Read Муқаддас Китоб Uzbek Ҳаворийлар 2 Bible Online

Ҳаворийлар 2 - Муқаддас Китоб Uzbek bible

Ҳаворийлар 2

¹Ҳосил байрами[15] куни келганда, ҳамма имонлилар бир жойда йиғилдилар.

²Бирдан осмондан шиддатли шамол эсганга ўхшаш овоз келиб, улар ўтирган уйнинг ичини тўлдирди.

³Улар тил шаклидаги алангани кўрдилар. Ўша аланга ёйилиб, ҳар бирининг устига тушди.

⁴Шунда ҳаммалари Муқаддас Руҳга тўлдилар, Муқаддас Руҳ берган қобилиятга кўра, улар бошқа тилларда гапира бошладилар.

⁵Ўша пайтда Қуддусда дунёдаги ҳар бир юртдан келган тақводор яҳудийлар яшар эди.

⁶Улар бу овозни эшитганларида, бир талай оломон йиғилиб келди. Ҳар бири ўз тилидаги гапларни эшитиб, довдираб қолди.

⁷Улар ҳайрат ва ҳаяжон ичида: “Қаранглар, гапираётган бу одамлар Жалилаликлар — ку! — деб хитоб қилдилар. —

⁸Қандай қилиб ҳар биримиз туғилган юртимизнинг тилларини эшитяпмиз?

⁹Орамизда Парфиядан, Мидия, Элам, Месопотамия, Яҳудия, Каппадокия, Понтус ва Асиядан келганлар бор.

¹⁰Фригия, Памфилия, Миср, Ливиянинг Киринеяга яқин ерларидан келганлар ҳам бор. Баъзиларимиз Римдан келганмиз, биз яҳудийлармиз, орамизда яҳудий динига кирган[16] Римликлар ҳам бор.

¹¹Баъзиларимиз Крит ва Арабистондан келганмиз. Шундай бўлса — да, улар Худонинг қилган қудратли ишлари тўғрисида бизга ўз тилларимизда гапириб бераётганини эшитиб турибмиз.”

¹²Улар ҳайратланиб, бошлари қотиб, бир — бирларидан: “Бу нимадан дарак беради?” деб сўрардилар.

¹³Бошқалар эса: “Ие, улар ичиб маст бўлиб қолибдилар — ку”, деб масхара қилишарди.

¹⁴Шунда Бутрус ўн бир ҳаворий билан олдинга чиқди — да, оломонга қарата шундай деди: “Эй яҳудий биродарлар, Қуддус аҳолиси! Гапимга қулоқ солиб, шуни уқиб олинглар!

¹⁵Бу одамларни сизлар маст деб ўйлаяпсизлар, аммо ундай эмас. Ахир, эндигина эрталаб соат тўққиз[17] бўлди — ку!

¹⁶Аксинча, Йўэл пайғамбарнинг айтганлари бажо бўлмоқда:

¹⁷«Худо айтмоқда: Охирги кунларда[18], Ўз Руҳимни ёғдираман ҳар бир инсон устига, Ваҳийлар келади йигитларингизга. Башоратлар қилар сизнинг ўғил — қизларингиз. Кароматли тушлар кўрар қарияларингиз.

¹⁸Ўз Руҳимни ёғдираман ўша кунларда Ҳаттоки қулу чўриларингиз устига. Улар башорат қиларлар.

¹⁹Менинг буюк ва даҳшатли куним келишидан олдин, Мен осмонда мўъжизалар яратаман, Ерда аломатлар кўрсатаман: Қон, олов, қалин туман ҳосил қиламан. Қуёш қораяди, ой қон тусига киради.

²⁰

²¹Раббимизга илтижо қилган ҳар бир инсон қутқарилади.»[19]

²²Эй Исроил халқи, бу гапларимни эшитиб олинглар: Носиралик Исо орқали Худо сизларнинг орангизда мўъжизалар ва аломатлар кўрсатди. Шу йўл билан Исода илоҳий ҳокимият борлигини Худо тасдиқлади. Буни ўзларингиз биласизлар.

²³Худо Ўзининг режаси бўйича Исони сизларнинг қўлингизга топширишни азалдан қарор қилган эди. Сизлар эса ғайрияҳудийларнинг қўллари билан Уни хочга михлатиб ўлдирдингизлар.

²⁴Аммо Худо Уни тирилтириб, ўлим азобларидан озод қилди. Ўлим ўз кучи билан Исони ушлаб туришга қодир эмасди.

²⁵Довуд У ҳақда шундай деган эди: «Мен доим Эгамга кўз тикаман, У ўнг томонимда бўлгани учун Мени ҳеч нарса қўзғата олмас.

²⁶Шу боис, эй Эгам, юрагим қувончга тўла, Тилим ҳам шод — хуррамдир. Танам умид билан яшайди.

²⁷Мени ўликлар диёрида[20] қолдирмайсан, Тақводорингни[21] қабрда чиритмайсан.

²⁸Менга ҳаёт сўқмоқларини Ўзинг кўрсатасан, Ҳузурингда шодлик Мени қамраб олади.»[22]

²⁹Биродарларим! Бобомиз Довуд тўғрисида сизларга очиқ — ойдин гапиришим керак. У ўлди, дафн қилинди, унинг қабри бугунгача шу ердадир.

³⁰У пайғамбар бўлгани боис, Худо унга: «Ўз наслингдан бўлган биттасини тахтингга ўтқазаман[23]», деб ичган онтини[24] ёдида тутарди.

³¹Довуд келажакни олдиндан кўриб, Масиҳнинг тирилиши тўғрисида гапирган эди. Худо Масиҳни ўликлар диёрида қолдирмаслиги ва Масиҳнинг танаси чиримаслиги ҳақида Довуд башорат қилганди[25].

³²Ана шу Исони Худо тирилтирди, бунга ҳаммамиз гувоҳмиз.

³³Худо Исони юксалтириб, Уни тахтининг ўнг томонига[26] ўтқазди. Отаси Худонинг ваъдаси бўйича Исо Муқаддас Руҳни қабул қилиб, Уни бизнинг устимизга ёғдирди. Буни ўзларингиз кўриб ва эшитиб турибсизлар.

³⁴Довуд осмонга чиқмаган бўлса — да, шундай деган эди: «Эгамиз айтмоқда Раббимга: Душманларингни оёқларинг остига пойандоз қилмагунимча, Сен Менинг ўнг томонимда ўтиргин.»[27]

³⁵

³⁶Бутун Исроил халқи шуни аниқ билиб қўйсин: сизлар михлаган Исони Худонинг Ўзи жамики борлиқ устидан ҳукмдор қилди. Исо ҳам Масиҳ[28], ҳам Раббийдир.”

³⁷Халойиқ бу гапларни эшитди — ю, юраклари тилка — пора бўлди. Улар Бутрусдан ва қолган ҳаворийлардан: — Биродарлар, энди биз нима қилайлик? — деб сўрадилар.

³⁸Бутрус уларга деди: — Тавба қилинглар, ҳар бирингиз Исо Масиҳнинг номи билан сувга чўминглар, токи гуноҳларингиз кечирилсин. Шунда сизлар Муқаддас Руҳни инъом қилиб оласизлар.

³⁹Худо сизларга ва болаларингизга, узоқдагиларга, Эгамиз Худо Ўзига даъват этганларнинг ҳар бирига ваъдасини берган.

⁴⁰Бутрус бошқа кўп далиллар билан уларга гувоҳлик бериб: “Ўзларингизни бу бузуқ насл устига келаётган жазодан сақланглар”, дея ўтинди.

⁴¹Шундай қилиб, Бутруснинг айтган хабарига ишонганлар сувга чўмдирилди. Ўша куни имонлилар сони уч мингтага кўпайди.

⁴²Улар ҳаворийларнинг таълимотини ўрганишга, биродарликка, Раббимиз Исони хотирлаб, нон синдиришга[29] ва ибодатга ўзларини бағишладилар.

⁴³Ҳаворийлар орқали Худо кўплаб мўъжизалар ва аломатлар кўрсатарди, бундан эса ҳамма ҳайратга тушган эди.

⁴⁴Барча имонлилар тез — тез йиғилишиб турар эдилар. Улар ҳамма нарсада ҳамжиҳат эдилар.

⁴⁵Мол — мулкларини сотиб, пулини ҳар кимнинг эҳтиёжига қараб тақсимлаб берардилар.

⁴⁶Имонлилар ҳар куни Маъбадда йиғилардилар. Бир — бирлариникига меҳмонга борганда эса Раббимиз Исони хотирлаш учун нон синдирардилар, соддадиллик билан, юракдан севиниб овқатланишарди.

⁴⁷Худога ҳамду санолар айтардилар, халқнинг ҳурмату эътиборидан баҳраманд эдилар. Ҳар куни Эгамиз нажот топаётганларни имонлиларнинг қаторига қўшарди.