Read Муқаддас Китоб Uzbek Саҳрода 1 Bible Online

Саҳрода 1 - Муқаддас Китоб Uzbek bible

Саҳрода 1

¹Исроил халқи Миср юртини тарк этиб[1], Синай саҳросига келганига икки йилу икки ой бўлди. Иккинчи ойнинг[2] биринчи кунида Эгамиз Учрашув чодирида Мусога шундай деди:

²“Сен ва Ҳорун жамики Исроил халқини уруғи, хонадони бўйича санаб чиқинглар. Урушга яроқли бўлган йигирма ва ундан юқори ёшдаги ҳамма эркакларни гуруҳларга бўлиб, номма — ном рўйхатини тузинглар.

⁴Ҳар бир қабиладан биттадан уруғбоши сизларга ёрдам берсин.

⁵Сизларга ёрдам берадиган уруғбошиларнинг исми қуйидагичадир: Рубен қабиласидан — Шадувор ўғли Элизур.

⁶Шимўн қабиласидан — Зуришадай ўғли Шалумиёл.

⁷Яҳудо қабиласидан — Оминадав ўғли Нахшўн.

⁸Иссахор қабиласидан — Зувор ўғли Натанил.

⁹Забулун қабиласидан — Халон ўғли Элиёб.

¹⁰Юсуф ўғли Эфрайим қабиласидан — Омиҳуд ўғли Элишама. Юсуф ўғли Манаше қабиласидан — Падозур ўғли Гамалиёл.

¹¹Бенямин қабиласидан — Гидўнах ўғли Авидон.

¹²Дан қабиласидан — Омишадай ўғли Охазар.

¹³Ошер қабиласидан — Охрон ўғли Пахиёл.

¹⁴Гад қабиласидан — Дувел ўғли Элиасаф.

¹⁵Нафтали қабиласидан — Энан ўғли Охир.”

¹⁶Жамоа орасидан танланган ана шу уруғбошилар Исроил қабилаларининг йўлбошчилари эди.

¹⁷Мусо ва Ҳорун уруғбошилар билан биргаликда иккинчи ойнинг[3] биринчи кунида бутун жамоани йиғишди. Улар Исроил халқининг барча уруғларини ва хонадонларини аниқлаб чиқишди. Сўнг Мусога Эгамиз амр этгандай, жамоанинг йигирма ва ундан юқори ёшдаги ҳамма эркакларини номма — ном алоҳида рўйхатга олишди. Шу тариқа Мусо Синай саҳросида Исроил халқини санаб чиқди.

²⁰Уруғи ва хонадони бўйича номма — ном рўйхатга олинган, йигирма ва ундан юқори ёшдаги урушга яроқли эркакларнинг сони[4] қуйидагича эди: Исроилнинг[5] тўнғич ўғли Рубен қабиласидан — 46.500 нафар одам,

²²Шимўн қабиласидан — 59.300 нафар одам,

²⁴Гад қабиласидан — 45.650 нафар одам,

²⁶Яҳудо қабиласидан — 74.600 нафар одам,

²⁸Иссахор қабиласидан — 54.400 нафар одам,

³⁰Забулун қабиласидан — 57.400 нафар одам,

³²Юсуф ўғли Эфрайим қабиласидан — 40.500 нафар одам,

³⁴Юсуф ўғли Манаше қабиласидан — 32.200 нафар одам,

³⁶Бенямин қабиласидан — 35.400 нафар одам,

³⁸Дан қабиласидан — 62.700 нафар одам,

⁴⁰Ошер қабиласидан — 41.500 нафар одам,

⁴²Нафтали қабиласидан — 53.400 нафар одам.

⁴⁴Мусо, Ҳорун ва Исроил халқининг ўн икки уруғбошиси санаб чиққан одамлар ана шулар эдилар. Уларнинг ҳаммаси ота — боболарининг насли бўйича рўйхатга олинди.

⁴⁵Хуллас, Исроил халқининг йигирма ва ундан юқори ёшдаги урушга яроқли ҳамма эркаклари хонадонлари бўйича саналганда,

⁴⁶603.550 та чиқди.

⁴⁷Леви қабиласи эса бу рўйхатга киритилмаган эди,

⁴⁸чунки Мусога Эгамиз шундай деганди:

⁴⁹“Леви қабиласини рўйхатга киритма, уларни Исроил халқи билан бирга санама.

⁵⁰Левиларга Муқаддас аҳд чодирини[6], унинг ҳамма ашёларини ва Чодирга тегишли бўлган барча нарсаларни топшир. Йўлга чиққанларингизда, левилар Чодирни ва ундаги ҳамма ашёларни кўтариб юрсинлар. Чодирни асраб — авайлаб, унинг ёнига ўз чодирларини тиксинлар.

⁵¹Ҳар сафар Муқаддас чодир кўчирилганда, левилар Чодирни йиғишсин. Қароргоҳ қурганингизда эса Чодирни яна ўрнатишсин. Чодирнинг яқинига борган бошқа ҳар қандай одам учун жазо ўлимдир.

⁵²Қолган Исроил қабилалари ўз қароргоҳларида гуруҳ — гуруҳ бўлиб жойлашсин.

⁵³Исроил халқи Менинг қаҳр — ғазабимга учрамаслиги учун, левилар ўз чодирларини Муқаддас аҳд чодири атрофида ўрнатиб, ўша ерда Чодирни қўриқлашсин.”

⁵⁴Мусога Эгамиз қандай амр этган бўлса, Исроил халқи шуни қилди.