Read Муқаддас Китоб Uzbek Матто 3 Bible Online

Матто 3 - Муқаддас Китоб Uzbek bible

Матто 3

¹Ўша кунларда[25] Яҳё чўмдирувчи Яҳудия чўлида[26] ваъз қила бошлади.

²У одамларга: “Тавба қилинглар, чунки Осмон Шоҳлиги[27] яқинлашди!” деб айтарди.

³Яҳё тўғрисида Ишаё пайғамбар шундай деган эди: “Чўлда бир овоз янграмоқда: «Эгамизга йўл ҳозирланг, Унга тўғри йўл очинг!»”[28]

⁴Яҳё туя жунидан тўқилган кийим кийиб, чарм камар тақиб юрарди[29]. Унинг егулиги чигиртка ва ёввойи асал эди.

⁵Унинг олдига Қуддус шаҳри ва Яҳудия ўлкасининг қолган ҳамма жойларидан ҳамда Иордан дарёси атрофларидан одамлар келарди.

⁶Улар гуноҳларини эътироф этишар, Яҳё эса уларни Иордан сувига чўмдирарди.

⁷Фарзий[30] ва саддуқий[31] мазҳабларидан бўлган кўп одамлар сувга чўмдирилиш учун келаётганларини Яҳё кўриб, деди: “Ҳой, илонлар зоти! Бошингизга келаётган Худо ғазабидан қочиб қутуласиз, деб сизларга ким уқтирди?

⁸Тавбага яраша иш тутинглар!

⁹Ўзингизча: «Биз Иброҳим наслиданмиз», деб айтишни хаёлингизга ҳам келтирманглар! Сизларга шуни айтай: Худо мана бу тошлардан Иброҳимга авлод тиклашга қодир.

¹⁰Ҳозирданоқ дарахтлар илдизида болта ётибди. Яхши мева бермаган ҳар бир дарахт кесилиб, оловга ташланади.

¹¹Тавба қилганингизни кўрсатиш учун мен сизларни сувга чўмдиряпман. Лекин мендан ҳам қудратлироқ бўлган бир Зот ортимдан келмоқда. Мен Унинг чориқларини кўтариб юришга ҳам арзимайман. У сизларни Муқаддас Руҳга ва оловга[32] чўмдиради.

¹²Унинг паншахаси қўлида тайёр турибди. У Ўз хирмонини шопиради: буғдойини омборга тўплаб, сомонни эса сўнмас ўтда ёндириб юборади.”

¹³Шу орада Исо Жалила ҳудудидан Иордан дарёси бўйига борди. У Яҳё томонидан сувга чўмдирилмоқчи эди.

¹⁴Лекин Яҳё Исони тўхтатмоқчи бўлиб деди: — Аслида Сиз мени сувга чўмдиришингиз керак! Сиз бўлсангиз менинг олдимга келдингиз!

¹⁵Исо унга деди: — Келинг, бу сафар шундай бўла қолсин. Ахир, биз Худонинг иродасини тўла бажаришимиз зарур. Шундан кейин Яҳё рози бўлди.

¹⁶Исо сувга чўмдирилди. У сувдан чиққан заҳоти, осмон очилиб кетди ва Исо Ўз устига Худонинг Руҳи каптар шаклида тушиб қўнганини кўрди.

¹⁷Шу пайт осмондан: “Бу Менинг севикли Ўғлимдир[33], Ундан ниҳоятда мамнунман[34]”, деган овоз келди.