Read Муқаддас Китоб Uzbek Луқо 3 Bible Online

Луқо 3 - Муқаддас Китоб Uzbek bible

Луқо 3

¹Қайсар[36] Тиберий ҳукмронлигининг ўн бешинчи йили[37] эди. Яҳудия вилоятида Пўнтий Пилат ҳоким эди[38]. Жалила ҳудудида Ҳирод[39], Итурея билан Трахонитис ҳудудларида Ҳироднинг укаси Филип, Авилина ҳудудида Лисанияс ҳукмронлик қилар[40],

²Ханан ва Каяфас эса олий руҳоний эдилар[41]. Ўша вақтда чўлда[42] яшаётган Закариёнинг ўғли Яҳёга Худонинг сўзи келди.

³У Иордан дарёси атрофидаги ерларни кезиб, одамларга: “Гуноҳларингиздан тавба қилиб, сувга чўминглар, шунда Худо гуноҳларингизни кечиради”, деб ваъз қиларди.

⁴Шу тариқа Ишаё пайғамбар ўз китобида ёзган қуйидагича башорати амалга ошди: “Чўлда бир овоз янграмоқда: «Эгамизга йўл ҳозирланг, Унга тўғри йўл очинг!

⁵Ҳар бир жарлик тўлдирилади, Ҳар бир тоғу тепалик пасаяди. Қинғир — қийшиқ йўллар ростланади, Ўнқир — чўнқир сўқмоқлар текис бўлади.

⁶Бутун жонзот Худонинг нажотини кўради!»”[43]

⁷Катта бир оломон сувга чўмдирилиш учун Яҳёнинг олдига келди. Яҳё уларга деди: — Ҳой, илонлар зоти! Бошингизга келаётган Худо ғазабидан қочиб қутуласиз, деб сизларга ким уқтирди?

⁸Бундан кейин тавбага яраша иш тутинглар! Ўзингизча: “Биз Иброҳим наслиданмиз”, деб айтишни хаёлингизга ҳам келтирманглар! Сизларга шуни айтай: Худо мана бу тошлардан Иброҳимга авлод тиклашга қодир.

⁹Ҳозирданоқ дарахтлар илдизида болта ётибди. Яхши мева бермаган ҳар бир дарахт кесилиб, оловга ташланади.

¹⁰Оломон Яҳёдан сўради: — Ундай бўлса, биз нима қилишимиз керак?

¹¹У жавоб бериб, деди: — Кимнинг иккита кўйлаги бўлса, бирини кўйлаги бўлмаган одамга берсин. Кимнинг озиқ — овқати бўлса, у ҳам овқати йўқлар билан бўлишсин.

¹²Солиқчилардан[44] баъзилари ҳам сувга чўмдирилиш учун келиб, Яҳёдан: — Устоз, биз нима қилишимиз керак? — деб сўрашди.

¹³Яҳё уларга шундай жавоб берди: — Белгиланганидан ортиғини одамлардан талаб қилманглар.

¹⁴Баъзи бир аскарлар ҳам ундан: — Биз — чи?! Биз нима қилишимиз керак? — деб сўрадилар. Яҳё уларга деди: — Бировларни ноҳақ айблаб, пул орттирманглар, маошингиз билан қаноатланинглар.

¹⁵Халқ Масиҳнинг келишини орзиқиб кутарди. Улар: “Яҳё Масиҳ эмасмикин?” деган фикрни кўнгилдан ўтказишарди.

¹⁶Яҳё уларнинг ҳаммасига шундай деди: — Мен сизларни сувга чўмдиряпман. Лекин мендан ҳам қудратлироқ бўлган бир Зот ортимдан келмоқда. Мен Унинг чориқ ипларини ечишга ҳам арзимайман. У сизларни Муқаддас Руҳга ва оловга[45] чўмдиради.

¹⁷Унинг паншахаси қўлида тайёр турибди. У Ўз хирмонини шопиради: буғдойни Ўз омборига тўплаб, сомонни эса сўнмас ўтда ёндириб юборади.

¹⁸Яҳё яна кўп бошқа насиҳатлар бериб, халққа Хушхабарни эълон қиларди.

¹⁹Вилоят ҳукмдори[46] Ҳироднинг қилмишларини эса фош қилди. Чунки Ҳирод ўз укасининг хотини Ҳиродияга уйланган ва яна бошқа ёмон ишлар ҳам қилганди.

²⁰Шуниси етмагандай, у Яҳёни ҳам зиндонга қаматиб қўйди.

²¹Бутун халқ сувга чўмдирилаётганда, Исо ҳам сувга чўмдирилди. У ибодат қилиб турганда осмон очилиб кетди

²²ва Муқаддас Руҳ каптар шаклида Унинг устига тушиб келди. Осмондан эса: “Сен Менинг севикли Ўғлимсан[47], Сендан ниҳоятда мамнунман[48]” деган овоз келди.

²³Исо хизматини бошлаганда ўттиз ёшларда эди. Одамлар Уни Юсуфнинг ўғли деб ҳисоблардилар[49]. Юсуф эса — Элахнинг ўғли[50],

²⁴Элах — Маттотнинг ўғли, Маттот — Левининг ўғли, Леви — Малкийнинг ўғли, Малкий — Яннайнинг ўғли, Яннай — Юсуфнинг ўғли,

²⁵Юсуф — Маттатиёнинг ўғли, Маттатиё — Амоснинг ўғли, Амос — Нохумнинг ўғли, Нохум — Ҳеслининг ўғли, Ҳесли — Нагайнинг ўғли,

²⁶Нагай — Махатнинг ўғли, Махат — Маттатиёнинг ўғли, Маттатиё — Шимахнинг ўғли, Шимах — Йўсехнинг ўғли, Йўсех — Йўдонинг ўғли,

²⁷Йўдо — Йўханоннинг ўғли, Йўханон — Резонинг ўғли, Резо — Зарубабелнинг ўғли, Зарубабел[51] Шалтиёлнинг ўғли эди. Шалтиёл — Нерийнинг ўғли,

²⁸Нерий — Малкийнинг ўғли, Малкий — Йиддонинг ўғли, Йиддо — Қосамнинг ўғли, Қосам — Элмодамнинг ўғли, Элмодам — Ғурнинг ўғли,

²⁹Ғур — Ёшуанинг ўғли, Ёшуа — Элиазарнинг ўғли, Элиазар — Йўримнинг ўғли, Йўрим — Маттотнинг ўғли, Маттот — Левининг ўғли,

³⁰Леви — Шимўннинг ўғли, Шимўн — Яҳудонинг ўғли, Яҳудо — Юсуфнинг ўғли, Юсуф — Юнамнинг ўғли, Юнам — Элияқимнинг ўғли,

³¹Элияқим — Малиёнинг ўғли, Малиё — Маннонинг ўғли, Манно — Маттатонинг ўғли, Маттато — Натаннинг ўғли, Натан[52] Довуднинг ўғли эди.

³²Довуд — Эссайнинг ўғли, Эссай — Обиднинг ўғли, Обид — Бўазнинг ўғли, Бўаз — Салмўннинг ўғли, Салмўн — Нахшўннинг ўғли,

³³Нахшўн — Оминадавнинг ўғли, Оминадав — Админнинг ўғли, Админ — Арнийнинг ўғли, Арний — Хазроннинг ўғли[53], Хазрон — Паразнинг ўғли, Параз — Яҳудонинг ўғли,

³⁴Яҳудо — Ёқубнинг ўғли, Ёқуб — Исҳоқнинг ўғли, Исҳоқ[54] Иброҳимнинг ўғли эди. Иброҳим — Тераҳнинг ўғли, Тераҳ — Нахўрнинг ўғли,

³⁵Нахўр — Саруғнинг ўғли, Саруғ — Равунинг ўғли, Раву — Палахнинг ўғли, Палах — Ибирнинг ўғли, Ибир — Шилахнинг ўғли,

³⁶Шилах — Хенаннинг ўғли, Хенан — Арпахшоднинг ўғли, Арпахшод — Сомнинг ўғли, Сом — Нуҳнинг ўғли, Нуҳ — Ламакнинг ўғли,

³⁷Ламак — Матушалоҳнинг ўғли, Матушалоҳ — Ханўхнинг[55] ўғли, Ханўх — Ёреднинг ўғли, Ёред — Махалиёлнинг ўғли, Махалиёл — Хенаннинг ўғли,

³⁸Хенан — Энўшнинг ўғли, Энўш — Шиснинг ўғли, Шис — Одам Атонинг ўғли, Одам Ато[56] Худонинг ўғли[57] эди.