Read Муқаддас Китоб Uzbek Матто 19 Bible Online

Матто 19 - Муқаддас Китоб Uzbek bible

Матто 19

¹Исо бу гапларини тугатгандан кейин, Жалила ҳудудини тарк этди. У Иордан дарёсининг шарқ томонига, Яҳудия ўлкасининг нариги томонига борди.

²Бир талай оломон Исога эргашиб борган эди. Исо у ерда хасталарга шифо берди.

³Бир неча фарзийлар Исонинг олдига келдилар ва Уни синамоқчи бўлиб сўрадилар: — Қонунга кўра, эркак киши ҳар қандай сабаб билан ўз хотинидан ажралиши мумкинми?[179]

⁴Исо уларга шундай жавоб берди: — Наҳотки сизлар: азалда Яратувчи “одамларни эркагу аёл қилиб яратди”[180] деган сўзларни ўқимаган бўлсангизлар?

⁵“Шунинг учун эркак киши ота — онасидан бўлак бўлиб, хотинига боғланиб қолади, иккаласи бир тан бўладилар.”[181]

⁶Бунга кўра, улар энди икки эмас, балки бир тан ҳисобланадилар. Худо бирга қўшганни бандаси ажратмасин.

⁷Фарзийлар эса Исога дедилар: — Ундай бўлса, нима учун Мусо, эркак ўз хотинига талоқ хатини ёзиб бериб, жўнатиб юборсин, деб амр берган?[182]

⁸Исо уларга шундай жавоб берди: — Сизлар бағри тош бўлганларингиз учун Мусо хотинларингиз билан ажрашишга ижозат берган, аммо азалда бундай бўлмаган.

⁹Мен сизларга шуни айтайин: ким бевафоликдан бошқа сабаб туфайли ўз хотини билан ажрашиб, бошқасига уйланса, зино қилган бўлади[183].

¹⁰Шогирдлар Исога дедилар: — Агар эркакнинг хотинига нисбатан шундай мажбурияти бўлса, уйланмаган яхшироқ экан — да!

¹¹Исо эса шогирдларига: — Ҳа, бу таълимотимни ҳамма ҳам қабул қилавермайди, — деди. — Бу таълимотим Худо атаган одамларгагина тегишли.

¹²Баъзи эркакларнинг уйлана олмаслигига айрим сабаблар бор: баъзиларнинг эркаклиги туғма заифдир. Бошқалари эса одамлар томонидан бичилган. Яна бошқалари Осмон Шоҳлиги йўлида уйланишдан воз кечадилар. Бу таълимотни қабул қила оладиган қабул қилсин.

¹³Исо болаларимизга қўл қўйиб дуо қилсин деб, одамлар Исонинг олдига болаларни олиб келишди. Шогирдлар эса болаларни олиб келган одамларни койидилар.

¹⁴Аммо Исо деди: — Болаларга йўл беринглар, Менинг олдимга келишларига тўсқинлик қилманглар! Зеро, Осмон Шоҳлиги шундайларникидир.

¹⁵Исо болаларнинг бошига қўл қўйиб, дуо қилди, кейин Ўз йўлига кетди.

¹⁶Шу маҳал бир одам Исонинг ёнига келиб: — Устоз![184] Абадий ҳаётга эга бўлишим учун қандай яхши иш қилишим керак? — деб сўради.

¹⁷Исо унга деди: — Нега Мендан яхши иш тўғрисида сўраяпсан? Фақатгина Худо яхши — ку![185] Абадий ҳаётдан баҳраманд бўлишни истасанг, Худонинг амрларига риоя қилгин.

¹⁸— Қайсиларига? — деб сўради у. Исо деди: — “Қотиллик қилма. Зино қилма. Ўғрилик қилма. Ёлғон гувоҳлик берма.

¹⁹Ота — онангни ҳурмат қил. Ўзгани ўзингни севгандай севгин”[186] деган амрларга.

²⁰Йигит Унга деди: — Буларнинг ҳаммасига амал қилиб келаман. Яна нима қилишим керак?

²¹Исо йигитга айтди: — Агар комил бўлишни истасанг, бориб, мол — мулкингни сотиб, пулини камбағалларга тарқат. Шунда самода хазинанг бўлади. Кейин келиб, Менга эргашгин.

²²Йигит бу сўзларни эшитиб, ғамгин бўлиб қайтиб кетди, чунки унинг мол — мулки кўп эди.

²³Исо шогирдларига деди: — Сизга чинини айтайин: бой одамнинг Осмон Шоҳлигига кириши қийин бўлади.

²⁴Сизларга яна шуни айтай: бойнинг Худо Шоҳлигига киришидан кўра, туянинг игна тешигидан ўтиши осонроқдир.

²⁵Шогирдлар буни эшитиб, ғоят ажабланишди ва: — Ундай бўлса, ким нажот топа олар экан? — дейишди.

²⁶Исо уларга кўз тикиб деди: — Инсон учун бу имконсиздир, лекин Худо учун ҳамма нарсанинг имкони бор.

²⁷Шунда Бутрус деди: — Мана, биз уй — жойимизни ташлаб, Сизнинг орқангиздан эргашиб келдик. Бунинг эвазига нима оламиз?

²⁸Исо уларга шундай жавоб берди: “Сизга чинини айтайин: ҳамма нарса янгиланганда[187] ва Инсон Ўғли Ўзининг улуғвор тахтида ўтирганда, Менинг орқамдан эргашиб келган сизлар ҳам ўн иккита тахтга ўтириб, Исроилнинг ўн икки қабиласига ҳукмронлик қиласизлар.

²⁹Мен учун уй — жойини, ака — укаларини, опа — сингилларини, ота — онасини, болаларини ёки ер — мулкини ташлаб кетган ҳар бир киши булардан юз ҳисса ортиқроғини олиб, абадий ҳаётга эга бўлади.

³⁰Аммо биринчи бўлганларнинг кўплари охирги бўладилар, охиргилар эса биринчи бўладилар.