Read Муқаддас Китоб Uzbek Қонунлар 6 Bible Online

Қонунлар 6 - Муқаддас Китоб Uzbek bible

Қонунлар 6

¹Эгангиз Худо, халққа ўргатгин, деб менга берган амрлар, фармонлар ва қонун — қоидалар шулардан иборатдир. Иорданни кечиб ўтиб, мулк қилиб оладиган юртда буларга риоя қилинглар.

²Мен сизларга берадиган фармон ва амрларга ўзларингиз, фарзандларингиз ва набираларингиз, ҳаммангиз риоя қилинглар. Бир умр Эгангиз Худодан қўрқинглар, шунда умрингиз узоқ бўлади.

³Эй Исроил халқи, қулоқ солинг, буларни битта қолдирмай бажаринг. Шунда ота — боболарингизнинг Худоси — Эгангиз берган ваъдага кўра, сут ва асал оқиб ётган юртда[56] кўпаясизлар, бахтиёр бўласизлар.

⁴Эй Исроил, қулоқ сол! Эгамиз Худо танҳо Эгадир[57].

⁵Эгангиз Худони бутун қалбингиз билан, жону дилингиз билан, бутун вужудингиз билан севинглар.

⁶Бугун мен сизларга берган бу амрларни юрагингизда сақланглар.

⁷Буларни болаларингизга ҳам ўргатинглар. Уйда ўтирганда ҳам, йўлда юрганда ҳам, ётганингизда ҳам, турганингизда ҳам шулар ҳақида гапиринглар.

⁸Буларни қўлингизга белги қилиб боғланглар, пешанангизга нишона қилиб тақиб олинглар.

⁹Эшигингиз кесакисига[58], дарвозаларингизга ёзиб қўйинглар.

¹⁰Эгангиз Худо ота — боболарингиз Иброҳим, Исҳоқ, Ёқубга қасам ичиб, ваъда қилган ерга сизларни олиб киради. У сизларга ўзингиз қурмаган катта ва чиройли шаҳарларни беради.

¹¹Ўзингиз тўлдирмаган, бойликларга тўла уйларни, ўзингиз қазимаган сардобаларни, сиз экмаган токлар ва зайтунзорларни беради. Ўшанда еб тўйганларингиздан кейин

¹²эҳтиёт бўлинглар! Сизларни Мисрдаги қулликдан олиб чиққан Эгамизни унутманглар.

¹³Эгангиз Худодан қўрқинглар. Фақат Унга хизмат қилинглар. Ёлғиз Унинг номи билан қасам ичинглар.

¹⁴Бегона худоларга, атрофингиздаги халқларнинг худоларига эргашманглар.

¹⁵Ахир, орангиздаги Эгангиз Худо сизнинг севгингизни бошқа худолар билан баҳам кўрмайдиган Худодир. У ғазабланиб, сизларни ер юзидан йўқотиб юборади.

¹⁶Массахда қилганингиздек[59], Эгангиз Худони синаманглар.

¹⁷Унинг амрларини, фармон ва шартларини битта қолдирмай бажаринглар.

¹⁸Эгамиз тўғри ва яхши деб билган ишларни қилинглар. Шунда Эгамиз ота — боболарингизга қасам ичиб, ваъда қилган ҳосилдор юртни сизлар мулк қилиб оласизлар, бахтиёр бўласизлар.

¹⁹Эгамиз, Ўзи айтганидек, юртингизда яшаган барча душманларингизни ҳайдаб чиқаради.

²⁰Келажакда фарзандларингиз сизлардан: “Эгамиз Худо сизларга берган қонун — қоидалар, фармон ва шартларнинг маъноси нима?” деб сўрайди.

²¹Уларга шундай деб жавоб беринглар: “Биз Мисрда фиръавннинг қуллари эдик. Эгамиз Ўз қудрати билан бизни Мисрдан олиб чиқди.

²²У бизнинг кўзимиз олдида Мисрга, фиръавн ва унинг бутун хонадонига буюк, қўрқинчли аломату мўъжизаларни кўрсатди.

²³Ота — боболаримизга онт ичиб ваъда қилган юртга бизни олиб кириш учун, ўша юртни бизга бериш учун бизни Мисрдан олиб чиқди.

²⁴Эгамиз Худо: «Мана шу фармонларнинг ҳаммасига риоя қилинглар, Мендан қўрқинглар, шунда бугунгидай тирик бўласиз, бахтли ҳаёт кечирасиз», деди.

²⁵Эгамиз Худонинг олдида мана шу амрларни битта қолдирмай бажарсак, солиҳ бўламиз.”