Read Муқаддас Китоб Uzbek Луқо 10 Bible Online

Луқо 10 - Муқаддас Китоб Uzbek bible

Луқо 10

¹Шундан кейин Раббимиз Исо етмиш икки[142] одамни танлаб олди. Уларни иккита — иккита қилиб, боришни мўлжаллаган ҳар бир шаҳарга, ҳар бир жойга Ўзидан олдин жўнатди.

²Исо уларга шундай деди: “Ҳосил мўл, аммо ишчилар оз. Ҳосил Эгасидан: «Ҳосилингни йиғиб олишга яна ишчилар юбор», деб сўранглар.

³Боринглар! Сизни бўрилар орасига қўзилардай юборяпман.

⁴Ўзларингиз билан ҳамён, тўрва, чориқ олманглар. Йўлда одамлардан ҳол — аҳвол сўрашга вақтингизни кеткизманглар.

⁵Бирор хонадонга кирганларингизда, аввало: «Хонадонингизда тинчлик — омонлик бўлсин», деб айтинглар.

⁶Агар ўша хонадонда тинчликсевар одам яшаётган бўлса, сиз тилаган тинчлик ўша одамда қолади. Бўлмаса, ўзингизга қайтиб келади.

⁷Бир хонадондан бошқа хонадонга кўчиб юрманглар. Кирган хонадонингизда қолинглар. Олдингизга нима қўйишса, ўшани еб — ичинглар. Чунки меҳнаткаш иш ҳақини олишга муносибдир.

⁸Бир шаҳарга кирганингизда, шаҳар аҳолиси сизларни қабул қилса, олдингизга қўйганларини енглар.

⁹Ўша ердаги хасталарга шифо бериб, шаҳардаги одамларга: «Худонинг Шоҳлиги сизларга яқинлашди», деб айтинглар.

¹⁰Аммо бирон шаҳарга кирганингизда сизларни қабул қилмасалар, ўша шаҳарнинг шоҳ кўчаларига чиқиб шундай деб айтинглар:

¹¹«Огоҳлантириш тариқасида шаҳрингиздан оёқларимизга ёпишган чангни ҳам қоқиб кетяпмиз[143]. Аммо билиб қўйинг, Худонинг Шоҳлиги яқинлашди!»

¹²Сизларга айтаманки, қиёмат кунида ўша шаҳарнинг ҳоли Садўм шаҳрининг[144] ҳолидан баттар бўлади.

¹³Сенинг ҳолингга вой, эй Хоразин! Сенинг ҳолингга вой, эй Байтсайда! Агар сизларда қилинган мўъжизалар Тир билан Сидон шаҳарларида[145] қилинганда эди, улар аллақачон қанорга ўраниб, кулга ўтириб[146], тавба қилган бўлардилар.

¹⁴Қиёмат кунида сизнинг ҳолингиз Тир ва Сидоннинг ҳолидан баттар бўлади.

¹⁵Эй Кафарнаҳум! Худо сени кўкларга кўтаради, деб ўйлайсанми?! Йўқ, У сени тубсиз чуқурликка улоқтиради!”

¹⁶Исо шогирдларига деди: “Сизларга қулоқ солган Менга қулоқ солган бўлади. Сизларни рад қилган Мени рад қилган бўлади. Мени рад қилган эса Мени Юборганни рад қилган бўлади.”

¹⁷Етмиш икки шогирд хурсанд бўлиб сафардан қайтиб келдилар. Улар Исога шундай дедилар: — Ҳазрат, биз Сизнинг номингиздан буйруқ берганимизда, ҳатто жинлар ҳам итоат этяптилар.

¹⁸Исо уларга деди: — Мен шайтоннинг осмондан яшиндай тушганини кўрдим.

¹⁹Мен сизларга илону чаёнларни босиб эзиш ҳокимиятини ва иблиснинг[147] бутун куч — қудратини оёқ ости қилиш ҳокимиятини берганман. Ҳеч нарса сизларга зарар етказмайди.

²⁰Бироқ жинлар сизга бўйсунаётганидан хурсанд бўлманглар, балки номларингиз осмонда ёзилганидан хурсанд бўлинглар!

²¹Шу он Исо Муқаддас Руҳнинг шодлигига тўлиб, деди: “Эй Ота, еру осмоннинг Эгаси! Сен бу ишларни донолару идроклилардан яшириб, гўдакларга маълум этганинг учун Сенга шукурлар айтаман. Ҳа, Ота, бу Сенинг эзгу хоҳишинг эди.”

²²Сўнг Исо одамларга деди: “Осмондаги Отам ҳамма нарсани Менинг ихтиёримга топширган. Ўғилнинг кимлигини Отадан бошқа ҳеч ким билмайди. Отанинг кимлигини ҳам Ўғилдан бошқа ва Ўғил аён қилишни истаган одамдан бошқа ҳеч ким билмайди.”

²³Исо шогирдларига ўгирилиб қаради — да, уларга алоҳида деди: “Сизлар кўраётганларни кўрадиган кўзлар бахтлидир!

²⁴Сизларга шуни айтай: қанчадан — қанча пайғамбарлар, қанчадан — қанча шоҳлар сизлар кўрган воқеаларни кўришни истаганлар, аммо кўрмаганлар. Сизлар эшитганларингизни эшитишни улар истаганлар, аммо эшитмаганлар.”

²⁵Шунда Исони синаш мақсадида келган Таврот тафсирчиларидан бири туриб, Унга савол берди: — Устоз, абадий ҳаётга эга бўлишим учун мен нима қилишим керак?

²⁶Исо: — Тавротда бу тўғрида нима ёзилган? Сиз нима деб тушунасиз? — деб сўради.

²⁷У киши шундай жавоб берди: — У ерда ёзилганки: “Эгангиз Худони бутун қалбингиз билан, жону дилингиз билан, бутун онгингиз билан, кучингиз борича севинг”[148], яна: “Ўзгани ўзингизни севгандай севинг.”[149]

²⁸Исо унга: — Тўғри жавоб бердингиз. Сиз ҳам шундай қилинг, ана шунда яшайсиз! — деди.

²⁹Аммо у одам ўзини оқламоқчи бўлиб, Исодан: — Менинг яқиним ким? — деб сўради.

³⁰Исо шундай жавоб берди: — Бир одам Қуддусдан Ерихога[150] бораётган экан, қароқчилар қўлига тушиб қолибди. Қароқчилар унинг кийимларини ечиб олиб, калтаклаб, чалажон қилиб ташлаб кетибдилар.

³¹Тасодифни қарангки, ўша йўлдан бир руҳоний[151] кетаётган экан. У ҳалиги одамни кўрибди — ю, йўлнинг нариги четидан ўтиб кетаверибди.

³²Ўша жойдан ўтиб кетаётган леви[152] ҳам худди шундай қилибди. У ярадор одамни кўриб, йўлнинг нариги четидан ўтиб кетаверибди.

³³Аммо ўша ердан ўтиб кетаётган бир Самариялик[153] ярадор одамни кўриб, унга ачиниб кетибди.

³⁴Унинг ёнига келиб, яраларига зайтун мойи, шароб суриб[154], боғлаб қўйибди. Сўнг уни ўз уловига миндирибди — да, меҳмонхонага олиб келиб, уни парвариш қилибди.

³⁵Эртаси куни[155] икки кумуш танга[156] чиқарибди — да, меҳмонхона эгасига бериб: “Унга яхши қаранг, агар бундан ортиқ харажат қилсангиз, қайтишимда сизга тўлайман”, дебди.

³⁶Сизнингча, ўша уч одамдан қайси бири қароқчилар қўлига тушган одамнинг яқини ҳисобланади?

³⁷Тафсирчи: — Унга шафқат кўрсатган одам — да, — деб жавоб берди. — Боринг, сиз ҳам шундай қилинг! — деди унга Исо.

³⁸Исо ва Унинг шогирдлари йўлда давом этдилар. Улар бир қишлоққа кирдилар. У ерда Марта исмли аёл Исони уйига таклиф қилди.

³⁹Унинг Марям исмли бир синглиси бор эди. Марям Раббимиз Исонинг оёқлари олдида ўтириб, Унинг сўзларини тинглар эди.

⁴⁰Марта эса меҳмон кутиш билан овора эди. У Исонинг олдига келиб деди: — Ҳазрат! Эътибор бермаяпсизми, синглим ҳамма ишни бир ўзимга ташлаб қўйди — ку! Унга айтинг, менга ёрдам берсин.

⁴¹Раббимиз Исо унга шундай жавоб берди: — Эҳ, Марта, Марта, бунча уриниб ташвишланмасанг!

⁴²Зарур бўлган биттагина нарса бор. Марям ўзи учун энг яхшисини танлади ва бу ундан тортиб олинмайди.