Read Муқаддас Китоб Uzbek Саҳрода 13 Bible Online

Саҳрода 13 - Муқаддас Китоб Uzbek bible

Саҳрода 13

¹Шундан сўнг халқ Хазерўтдан йўлга чиқиб, Порон чўлига[64] келиб қароргоҳ қурди.

²Эгамиз Мусога деди:

³“Мен Исроил халқига бераётган Канъон юртига айғоқчилар юбор. Ҳар бир қабиладан биттадан йўлбошчини жўнат.”

⁴Мусо, Эгамизнинг амрига мувофиқ, қабила йўлбошчиларини Порон чўлидан Канъон юртига жўнатди.

⁵Уларнинг исми қуйидагичадир: Рубен қабиласидан — Заккур ўғли Шаммува.

⁶Шимўн қабиласидан — Хўри ўғли Шофот.

⁷Яҳудо қабиласидан — Яфунах ўғли Холиб.

⁸Иссахор қабиласидан — Юсуф ўғли Йихал.

⁹Эфрайим қабиласидан — Нун ўғли Хўшея[65].

¹⁰Бенямин қабиласидан — Рофу ўғли Палти.

¹¹Забулун қабиласидан — Сўди ўғли Гаддиёл.

¹²Юсуф қабиласидан, яъни Манаше қабиласидан — Сусих ўғли Гадди.

¹³Дан қабиласидан — Гамали ўғли Омиёл.

¹⁴Ошер қабиласидан — Микойил ўғли Сатур.

¹⁵Нафтали қабиласидан — Вофси ўғли Нахби.

¹⁶Гад қабиласидан — Мохи ўғли Гувал.

¹⁷Мусо Канъон юртига айғоқчиликка юборган одамларнинг исми ана шулардир. Мусо Нун ўғли Хўшеянинг исмини ўзгартириб, уни Ёшуа деб атади[66].

¹⁸Мусо уларни Канъон юртига айғоқчиликка юборар экан, шундай деди: “Шимолга қараб юринглар, Нагав чўлини[67] айланиб чиққанингиздан кейин, чўлдан шимолда жойлашган қирли ерларни ҳам кўриб чиқинглар.

¹⁹У ерлар қандай жой, у ерда яшаётган халқ кучлими ёки заифми, кўпми ёки озми,

²⁰юрти яхшими ёки ёмонми, шаҳарлари девор билан ўралганми ёки йўқми,

²¹ерлари унумдорми ёки камҳосилми, дарахтлари борми ёки йўқми, билиб келинглар. Ўша юртнинг меваларидан олиб келишнинг иложини қилинглар.” Узум мавсуми энди бошланган эди.

²²Шундай қилиб, айғоқчилар шимолга қараб кетишди. Зин чўлидан бошлаб, Лево — Хомат[68] яқинидаги Рехоб шаҳригача бўлган ҳамма жойларни кўздан кечириб чиқишди.

²³Даставвал улар Нагав чўлини кесиб ўтиб, Хеврон шаҳрига[69] боришганди. Ўша ерда Оноқ авлодидан келиб чиққан[70] Охиман, Шешай ва Талмай уруғлари яшашарди. Хеврон Мисрдаги Зўван шаҳридан етти йил олдин қурилган эди.

²⁴У ердан айғоқчилар Эшкўл сойлигига бориб, бир бош узумни шохи билан қирқиб олишганди. Бу бош узумни икки киши ходага осиб кўтариб кетганди. Бундан ташқари, улар анор ва анжирлардан ҳам олишганди.

²⁵Айғоқчилар сойликдан бир бош узум қирқиб олганлари учун ўша сойликка Эшкўл[71] деб ном берилди.

²⁶Ниҳоят, улар юртни кўриб чиқиб, қирқинчи куни қайтишди.

²⁷Порон чўлидаги Кадешга[72] — Мусо, Ҳорун ва бутун Исроил жамоаси олдига келишди. Уларга кўрган — билганларини айтиб, ўша юртнинг меваларини кўрсатишди.

²⁸Улар Мусога шундай деб айтишди: — Сиз бизни юборган юртга бордик, у ерда чиндан ҳам сут ва асал оқиб ётибди[73]. Мана бу мевалар ўша ердан.

²⁹Лекин у ернинг халқлари кучли, шаҳарлари мустаҳкам ва ниҳоятда улкан экан. Биз у ерда ҳатто Оноқ авлодини[74] ҳам кўрдик!

³⁰Омолек халқи — Нагав чўлида, Хет, Ёбус ва Амор халқлари — қирларда, Канъон халқи эса Ўрта ер денгизи қирғоқларида ва Иордан дарёси бўйларида истиқомат қилишар экан.

³¹Холиб Мусонинг рўпарасида турган халқни тинчлантириб: — Бўла қолинглар, ўша юртга ҳужум қилиб, уни эгаллаб олайлик. Ўша юртни босиб олишга албатта кучимиз етади, — деди.

³²Лекин Холиб билан бирга борганлар: — У халққа бас кела олармидик?! Улар биздан кучлироқ — ку! — дейишди.

³³Шундай қилиб, улар ўзлари кўриб келган юрт тўғрисида Исроил халқи орасида бўлмағур миш — мишлар тарқата бошлашди: “Биз кўриб келган юрт у ерда яшашга борадиганларни ютиб юборар экан. Ўша юртдаги ҳамма одамлар дев қомат экан.

³⁴Биз у ерда ҳатто улкан паҳлавонлар[75] уруғидан бўлган Оноқ авлодини кўрдик. Уларнинг олдида ўзимизни худди чигирткадай ҳис қилдик. Ҳа, уларнинг назарида ҳам биз чигирткадай эдик.”