Read Муқаддас Китоб Uzbek Хабаққуқ 3 Bible Online

Хабаққуқ 3 - Муқаддас Китоб Uzbek bible

Хабаққуқ 3

¹Хабаққуқ пайғамбарнинг куйга солинган ибодати қуйидагича:

²“Эй Эгам, мен Сенинг шуҳратинг ҳақида эшитдим. Қилган буюк ишларингдан ҳайратда қолдим. Эй Эгам, бизнинг давримизда ҳам шундай ишларингни қилгин. Одамлар Сенинг нималарга қодир эканлигингни билиб қўйишсин. Ғазабланганингда меҳр — шафқатни эсдан чиқармагин.

³Худо келади Эдом юртидан[14], Муқаддас Худо келади Порон қирларидан[15]. Унинг улуғворлиги кўкни порлатар, Ҳамду саноларига бутун дунё тўлар.

⁴Улуғворлиги чақмоқдай чақнар, Нур сочилар Унинг қўлидан — Куч яширинган билагидан.

⁵Унинг олдида юради ўлат, Унинг кетидан эргашади офат.

⁶Тўхтаганда ер силкинади, Назар солганда халқларни титроқ босади. У юрган кўҳна йўллар бўйидаги Мангу тоғлар ўпирилиб тушади, Абадий қирлар чўкиб паст бўлади.

⁷Кўшон халқининг қўрққанини мен кўряпман, Мидиён[16] халқининг дағ — дағ қалтираганини кўряпман.

⁸Эй Эгам, наҳотки ғазаблансанг дарёлардан?! Наҳот Сенинг жаҳлинг чиқса ирмоқлардан?! Ёки Сенинг қасдинг бормиди денгиздан?![17] Шунинг учун отларингни чоптирасанми, Зафарли жанг араваларингга миниб оласанми?!

⁹Сен ғилофдан чиқарасан камонингни, Ўқларга тўлдирасан ўқдонингни. Дарёлар билан ёрасан ер юзини.

¹⁰Буни кўрганда тоғларни дард тутар, Шиддатли оқим кўпириб оқар. Денгиз тубидан нидо янграр, Денгиз тўлқинлари кўкка интилар.

¹¹Сенинг ўқларинг учиб чақнайди, Найзаларинг ялт этиб ёнади. Бундан қуёшу ой ўз жойида қотиб туради[18].

¹²Сен жаҳл устида босиб ўтарсан ер юзини, Ғазабга миниб оёқ ости қиларсан халқларни.

¹³Қутқариш учун келасан Ўз халқингни, Ўз танлаганинг орқали озод қилиш учун уларни[19]. Фосиқ халқнинг йўлбошчисини урасан, Бошдан — оёқ уни шилиб ташлайсан.

¹⁴Ана, ғанимларимиз қуюн каби келяптилар, Бизни ҳар ёққа тарқатиб юбормоқчи бўляптилар. Ўз уясида ўлжасини ғажиган йиртқич ҳайвондай, Осон овидан ўзида йўқ севиняптилар. Сен эса уларнинг йўлбошчисини ўз ўқлари билан ҳалок қиласан.

¹⁵Отларинг туёқлари денгизни[20] босиб эзади, Баҳайбат сувларни бир жойга йиғиб қўяди.”

¹⁶Мен буларни[21] эшитдим. Шунда увушди менинг юрагим, Титрай бошлади лабларим, Мадорим қолмай, қалтиради тиззаларим. Аммо мен сабр — тоқат қиламан, Босқинчиларимиз бошига тушадиган кулфат кунини кутаман[22].

¹⁷Борди — ю, анжир дарахти гулламай қолса, Узум токлари мева тугмаса, Зайтун дарахтлари ҳосил бермаса, Даладаги экинлар унмай қолса, Қўраларда қўйлар қолмаса, Оғилхоналар бўм — бўш бўлса,

¹⁸Шунда ҳам Эгамдан шод бўларман, Нажоткорим Худодан қувонарман.

¹⁹Эгам Раббий менинг қудратимдир. У оёқларимни кийик оёғидай қилади, Чўққилар узра мени бехатар юргизади. Ижрочилар раҳбарига. Торли асбоблар жўрлигида.