Read Муқаддас Китоб Uzbek Луқо 14 Bible Online

Луқо 14 - Муқаддас Китоб Uzbek bible

Луқо 14

¹Бир Шаббат куни Исо фарзийлар раҳнамоларидан бирининг уйига меҳмонга борди. Уни диққат билан кузатиб ўтиришарди.

²Исонинг олдига истисқо дардидан қўл — оёқлари шишиб кетган бир одам келиб қолди.

³Исо Таврот тафсирчиларидан ва фарзийлардан сўради: — Қонунимизга кўра, Шаббат куни одамга шифо бериш мумкинми ёки йўқми?

⁴Улар эса индамадилар. Исо хаста одамга қўл теккизиб, шифо берди ва уни жўнатиб юборди.

⁵Сўнг уларга деди: — Бирортангизнинг фарзандингиз[184] ёки молингиз қудуққа тушиб кетса, Шаббат куни бўлишига қарамай, уни дарҳол чиқариб олмайсизларми?!

⁶Улар эса бу гапга бирон жавоб топа олмадилар.

⁷Меҳмонлар тўрдан жой танлашга интилаётган эдилар. Исо буни кўриб, шундай масал айтди:

⁸“Сизни тўй зиёфатига таклиф қилишганда, тўрга чиқиб олманг. Меҳмонга чақирилганлар орасида сиздан ҳам ҳурматлироқ бошқаси бўлиши мумкин.

⁹Икковингизни таклиф қилган мезбон келиб, сизга: — Жойингизни бу одамга бўшатиб беринг, — деб айтиши мумкин. Шунда сиз хижолат тортиб, пойгакда ўтиришга мажбур бўласиз.

¹⁰Шунинг учун таклиф этилганингизда, пойгакда ўтиринг, токи мезбоннинг ўзи келиб сизга: — Дўстим, илтимос тўрга чиқинг, — деб айтсин. Шунда бошқа меҳмонлар кўзида сизнинг ҳурматингиз ошади.

¹¹Зотан, ўзини ўзи юксалтирган камситилади, ўзини паст тутган эса юксалтирилади.”

¹²Исо Ўзини таклиф қилган хонадон соҳибига айтди: — Тушки ё кечки зиёфат берганингизда, дўстларингизни ёки ака — укаларингизни, қариндош — уруғларингизни ё бўлмаса, бой қўшниларингизни таклиф қилманг. Акс ҳолда, улар ҳам сизни меҳмонга чақириб, қилган яхшилигингизни қайтарадилар.

¹³Аксинча, зиёфат берганингизда, камбағал — қашшоқларни, чўлоқ, шолларни, кўрларни таклиф қилинг.

¹⁴Шунда бахтли бўласиз. Чунки улар қилган яхшилигингизни қайтара олмасалар — да, солиҳлар тирилган замонда бунинг савобини кўрасиз.

¹⁵Дастурхон атрофида ўтирган меҳмонлардан бири Исонинг бу сўзларини эшитиб, Унга деди: — Худонинг Шоҳлигида зиёфат ейдиган киши бахтлидир!

¹⁶Исо ўша одамга шундай деди: “Бир одам катта зиёфат тайёрлаб, кўпчиликни таклиф этибди.

¹⁷Зиёфат вақти бўлганда: — Келинглар, дастурхон тайёр бўлди, — деб меҳмонларни чақиргани хизматкорини юборибди.

¹⁸Аммо таклиф қилинганларнинг ҳаммаси бирдай узр сўрай бошлабдилар. Биринчиси унга дебди: — Мен ер сотиб олган эдим, ўша ерни кўргани боришим керак. Илтимос, мени кечиринг.

¹⁹Бошқаси эса: — Мен беш жуфт ҳўкиз сотиб олдим, уларни синагани кетяпман. Илтимос, мени кечиринг, — дебди.

²⁰Яна бошқаси: — Мен янги уйландим, шунинг учун бора олмайман, — дебди.

²¹Хизматкор қайтиб келиб, хўжайинига ахборот берибди. Шунда уй соҳиби ғазабланиб, хизматкорига буюрибди: — Ҳозироқ шаҳар кўчаларини, йўлакларини айланиб чиқ. Қашшоқ, чўлоқ, кўр ва шолларни бу ерга олиб кел.

²²Бир оз вақтдан кейин хизматкор шундай деб келди: — Хўжайин, буюрганларингизни бажардим, лекин яна бўш жой қолди.

²³Шунда хўжайин хизматкорига айтибди: — Йўлларга, йўлакларга бор, одамларни кўндириб олиб кел, токи уйим тўлсин.

²⁴Сизларга айтай: таклиф қилинганларнинг бирортаси ҳам зиёфат таомларидан асло тотиб кўрмайди[185].”

²⁵Катта бир оломон Исога эргашиб кетаётган эди. Исо уларга қараб деди:

²⁶“Менга эргашган одам Мени ота — онасидан, ака — ука ва опа — сингилларидан, ҳатто ўз жонидан ортиқ севиши керак[186], акс ҳолда, у Менинг шогирдим бўлолмайди.

²⁷Ўз хочини кўтариб[187], ортимдан юрмаган одам ҳам Менинг шогирдим бўлолмайди.

²⁸Сизлардан бирортангиз минора қурмоқчи бўлсангиз, уни битириш учун маблағ етарлими, деб олдиндан харажатини ҳисоблаб чиқмайсизми?

²⁹Акс ҳолда, сиз пойдевор ётқизасиз — у, минорани битказа олмайсиз. Буни кўрганларнинг ҳаммаси устингиздан кулиб, шундай деб айтишади:

³⁰«Бу одам қурилишни бошлади, аммо битира олмади.»

³¹Ёки қайси шоҳ бошқа бир шоҳга қарши урушга чиқишдан аввал ўтириб: «Душман йигирма минг аскари билан менга қарши келяпти, мен ўн минг аскарим билан унга бас кела оламанми?» деб ўйламайдими?!

³²Кучи етмаса, душман ҳали узоқдалигида унинг олдига элчи юбориб, сулҳ тузайлик, деб илтимос қилади.

³³Худди шу сингари, бор мол — мулкингиздан кечмасангиз, биронтангиз ҳам Менинг шогирдим бўла олмайсиз.

³⁴Туз — яхши нарса. Лекин туз ўз таъмини йўқотса, уни яна қандай шўр қилиб бўлади?!

³⁵Бундай туз ерга ҳам, гўнгга ҳам ярамайди, уни ташлаб юборадилар. Кимнинг эшитар қулоғи бўлса, эшитсин!”