Read Муқаддас Китоб Uzbek Закариё 9 Bible Online

Закариё 9 - Муқаддас Китоб Uzbek bible

Закариё 9

¹Башорат. Эгамизнинг сўзи Хадрах юртига[50] қаршидир. Дамашқ шаҳрига қаратилгандир. Эгамиз барча Исроил қабилаларини кузатиб тургандай, Бутун инсониятни ҳам кузатади[51].

²Хадрахга чегарадош бўлган Хомат[52] ҳам, Доноларга тўла бўлган Тир ва Сидон[53] ҳам Эгамизнинг кўзи остидадир[54].

³Тир шаҳри ўзига қалъа қуриб олган, Шунчалик кўп кумуш ва олтин йиққанки, Улар кўчадаги чанг ва лойдайдир.

⁴Лекин энди Раббий уларнинг мулкини тортиб олади, Бойликларини денгизга улоқтиради. Шаҳарнинг ўзи эса оловга ем бўлади.

⁵Ашқалон шаҳри[55] буни кўриб, қўрқувга тушади, Ғазо ҳам даҳшатга тушиб қалтирайди, Умиди пучга чиққан Эхрон ҳам шу аҳволга тушади. Ғазонинг шоҳи ҳалок бўлади, Ашқалонда эса ҳеч бир зот қолмайди.

⁶Эгамиз шундай дейди: “Ашдодда насли бузилган халқлар яшайди. Ҳа, Мен Филистларнинг такаббурлигига чек қўяман.

⁷Мен Филистларнинг оғзидаги қонли гўштни, Тишларидаги ҳаром овқатни[56] олиб ташлайман. Филистларнинг тирик қолганлари Менга тегишли бўлади, Улар Яҳудонинг авлодидай бўлиб қолади. Эхрон ҳам Ёбус халқидай[57] Ўз халқимнинг бир қисми бўлади.

⁸Босқинчилардан асрай деб Мен Ўзим уйимни қўриқлайман. Халқимнинг юртини ҳеч ким босиб ололмас, Ҳа, Мен ҳаммасини кўриб турибман.

⁹Хурсанд бўлиб, қувонинг, Эй Қуддус халқи! Шодлик ила ҳайқиринг, Эй Сион аҳолиси! Мана, шоҳингиз келяпти. У зафар қозонган ғолибдир. Шунга қарамай, Камтариндир шоҳингиз, У эшакнинг устида, Ҳа, эшакнинг боласини — Хўтикни миниб келяпти.

¹⁰Мен Эфрайимнинг[58] жанг араваларини йўқотаман, Қуддуснинг[59] жанг отларини тортиб оламан. Уруш камонлари ҳам йўқ қилинади, Шоҳингиз халқларга тинчлик келтиради. Мен бир денгиздан иккинчисига қадар, Фурот дарёсидан тортиб Ер юзининг тўрт томонига ҳукмронлик қиламан.

¹¹Мен сизлар билан қилган, Қурбонлик қони билан тасдиқланган аҳдим[60] туфайли, Асирларингизни сувсиз чуқурликдан озод қиламан.

¹²Эй умидвор асирлар, Ўз қалъангизга қайтинг. Бугун Мен айтяпман, Йўқотганларингизни икки баробар қилиб тиклайман.

¹³Мен Яҳудони Ўз камонимдек қайирдим, Эфрайимни[61] эса камоним ўқи қилдим. Эй Сион[62], Мен сенинг ўғилларингни Юнон[63] ўғилларига қарши қўзғатаман. Менинг қўлимда жангчининг қиличидай ўйнайсан.”

¹⁴Шундан кейин Эгамиз Ўз халқи узра зоҳир бўлади, Унинг ўқи яшиндай отилади. Эгамиз Раббий бурғуни чалиб, Жанубдан келган қуюнлар орасида ҳужум қилади.

¹⁵Сарвари Олам Ўз халқини ҳимоя қилади, Улар душманларини қириб, Ёв палахмонларини оёқ ости қилиб ташлайдилар. Қурбонлик сўйгандай ёв қонини тўкадилар, Қурбонгоҳ шохлари қонга белангандай, Улар душманларининг қонига беланадилар. Шаробу май билан ғалабани нишонлайдилар, Хурсандлигидан маст одамдай ҳайқирадилар.

¹⁶Ўша куни уларнинг Эгаси Худо Ўз халқини қутқаради. Ахир, улар Эгамизнинг сурувидир. Эгамизнинг юртида улар Тож гавҳарларидай порлайдилар.

¹⁷Унинг халқи қандай гўзал ва ажойиб! Янги шаробу донлар Йигит — қизларни бақувват қилар.