Read Муқаддас Китоб Uzbek Матто 6 Bible Online

Матто 6 - Муқаддас Китоб Uzbek bible

Матто 6

¹Эҳтиёт бўлинглар, савоб ишингизни одамларга кўз — кўз қилманглар. Акс ҳолда, осмондаги Отангиздан мукофот ололмайсизлар.

²Бировга хайр — садақа берганингиз ҳақида ҳаммага жар солиб юрманглар. Иккиюзламачиларгина одамлардан таҳсин олиш учун синагогаларда ва кўча — кўйда шундай қиладилар. Сизларга чинини айтайин: улар ўз мукофотини олиб бўлганлар.

³Сиз эса хайр — садақа бераётганингизда, ўнг қўлингиз нима қилаётганини чап қўлингиз билмасин.

⁴Хайр — садақангизни ҳеч кимга билдирмай беринг. Яширинча қилган бу ишингизни кўрган Отангиз сизни тақдирлайди[61].

⁵Ибодат қилганингизда, иккиюзламачиларга ўхшаманглар. Улар ўзларини ҳаммага кўрсатиш учун синагогаларда ва кўчаларнинг бурчакларида туриб ибодат қилишни яхши кўрадилар. Сизларга чинини айтай: улар ўзларининг мукофотларини олиб бўлганлар.

⁶Сиз эса ибодат қилаётганингизда ичкари хонага кириб, эшикни беркитиб олинг ва яширин бўлган Отангизга ибодат қилинг. Яширин қилган ишларингизни кўрган Отангиз сизни тақдирлайди.

⁷Ибодат қилаётганингизда, бутпарастлар каби, беҳуда сўзларни ҳадеб такрорлайверманг. Улар, кўп сўзласам, ибодатим ижобат бўлади, деб ўйлайдилар.

⁸Уларга ўхшаманглар, чунки осмондаги Отангиз сўрамасингиздан олдин нимага муҳтожлигингизни билади.

⁹Сизлар эса шундай ибодат қилинглар: «Бизнинг осмондаги Отамиз! Сенинг муқаддас номинг улуғлансин.

¹⁰Сенинг Шоҳлигинг келсин. Осмонда бўлгани каби, Ерда ҳам Сенинг ироданг бажо бўлсин.

¹¹Бугунги ризқимизни бергин.

¹²Бизга қарши гуноҳ қилганларни биз кечиргандек, Сен ҳам бизнинг гуноҳларимизни кечиргин.

¹³Бизни васвасага дучор қилмагин, Ёвуз шайтондан халос қилгин[62].»

¹⁴Агар сизларга ёмонлик қилганларни кечирсангизлар, осмондаги Отангиз ҳам сизни кечиради.

¹⁵Борди — ю, сизлар бошқаларнинг гуноҳларини кечирмасангизлар, Отангиз ҳам сизни кечирмайди.

¹⁶Рўза тутаётганингизда, иккиюзламачилар каби, қовоқ солиб юрманглар. Улар рўза тутаётганларини бошқаларга кўрсатиш учун ювиниб — таранмайдилар. Сизларга чинини айтайин: улар ўз мукофотларини олиб бўлганлар.

¹⁷Сизлар рўза тутганларингизда юзларингизни ювиб, сочларингизни тараб юринг,

¹⁸токи рўза тутганингизни яширин бўлган Отангиздан бошқа ҳеч ким билмасин. Шунда яширин қилган ишингизни кўрган Отангиз сизни тақдирлайди.

¹⁹Бу дунёда ўзларингиз учун бойлик ғамламанглар. Ахир, бундай бойликни куя ейди[63], занг босади, ўғри тушиб ўғирлайди.

²⁰Аксинча, ўзларингиз учун самода хазина йиғинглар. Бундай бойликни куя емайди, занг босмайди, ўғри ҳам ўғирлай олмайди.

²¹Хазинангиз қаерда бўлса, юрагингиз ҳам ўша ерда бўлади.

²²Тананинг чироғи — кўз. Агар кўзингиз яхши бўлса, бутун танангиз ёп — ёруғ бўлади.

²³Аммо кўзингиз ёмон бўлса, бутун танангиз зулматга тўлади. Агарда ичингиздаги нур зулмат бўлса, зимзиё зулматда қолган экансиз.

²⁴Ҳеч ким икки хўжайинга хизмат қилолмайди. У ё бирини ёмон кўриб, бошқасини яхши кўради, ёки бирига бағишланиб, бошқасини менсимайди. Сизлар ҳам Худога, ҳам бойликка бирдек хизмат қила олмайсизлар.

²⁵Шунинг учун сизларга айтаман: тирикчилигингиздан хавотир олиб, нима еймиз, нима ичамиз, устимизга нима киямиз, деманглар. Ахир, ҳаёт овқатдан, тана эса кийимдан муҳимроқ эмасми?!

²⁶Қушларга қаранглар: улар на экади, на ўради, на омборга дон йиғади. Шунга қарамай, осмондаги Отангиз уларнинг ризқини беради. Сизлар эса улардан анча қадрлисизлар — ку!

²⁷Биронтангиз ташвишланиб, умрингизни бир лаҳзага[64] бўлса ҳам узайтира олармидингиз?!

²⁸Нега кийим учун ташвишланасизлар? Нилуфар гулларнинг қандай ўсишига эътибор қилинг: улар меҳнат қилмайди, ип йигирмайди.

²⁹Аммо сизларга айтаманки, ҳатто шоҳ Сулаймон[65] ўзининг шуҳрат чўққисида ҳам ўша гулларнинг биронтасидай кийинмаган.

³⁰Бугун бор, эртага эса ўчоққа ташланадиган дала ўтини Худо шундай безаган бўлса, наҳотки сизларни кийинтирмаса, эй имони сустлар?!

³¹Шундай экан, нима еймиз, нима ичамиз, нима киямиз, деб ташвишланиб юрманглар.

³²Бутпарастлар ҳадеб бу нарсаларнинг ташвишида юрадилар. Лекин осмондаги Отангиз буларнинг ҳаммасига муҳтож эканингизни билади — ку!

³³Сизлар аввало Худонинг Шоҳлиги[66] ва Унинг иродасини бажариш пайида бўлинглар[67], шунда қолган ҳамма нарса сизга берилади.

³⁴Хуллас, эртанги кун учун ташвиш тортманглар. Эртанинг ташвиши эртанинг ўзига тегишлидир. Ҳар бир куннинг ғам — ташвиши ўзига етади.