Read Муқаддас Китоб Uzbek Матто 1 Bible Online

Матто 1 - Муқаддас Китоб Uzbek bible

Матто 1

¹Иброҳим ва Довуд авлодидан бўлган Исо Масиҳнинг насабномаси[1] қуйидагича:

²Иброҳимдан Исҳоқ туғилди. Исҳоқдан Ёқуб туғилди. Ёқубдан Яҳудо ва унинг ака — укалари туғилдилар.

³Яҳудо ва Тамарадан Параз ва Зерах туғилдилар. Параздан Хазрон туғилди. Хазрондан Рам[2] туғилди.

⁴Рамдан Оминадав туғилди. Оминадавдан Нахшўн туғилди. Нахшўндан Салмўн туғилди.

⁵Салмўн ва Раҳобадан Бўаз туғилди. Бўаз ва Рутдан Обид туғилди. Обиддан Эссай туғилди.

⁶Эссайдан шоҳ Довуд туғилди. Довуд ва Уриёнинг собиқ хотинидан Сулаймон туғилди.

⁷Сулаймондан Рахабом туғилди. Рахабомдан Абиё туғилди. Абиёдан Осо туғилди.

⁸Осодан Ёҳушафат туғилди. Ёҳушафатдан Ёҳурам туғилди. Ёҳурамдан[3] Уззиё туғилди.

⁹Уззиёдан Йўтом туғилди. Йўтомдан Охоз туғилди. Охоздан Ҳизқиё туғилди.

¹⁰Ҳизқиёдан Манаше туғилди. Манашедан Омон туғилди. Омондан Йўшиё туғилди.

¹¹Исроил халқи Бобилга сургун қилинган даврда[4] Йўшиё Ёҳайихинни[5] ва бошқа ўғил фарзандларни кўрди[6].

¹²Исроил халқи Бобилга сургун қилингандан кейин[7] Ёҳайихиндан Шалтиёл туғилди. Шалтиёлдан Зарубабел[8] туғилди.

¹³Зарубабелдан Абиҳуд туғилди. Абиҳуддан Элияқим туғилди. Элияқимдан Аззур туғилди.

¹⁴Аззурдан Зодўх туғилди. Зодўхдан Охиём туғилди. Охиёмдан Элиҳуд туғилди.

¹⁵Элиҳуддан Элазар туғилди. Элазардан Маттон туғилди. Маттондан Ёқуб туғилди.

¹⁶Ёқубдан Марямнинг эри Юсуф туғилди. Марямдан эса Масиҳ деб аталган Исо туғилди.

¹⁷Шундай қилиб, Иброҳимдан Довудгача ҳаммаси бўлиб ўн тўрт насл, Довуддан то халқ Бобилга сургун қилингунгача ўн тўрт насл ва сургунлик давридан то Масиҳ туғилгунгача ўн тўрт наслдир[9].

¹⁸Исо Масиҳнинг туғилиши шундай содир бўлди: Исонинг онаси Марям Юсуфга унаштириб қўйилган эди. Уларнинг никоҳидан олдин Марям Муқаддас Руҳдан ҳомиладор эканини билди.

¹⁹Марямнинг бўлғуси эри Юсуф солиҳ одам бўлиб, Марямни шарманда қилишни истамай, бировга билдирмасдан фотиҳасини бузмоқчи бўлди.

²⁰Юсуф бу ҳақда ўйлаб юрганда, Эгамизнинг бир фариштаси унга тушида зоҳир бўлиб деди: “Эй Довуд ўғли Юсуф! Марямга уйланишдан қўрқма, чунки қорнидаги Бола Муқаддас Руҳдан пайдо бўлган.

²¹Марям ўғил туғади, Унинг исмини Исо[10] қўясан, чунки У Ўз халқини гуноҳлардан қутқаради.”

²²Бу барча воқеалар Эгамизнинг пайғамбар орқали айтган қуйидаги сўзлари бажо бўлиши учун юз берган эди:

²³“Қиз ҳомиладор бўлади, у ўғил туғади, Унинг исмини Иммануил деб қўйишади.”[11] Иммануил “Худо биз билан” деганидир.

²⁴Юсуф уйғониб кетди. Эгамизнинг фариштаси буюргандек, у Марямга уйланди.

²⁵Аммо Марям Ўғилни[12] туғмагунча Юсуф Марямга яқинлашмади. Бола туғилганда эса Юсуф Унга Исо деб исм қўйди.