Read Муқаддас Китоб Uzbek Матто 10 Bible Online

Матто 10 - Муқаддас Китоб Uzbek bible

Матто 10

¹Исо Ўзининг ўн икки ҳаворийсини ёнига чақириб, уларга ёвуз руҳларни қувиб чиқариш ва ҳар қандай дарду хасталикларни соғайтириш қудратини берди.

²Бу ўн икки ҳаворийнинг исмлари қуйидагичадир: биринчиси Бутрус деб аталган Шимўн, унинг укаси Эндрус, Забадиёнинг ўғиллари Ёқуб ва Юҳанно,

³Филип, Бартоломей, Тўма, солиқчи[92] Матто, Халфей ўғли Ёқуб, Таддеюс[93],

⁴ватанпарвар[94] Шимўн ва Исога хоинлик қилган Яҳудо Ишқариёт.

⁵Исо ўн икки ҳаворийни жўнатаётиб, уларга қуйидагича кўрсатмалар берди: “Ғайрияҳудийлар яшайдиган жойларга оёқ босманглар, Самарияликларнинг[95] шаҳарларига кирманглар.

⁶Аксинча, адашган қўйларга ўхшаган Исроил халқи олдига боринглар.

⁷Борганларингизда: «Осмон Шоҳлиги яқинлашди», деб эълон қилинглар.

⁸Хасталарни соғайтиринглар, ўликларни тирилтиринглар, тери касаллигига[96] чалинганларни покланглар, жинларни қувиб чиқаринглар. Текин олдингизлар, текин беринглар.

⁹Белбоғларингизга олтин, кумуш, ҳатто мис чақа ҳам қистириб олманглар.

¹⁰Йўлга тўрва ҳам, қўшимча кийим ҳам, чориқ ҳам, ҳасса ҳам олманглар. Чунки меҳнаткаш ўзининг нон — насибасига муносибдир.

¹¹Қайси шаҳар ёки қишлоққа кирсангиз, у ерда ўзингизга муносиб одамни топиб, кетгунингизча ўша одамнинг уйида туринглар.

¹²Уйга кирганингизда: «Хонадонингизда тинчлик — омонлик бўлсин», деб айтинглар.

¹³Агар у муносиб хонадон бўлса, сиз тилаган тинчлик ўша хонадонда қолади. Агарда номуносиб бўлса, тилаган тинчлигингиз ўзингизга қайтиб келади.

¹⁴Агар ким сизни қабул қилмаса ва сўзларингизга қулоқ солмаса, ўша уйдан ёки шаҳардан чиқиб кетаётганингизда оёқларингиздаги чангни қоқиб кетинглар[97].

¹⁵Сизга чинини айтаман: қиёмат кунида ўша шаҳарнинг ҳоли Садўм ва Ғамўра шаҳарларининг[98] ҳолидан ҳам баттар бўлади.

¹⁶Мен сизларни бўрилар орасига қўйлардай юборяпман. Сизлар илондай зийрак, каптардай оқ кўнгил бўлинглар.

¹⁷Инсонлардан эҳтиёт бўлинглар. Чунки улар сизларни маҳкамаларга топшириб, синагогаларда калтаклайдилар.

¹⁸Мен туфайли сизларни ҳокимлар ва шоҳлар ҳузурига олиб борадилар, сизлар эса уларга ва ғайрияҳудийларга Мен ҳақимдаги Хушхабарни айтасизлар.

¹⁹Сизларни маҳкамага олиб боришганда: «Қандай гапирамиз, нима айтамиз», деб хавотир олманглар. Нима айтишингиз ўша вақтда сизларга билдирилади.

²⁰Ўшанда сизлар эмас, балки Отангиз Худонинг Руҳи сизлар орқали гапиради.

²¹Ака укасини, ота боласини ўлимга топширади. Болалар ўз ота — оналарига қарши чиқиб, уларни ўлдиртирадилар.

²²Менинг номим туфайли ҳамма сизлардан нафратланади. Лекин охиригача бардош берган нажот топади.

²³Агар сизларни бир шаҳарда қувғин қилсалар, бошқасига қочиб боринглар. Сизларга чинини айтайин: сизлар Исроилнинг шаҳарларини айланиб чиқишга улгурмасингиздан, Инсон Ўғли келади.

²⁴Шогирд устозидан устун эмас, қул ҳам ўзининг хўжайинидан устун эмас.

²⁵Шогирд устозидай, қул хўжайинидай бўлса кифоя. Агар уй эгасини Баалзабул, яъни инс — жинслар ҳукмдори[99] деб атаган бўлишса, уй аҳлини ундан баттар ном билан аташади!

²⁶Шундай бўлса — да, одамлардан қўрқманглар! Ахир, ҳар қандай яширин нарса маълум бўлади, ҳар қандай сир очилади.

²⁷Сизга қоронғида гапираётганларимни ёруғда айтинглар. Қулоғингизга шивирлаб айтганларимни уйларнинг томи устидан бақириб, эълон қилинглар.

²⁸Танани ўлдириб, жонни ўлдира олмайдиганлардан қўрқманглар. Худодан қўрқинглар! Чунки У жонни ҳам, танани ҳам дўзахда ҳалок этишга қодир.

²⁹Иккита чумчуқ бир тангага[100] сотилади, шундай эмасми? Бироқ буларнинг биронтаси ҳам осмондаги Отангизнинг хоҳишисиз ерга тушмайди.

³⁰Сизларнинг эса ҳатто бошингиздаги ҳар бир тола сочингиз саналган.

³¹Шунинг учун қўрқманглар, сизлар кўплаб чумчуқлардан қадрлироқсизлар.

³²Ким Мени инсонлар олдида тан олса, Мен ҳам осмондаги Отамнинг олдида уни тан оламан.

³³Аммо ким инсонлар олдида Мени рад этса, Мен ҳам осмондаги Отамнинг олдида уни рад этаман.

³⁴Мени ер юзига тинчлик олиб келган, деб ўйламанглар. Мен тинчлик эмас, қилич олиб келганман.

³⁵Ўғилни отасидан, қизни онасидан, келинни қайнанасидан ажратиш учун келганман.

³⁶Инсоннинг душманлари ўз уйидагилари бўлади[101].

³⁷Кимки отасини ёки онасини Мендан ортиқ севса, Менга лойиқ эмас. Кимки ўғлини ёки қизини Мендан ортиқ севса, Менга лойиқ эмас.

³⁸Кимки ўз хочини олиб[102], ортимдан юрмаса, Менга лойиқ эмас.

³⁹Ўз жонини аямоқчи бўлган уни йўқотади. Мен учун жонини берган эса, уни асраб қолади.

⁴⁰Сизни қабул қилган одам Мени қабул қилган бўлади. Мени қабул қилган эса Мени Юборганни қабул қилган бўлади.

⁴¹Кимки пайғамбарни пайғамбар бўлгани учун қабул қилса, пайғамбарга муносиб мукофотни олади. Кимки солиҳ одамни солиҳ бўлгани учун қабул қилса, солиҳга муносиб мукофотни олади.

⁴²Агар сиз шогирдларимнинг энг кичигига у Менинг шогирдим бўлгани учун бир пиёла совуқ сув берсангиз, албатта мукофотингизни оласиз, деб сизга чинини айтаман.”