Read Муқаддас Китоб Uzbek Қонунлар 14 Bible Online

Қонунлар 14 - Муқаддас Китоб Uzbek bible

Қонунлар 14

¹Сизлар Эгангиз Худонинг фарзандларисиз. Марҳумга аза тутганингизда баданингизни тилманг, сочингизнинг олдини қирманг[91].

²Сизлар Эгангиз Худонинг муқаддас халқисиз. Эгамиз ер юзидаги барча халқлар орасидан сизларни Ўз халқи, Ўз хазинаси қилиб танлаб олди.

³Жирканч ҳайвонларнинг гўштини еманг.

⁴Мана бу ҳайвонларни[92] есангиз бўлади: мол, қўй, эчки,

⁵оҳу, кийик, буғу, ёввойи эчки, зубр, жайрон, архар.

⁶Айри туёқ ва кавш қайтарадиган ҳар қандай ҳайвонни тановул қилишингиз мумкин.

⁷Лекин кавш қайтарадиган ёки айри туёқ ҳайвонлардан туя, қуён ва суғурни еманглар, улар кавш қайтарса ҳам, туёғи айрилмаган. Бу ҳайвонлар сизлар учун ҳаромдир.

⁸Чўчқани ҳам еманглар, унинг туёғи айрилган, лекин кавш қайтармайди. У сизлар учун ҳаромдир. Бу ҳайвонларнинг гўштини еманглар, мурдасига ҳам тегманглар.

⁹Сувда яшайдиган сузгичи ва тангачалари бор ҳар қандай жониворни есангиз бўлади.

¹⁰Сузгичи ва тангаси бўлмаганларини еманг, улар сизга ҳаромдир.

¹¹Ҳалол қушлардан хоҳлаганингизнинг гўштини есангиз бўлади.

¹²Қуйидаги қушларнинг гўштини ейиш мумкин эмас: қумой, болтаютар, тасқара,

¹³қирғий, қизил калхат ва унинг зоти,

¹⁴қарға зоти,

¹⁵туяқуш, лочин, қулоқли укки, қарчиғай ва унинг зоти,

¹⁶япалоқ қуш, бойўғли, оқ бойўғли,

¹⁷бирқозон, жўрчи, балиқчи укки,

¹⁸лайлак, оқ қарқара ва унинг зоти, сассиқпопишак, кўршапалак.

¹⁹Қанотли ҳашаротлар сизларга ҳаромдир, уларни еманглар.

²⁰Аммо баъзи турдаги қанотли ҳашаротларни ейишингиз мумкин[93].

²¹Ўлимтикни еманг, уни шаҳрингизда яшаган мусофирга беринг, у еяверсин, ёки ўлимтикни бегонага сотинг, сизлар Эгангиз Худонинг муқаддас халқисиз. Улоқчани ўз онасининг сутида қайнатманг[94].

²²Ҳар йили далангизда ўсадиган ҳамма нарсадан, экинингизнинг ҳосилидан ўндан бирини ажратинглар.

²³Бу ушрларингизни[95] Эгангиз Худо Ўзи улуғланиши учун танлайдиган жойга олиб боринглар. Донингиз, шаробингиз ва зайтун мойингизнинг ушрларини, мол ва қўйларингизнинг биринчи туғилган болаларини Унинг ҳузурида енглар. Шундай қилиб, Эгангиз Худодан ҳар доим қўрқишни ўрганасизлар.

²⁴Агар Эгангиз Худо танлайдиган бу жой сиздан узоқ бўлса, шу сабабдан Эгангиз берган бараканинг ушрини у ерга олиб бора олмасангиз,

²⁵ўша нарсаларингизни кумушга алмаштиринг. Кумушни олиб, Эгангиз Худо танлайдиган жойга боринг.

²⁶Мана шу кумушга кўнглингиз тусаган нарсани: мол, қўй, шароб, ўткир ичимлик ва кўнглингиз хоҳлаган ҳамма нарсани сотиб олиб, у ерда Эгангиз Худо ҳузурида еб, оилаларингиз билан хурсандчилик қилинглар.

²⁷Шаҳрингизда яшаган левиларни унутиб қўйманглар, уларнинг сизникига ўхшаган улуши ҳам, мулки ҳам йўқдир.

²⁸Ҳар учинчи йил охирида ўша йили олган ҳосилингизнинг ўндан бир қисмини тўлиқ олиб, шаҳрингиздаги омборларда сақлаб қўйинглар.

²⁹Улуши ҳам, мулки ҳам бўлмаган шаҳрингиздаги левилар, шунингдек, мусофир, етим ва бевалар келиб, еб тўяди. Шунда қилган ҳар бир ишингизга Эгангиз Худо барака беради.