Read Муқаддас Китоб Uzbek Михо 1 Bible Online

Михо 1 - Муқаддас Китоб Uzbek bible

Михо 1

¹Яҳудо[2] шоҳлари Йўтом, Охоз ва Ҳизқиё ҳукмронлик қилган даврларда[3] Эгамиз Мўрашатлик[4] Михо пайғамбарга Ўз сўзини аён қилиб турди. Самария ва Қуддус[5] ҳақида Эгамиз айтган бу сўзлар Михо пайғамбарга ваҳий орқали аён бўларди.

²Қулоқ тутинг, эй халқлар! Қулоқ солинг, ер юзида яшовчилар! Эгамиз Раббий сизларга қарши гувоҳлик беради. Муқаддас Маъбадидан Раббий гапиради.

³Ана, Эгамиз Ўз масканидан чиқяпти, Тоғ чўққиларини босиб келяпти.

⁴Унинг оёғи остида эрийди тоғлар, Ёрилиб кетади даралар. Тоғлар оловда эриган мум каби бўлади, Тепаликдан оқиб тушган сувдай тўкилади.

⁵Ёқуб насли[6] итоатсизлик қилгани учун, Исроил гуноҳга ботиб кетгани учун Бу воқеалар содир бўлади. Ёқуб насли орасида итоатсизлик қилган ким? Пойтахт шаҳар Самария эмасми?! Бутпарастлар уяси[7] Яҳудонинг қаерида жойлашган? Қуддуснинг нақ ўзида эмасми?!

⁶Эгамиз шундай дейди: “Мен Самарияни вайрон қиламан. Уни ток экиладиган жойга айлантираман. Шаҳар деворларини йиқитаман, Девор тошларини водийга юмалатаман. Унинг пойдеворларини очиб ташлайман.

⁷Самариянинг бутлари парча — парча бўлади, Барча санамлари синдириб, ёндирилади. Фаҳш йўли билан келган бутларнинг қимматбаҳо безаклари Ўзга юрт фоҳишаларига[8] тўлов қилиб берилади.”

⁸Бундай мусибат дастидан йиғлаб, фарёд қиламан, Яланғоч, оёқ яланг юраман, Чиябўридай увиллаб, фиғон чекаман, Бўта[9] каби бўзлаб йиғлайман.

⁹Ахир, даво йўқ Самариянинг ярасига, Ёпишди Яҳудога ҳам у яра, Халқим дарвозаси — Қуддусга юқди.

¹⁰Гат аҳолиси билан бу ҳақда ҳасратлашманг[10], Улар олдида кўз ёшингизни тўкманг! Байт — Лафрога бориб, У ерда қайғудан тупроққа юмаланг![11]

¹¹Эй Шофир[12] аҳли, Сиз асирликка кетасиз, Яланғоч, шарманда бўлиб борасиз. Занон[13] халқи ташқарига чиқишга журъат этмайди. Байт — Эзел[14] аҳли мотам тутади, Энди улар сизга паноҳ бўлмайди.

¹²Морўт[15] аҳолиси мадад кутган эди, Аммо Эгамиз фалокат юборди. Бу фалокат ҳатто Қуддус дарвозаларига етди.

¹³Эй Лахиш[16] аҳли, Отларингизни жанг араваларига қўшинг! Сиз итоатсиз Исроил халқига тақлид қилдингиз, Қуддус аҳлини[17] илк бор гуноҳга бошладингиз![18]

¹⁴Шундай экан, эй Яҳудо халқи, Энди Мўрашат[19] билан хайрлашаверинг, Эсдалик совғаларингизни уларга тақдим қилинг[20]. Аттанг, Ахсиб[21] аҳли Исроил шоҳларига панд берди, Бера олмайдиган ёрдамни уларга ваъда қилди.

¹⁵Эй Моришо[22] аҳли, Эгамиз устингизга бир босқинчини юборади. Исроил йўлбошчилари Адуллам ғорига қочиб боришади.

¹⁶Суюкли фарзандларингиз учун нола қилинг, Сочингизни қирдиринг[23]. Калхатлар каби сийқа бош бўлинг, Ахир, болаларингиз[24] сургун қилинади.