолади[8], Кармил[9] чўққисидаги ўтлар хазон бўлади.”

³Эгамиз шундай демоқда: “Дамашқ[10] аҳолиси гуноҳ устига гуноҳ қилди! Мен уларни жазосиз қолдирмайман, Ахир, улар Гилад аҳолисини темир тишли хўптир билан янчди[11].

⁴Шундай экан, Мен шоҳ Хазайилнинг саройига олов ёғдираман, Олов Банҳададнинг[12] қалъаларини ёндириб юборади.

⁵Мен Дамашқ дарвозаларининг тамбаларини синдираман. «Қабиҳлик[13] водийси»нинг ҳукмдорини йўқ қиламан, Байт — Эденда[14] салтанат ҳассасини[15] тутган зотни ҳалок қиламан. Орам халқи асирликка тушади, Хир юртига[16] олиб кетилади.” Эгамизнинг каломи шудир.

⁶Эгамиз шундай демоқда: “Ғазо[17] аҳолиси гуноҳ устига гуноҳ қилди! Мен уларни жазосиз қолдирмайман, Ахир, улар халқимнинг қишлоқларидаги аҳолисини Асирликка олиб, Эдом халқига қул қилиб сотдилар.

⁷Шундай экан, Мен Ғазо деворига олов ёғдираман, Олов Ғазо қалъаларини куйдириб ташлайди.

⁸Мен Ашдод шаҳрининг ҳукмдорини[18] йўқ қиламан, Ашқалонда салтанат ҳассасини тутган зотни ҳалок қиламан. Эхрон шаҳрига қарши қўл кўтараман, Омон қолган Филистларни қириб ташлайман!” Эгамиз Раббийнинг каломи шудир.

⁹Эгамиз шундай демоқда: “Тир[19] аҳолиси гуноҳ устига гуноҳ қилди! Мен уларни жазосиз қолдирмайман. Ахир, улар биродарлик иттифоқини унутиб, Халқимнинг қишлоқларидаги аҳолисини Эдомликларга қул қилиб сотдилар.

¹⁰Шундай экан, Мен Тир деворига олов ёғдираман, Олов Тир қалъаларини куйдириб ташлайди.”

¹¹Эгамиз шундай демоқда: “Эдом[20] аҳолиси гуноҳ устига гуноҳ қилди! Мен уларни жазосиз қолдирмайман. Ахир, улар қардоши Исроил халқига[21] раҳм қилмадилар. Уларни қилич билан таъқиб қилиб[22], Қаҳрини чексиз сочдилар, Ғазабидан ҳеч тушмадилар.

¹²Шундай экан, Мен Темон шаҳрига олов ёғдираман, Бозрах[23] қалъаларини олов куйдириб ташлайди.”

¹³Эгамиз шундай демоқда: “Оммон[24] халқи гуноҳ устига гуноҳ қилди, Мен уларни жазосиз қолдирмайман. Ахир, улар ҳудудини кенгайтириш учун Гиладга ҳужум қилдилар, Ўшанда ҳомиладор аёлларнинг қоринларини ёрдилар.

¹⁴Шундай экан, Мен Рабба шаҳрининг[25] деворига ўт қўяман, Олов Рабба қалъаларини куйдириб ташлайди. Ўша куни жангдаги ҳайқириқлар фалакни тутади, Жанг бўрон каби авж олади.

¹⁵Оммон шоҳи сургун қилинади, У билан бирга мулозимлар ҳам олиб кетилади.” Эгамизнинг каломи шудир.