Read Муқаддас Китоб Uzbek Амос 8 Bible Online

Амос 8 - Муқаддас Китоб Uzbek bible

Амос 8

¹Эгамиз Раббий менга яна ваҳий кўрсатди: бир сават етилиб пишган мевалар бор экан.

²Эгамиз мендан: — Амос, нимани кўряпсан? — деб сўради. — Бир сават етилган мевани, — деб жавоб бердим мен. Сўнг Эгамиз менга шундай деди: “Халқим Исроил ҳам жазо учун етилиб турибди. Энди Мен уларга шафқат қилмайман.

³Ўша куни Маъбаддаги ашулалар марсияга айланади, — деб айтмоқда Эгамиз Раббий. — Ҳамма жойда жасадлар ётади. Сукунат босган!”

⁴Эй йўқсилларни эзадиганлар, қулоқ солинглар! Эй юртдаги камбағалларни йўқ қилганлар, эшитинглар!

⁵Сизлар шундай айтасизлар: “Янги ой шодиёнаси тезроқ тамом бўла қолса — ю, Донни сотсак. Шаббат куни[91] тезроқ ўтса — ю, Буғдойни бозорга олиб чиқсак. Шунда биз оғирлигини камайтириб, Нархини оширамиз, Тарозидан уриб, одамларни алдаймиз.

⁶Буғдой чиқитларини ҳам сотиб юборамиз. Йўқсилни бир жуфт чориққа сотиб оламиз, Камбағални кумушга харид қиламиз.”

⁷Ёқуб наслининг такаббурлигини кўриб, Эгамиз шундай деб онт ичди[92]: “Уларнинг қилмишларини Мен ҳеч қачон унутмайман, Уларни албатта жазолайман.

⁸Шу сабабдан ер титрайди! Ер юзида яшовчи ҳар бир мавжудот аза тутади! Бутун ер юзи дарё тўлқинларидай ларзага келади, Ҳа, Нил сувларидай кўтарилиб, пастга тушади[93].”

⁹Эгамиз Раббий демоқда: “Эй Исроил халқи, Ўша куни шундай қиламанки, Қуёш туш пайтида ботади, Куппа — кундузи ер юзини қоронғилик қоплайди.

¹⁰Байрамларингиз мотамга айланади, Ҳамма ашулаларингиз марсия бўлади. Сизлар ҳаммаларингиз қайғудан қанорга ўранасиз, Аза тутганингиздан сочингизни қирдирасиз[94]. Ёлғиз ўғлидан жудо бўлган ота — онага ўхшаб қоласиз. Ўша кун охирига қадар аччиқ кулфатдай бўлади.”

¹¹Эгамиз Раббий демоқда: “Шундай кунлар келадики, Мен юртга очарчилик юбораман. Одамлар нон билан сувни эмас, Мен, Эгангизнинг сўзини қўмсаб, оч қолишади.

¹²Улар Менинг сўзимни эшитмоқчи бўлиб, Бир денгиздан бошқа денгизгача оёғини судраб боришади, Шимолдан шарққа йўл олишади. У ёқдан — бу ёққа юриб, сарсон бўлишади — ю, Аммо Мен, Эгангизнинг сўзини эшита олишмайди.

¹³Ўша куни гўзал қизлару бақувват йигитлар Ташналикдан ҳушидан кетадилар.

¹⁴Ахир, улар Самариянинг шарманда маъбудаси[95] номи билан Қасам ичиб юрибдилар, «Эй Дан шаҳри[96], худойинг шоҳид», деб айтиб юрибдилар, «Бершебага[97] олиб борадиган зиёрат йўли ҳақи», деб юрибдилар. Аммо улар йиқилиб тушадилар, қайтиб турмайдилар.”