Read Муқаддас Китоб Uzbek Нохум 1 Bible Online

Нохум 1 - Муқаддас Китоб Uzbek bible

Нохум 1

¹Найнаво шаҳри[4] ҳақида башорат. Бу китобда Элқўшлик[5] Нохумга келган ваҳий баён қилинган.

²Эгамиз рашкчи[6], қасоскор Худодир, Эгамиз қасоскор, дарғазабдир. Ғанимларидан Эгамиз қасос олар, Душманларидан ғазабланиб юрар.

³Эгамизнинг жаҳли тез эмас, Унинг кучи буюкдир, Айбдорни Эгамиз асло оқламас! Юрган йўли қуюну бўрон бўлар. Оёғи остидан чангдай Кўтарилар қора булутлар.

⁴У денгизга дўқ уриб, уни қуритар, Барча дарёларни қақратиб юборар. Башан ва Кармил яйловлари хазон бўлади, Лубнон[7] гуллари сўлиб қолади.

⁵Унинг олдида силкинар тоғлар, Парчаланиб кетар адиру қирлар. Ҳузурида замин тебранар, Бутун жаҳон ва ундаги мавжудот қалтирар.

⁶Унинг қаҳрига ким бардош бергай?! Алангали ғазабидан ким омон қолгай?! Унинг ғазаби оловдай ёйилар, Унинг олдида қоялар чилпарчин бўлар.

⁷Эгамиз яхшидир, Кулфат кунида қўрғондир У, Худода паноҳ топганларни сақлайди У.

⁸Тошқин сел билан Найнавони вайрон қилар, Ёвларининг пайига тушиб, зулматга ҳайдар.

⁹Эй Найнаво, нечун Эгамизга қарши фитна уюштирасан?! Ахир, У бир уриб сени қириб ташлайди, Иккинчи уришига ҳожат бўлмайди.

¹⁰Чирмашган тикану қуруқ хас — чўп каби Сизлар ҳам, эй майхўрлар, ёндириб ташланасиз!

¹¹Эй Найнаво, қабиҳ шоҳ сендан чиқди, Эгамизга қарши у фитна — фасод қилди.

¹²Эгамиз эса шундай айтур: “Оссурияликлар[8] кучли ва беҳисоб бўлсалар — да, Улар қирилиб, йўқ бўладилар. Эй халқим, бошингга кулфат солдим! Энди бундай кулфат солмайман зинҳор!

¹³Сени Оссурия бўйинтуруғидан озод қиламан, Кишанларингни[9] узиб ташлайман.”

¹⁴Сен ҳақингда, эй Оссурия, Эгамиз шундай амр этар: “Сенинг номинг дунёдан ўчар. Йўқ қиламан худоларинг уйидаги қуйма ва ўйма бутларни, Ярамас хулқ — атворинг учун ҳозирлайман қабрингни.”

¹⁵Қаранг! Хушхабар келтирувчи кимса, Тоғлар оша шошиб келади бу ёққа. Тинчликни эълон қилади У сизга! Эй Яҳудо халқи[10], нишонлагин байрамларингни, Олиб кел онт ичиб атаган назрларингни. Юртингга тажовуз қилмас энди қабиҳлар, Зеро, тамомила йўқ бўлди улар.