Read Муқаддас Китоб Uzbek Амос 7 Bible Online

Амос 7 - Муқаддас Китоб Uzbek bible

Амос 7

¹Эгамиз Раббий менга шундай ваҳий кўрсатди: деҳқонлар шоҳ саройи учун буғдой ўриб олганларидан кейин, иккинчи экинлар униб чиқа бошлабди[78]. Шу пайтда Эгамиз гала — гала чигирткаларни[79] пайдо қилди.

²Чигирткалар ер юзида кўкариб турган ҳамма нарсани еб битиришибди. Шунда мен ёлвордим: “Эй Эгам Раббий, илтижо қиламан, гуноҳимиздан ўтгин! Ёқуб насли[80] бунга бардош бера олармикин?! Ўзи кичкина бир халқ бўлса!”

³Шунда Эгамиз шахтидан қайтди: “Бундай қилмайман”, деб менга айтди.

⁴Эгамиз менга яна бир ваҳий кўрсатди: Эгамиз Раббий халқини олов билан[81] жазоламоқчи бўлибди. Олов буюк денгизни[82] ямлабди, кейин юртни ёндира бошлабди.

⁵Шунда мен ёлвордим: “Эй Эгам Раббий, ўтинаман, бас қилгин! Ёқуб насли бунга бардош бера олармикин?! Ўзи кичкина бир халқ бўлса!”

⁶Шунда Эгамиз шахтидан қайтди. Эгамиз Раббий: “Хўп, бундай ҳам қилмайман”, деб менга айтди.

⁷Мен яна бир ваҳий кўрдим: шоқул[83] ёрдамида қурилган деворнинг олдида Раббий турган экан. У деворнинг тўғри ёки қийшиқлигини шоқул билан текшираётган эди.

⁸Эгамиз мендан: — Нимани кўряпсан, Амос? — деб сўради. — Шоқулни, — деб жавоб бердим мен. Сўнг Раббий шундай деди: “Қара, Мен шоқул ёрдамида Халқим Исроилни текшираман. Энди уларга шафқат қилмайман.

⁹Исҳоқ наслининг[84] саждагоҳлари[85] вайрон бўлади, Ҳа, Исроилнинг қадамжолари йўқ қилинади, Мен шоҳ Ёрубом[86] хонадонига қилич билан ҳужум қиламан[87].”

¹⁰Байтилдаги[88] руҳоний Эмозиё Исроил шоҳи Ёрубомга хабар юбориб, шундай деди: — Амос Исроил халқи орасида сизга қарши фитна уюштирмоқда. Унинг бу сўзларини халқимиз кўтара олмайди.

¹¹Амос шундай деб айтиб юрибди: “Ёрубом қиличдан ҳалок бўлади, Исроил халқи ўз юртидан албатта сургун қилинади.”

¹²Эмозиё Амоснинг ўзига эса шундай деди: — Эй валий, бу ердан чиқиб кет! Яҳудо юртига бор. Нонингни ўша ердан топиб егин. Башоратларингни ҳам ўша ерда айт.

¹³Аммо Байтилда қайта башорат қила кўрма, чунки бу шоҳнинг қутлуқ жойидир, шоҳлигимизнинг саждагоҳидир.

¹⁴Амос эса Эмозиёга шундай жавоб берди: — Менинг машғулотим пайғамбарлик эмас, пайғамбарларга шогирд ҳам тушмаганман. Мен бир чорвадор эдим, шикамора — анжир дарахтларини[89] ҳам парвариш қилардим.

¹⁵Бир куни сурувни ҳайдаб кетаётганимда Эгамиз мени чақириб: “Бор, халқим Исроилга башорат қил”, деб айтди.

¹⁶Эй Эмозиё, энди Эгамизнинг сўзларини эшит! Сен менга: “Исроил ҳақида башорат қилма, Исҳоқ хонадонига[90] қарши гап гапирма”, деб айтяпсан.

¹⁷Шу сабабдан Эгамиз шундай демоқда: “Сенинг хотининг шаҳарда фоҳишалик қилади, Ўғил — қизларинг қиличдан ҳалок бўлади. Еринг бошқаларга бўлиб берилади. Ўзинг эса ҳаром бир юртда ўласан. Исроил халқи ўз юртидан албатта сургун қилинади.”