Read Муқаддас Китоб Uzbek Михо 6 Bible Online

Михо 6 - Муқаддас Китоб Uzbek bible

Михо 6

¹Эгамизнинг сўзини эшитинг: “Қани, туринг! Тоғлар олдида айтинг даъвоингизни, Қирлар эшитсин сизнинг овозингизни.”

²Эй тоғлар, Эгамизнинг даъвосига қулоқ тутинг, Заминнинг мангу пойдеворлари[45], сиз ҳам эшитинг! Эгамиз Ўз халқи билан даъволашади, Халқи Исроил билан У баҳслашади.

³Эгамиз демоқда: “Эй халқим, сенга Мен нима қилдим?! Сенга тушдими бирор оғирлигим?! Қани, жавоб бергин — чи Менга!

⁴Мен сизларни Миср юртидан олиб чиққан эдим — ку, У ердаги қулликдан халос этган эдим — ку. Олдингизга юборгандим йўлбошчиларни — Мусо, Ҳорун ва Марямни.

⁵Эй халқим, наҳот эсламасангиз Мўаб шоҳи Болоқнинг ёвуз ниятини, Бавўр ўғли Баломнинг унга берган жавобини?! Шитимдан Гилгалга қилган сафарингизда ҳам Нималар юз берганини бир эсланг[46]. Бу воқеаларни эсга олсангиз, Мен, Эгангиз, сизларни қутқармоқчи бўлиб, Не — не ишлар қилганимни кўрасиз!”

⁶Юксалган Худога сажда қилганимда, Нима олиб борай Эгамизнинг ҳузурига?! Унга атаб қурбонликлар куйдирсаммикан?! Бир ёшли бузоқларни назр қилсаммикан?!

⁷Унга атаб минглаб қўчқорларни сўйсам, Зайтун мойин дарё — дарё қилиб оқизсам Эгамиз мендан мамнун бўлармикан?! Итоатсизлигим эвазига тўнғич ўғлимни берайми?! Гуноҳим эвазига ўз фарзандимни қурбон қилайми?!

⁸Эй инсон, нима яхши эканлигини Эгамиз сенга аён қилди. Шудир Унинг сендан қилган талаби: Адолатли иш тутгин, Меҳр — шафқат қилишдан завқ олгин, Камтар бўлиб, Худонинг йўлидан юргин.

⁹Худодан қўрқиш — донолик, ахир! Эгамиз Қуддус аҳлига хитоб қилар: “Яхшилаб қулоқ солинг! Мен сизларни ҳадемай жазолайман![47]

¹⁰Эй фосиқлар, ҳаром бойлигингизга қандай кўз юмай?! Тарозидан уриб йиққан давлатингизни қандай унутай?! Бундай бойликдан жирканаман, ахир!

¹¹Нотўғри тарозини ишлатган одамни қандай оқлайин?! Сохта қадоқ тошлардан фойдаланган кишига қандай чидайин?!

¹²Эй Қуддус бойлари, сизлар зўравонлик қиляпсиз, Эй шаҳар одамлари, сизлар алдаяпсиз. Ёлғондан бошқани билмас тилларингиз.

¹³Шунинг учун Мен сизларга қақшатқич зарба бераман, Гуноҳларингиз учун сизларни хароб қиламан.

¹⁴Сизлар ейсиз, лекин тўймайсиз, Қорнингиз доим оч бўлади. Нарса йиғасиз — у, сақлай олмайсиз, Йиққанларингизни урушда нобуд қиламан.

¹⁵Сиз экасиз, аммо ўриб олмайсиз. Мой оласиз, аммо ундан фойдаланмайсиз. Узум эзасиз[48], аммо шаробидан ичмайсиз.

¹⁶Ахир, сизлар шоҳ Омрининг одатларини ташламаяпсиз. Ахаб[49] хонадонининг барча қилмишларига тақлид қиляпсиз, Уларнинг йўлини тутяпсиз. Шунинг учун Мен сизларни хароб қиламан. Сизни кўрганлар сизлардан ҳазар қилади, Барча халқлар сизларни ҳақорат этади[50].”