Read Муқаддас Китоб Uzbek Римликлар 3 Bible Online

Римликлар 3 - Муқаддас Китоб Uzbek bible

Римликлар 3

¹Хўш, яҳудийларнинг қандай устунлиги бор? Ёки суннатнинг[13] нима фойдаси бор?

²Яҳудийлар ҳар жиҳатдан катта устунликка эгадирлар. Бу устунлик, энг аввало, шундан иборатки, Худонинг каломи уларга ишониб топширилган.

³Уларнинг баъзилари ишонмаган бўлса, нима бўпти? Уларнинг ишонмаганлиги Худонинг садоқатини бекор қиладими?

⁴Йўқ, асло! Ахир, ҳар бир инсон ёлғончи бўлса ҳам, Худо ҳақдир. Муқаддас битикларда Худо ҳақида шундай ёзилган — ку: “Шу боис ҳукм қилганингда Сен барҳақсан, Айбимни фош этганингда доимо тўғри бўлиб чиқасан.”[14]

⁵Инсоний фикр юритиб айтайин: агар бизнинг қабиҳлигимиз Худонинг одиллигини янада очиқроқ кўрсатса, нима ҳам дердик? Бошимизга қаҳр — ғазаб ёғдиргани учун Худо адолатсизми?

⁶Йўқ, асло! Худо одилдир. Худо адолатсиз бўлганда эди, қандай қилиб дунёни ҳукм қила оларди?!

⁷Менинг ёлғончилигим Худонинг ҳақлигига урғу бериб, Унга янада кўпроқ шон — шуҳрат келтирар экан, нима учун мен гуноҳкор сифатида маҳкум қилинишим керак?

⁸Шундай экан, “Яхшилик келтирсин деб, ёмонлик қилаверайликми?” дейишимиз керакми?! Баъзилар бизга туҳмат қилиб, Павлус ўшандай таълим беряпти, деб айтмоқдалар. Бундай туҳмат қилганлар жазога лойиқдир.

⁹Хўш, биз, яҳудийлар, бошқалардан устунмизми? Йўқ, асло! Юқорида исботлаб ўтганимдай, хоҳ яҳудий бўлсин, хоҳ ғайрияҳудий бўлсин, ҳар бир инсон гуноҳнинг ҳокимияти остидадир.

¹⁰Ахир, Муқаддас битикларда қуйидагидай ёзилган — ку: “Ҳеч бир солиҳ кимса йўқдир, Ҳатто биронта ҳам йўқ!

¹¹Биронта ҳам идрокли зот йўқ, Ҳеч ким Худога юз бурмайди.

¹²Ҳаммаси йўлдан озган, бирдай бузилган, Яхшилик қилувчи бир кимса йўқдир, Ҳатто биронта ҳам йўқ![15]

¹³Очиқ қабр кабидир оғизлари, Улар ёлғон гапиради. Тилларидан илон заҳри томади[16].

¹⁴Уларнинг оғзидан аччиқ сўзлар, лаънат чиқади[17].

¹⁵Уларнинг оёқлари қон тўкишга шошилади,

¹⁶Қадамидан ҳалокату вайрона келади.

¹⁷Улар тинчлик йўлларини билмайди[18],

¹⁸Улар Худодан қўрқмайди.”[19]

¹⁹Биз биламизки, қонун неки буюрган бўлса, қонунга қарам бўлганларга буюрган, токи ҳар бир оғиз юмилсин ва бутун дунё Худо олдида жавобгар бўлсин.

²⁰Зотан, қонунга амал қилиш орқали ҳеч ким Худонинг олдида оқлана олмайди, чунки қонун инсонга гуноҳкорлигини янада аниқроқ кўрсатади.

²¹Мана энди қонунга алоқасиз равишда оқланиш йўлини Худонинг Ўзи аниқ кўрсатди. Буни Таврот ва Пайғамбарлар битиклари[20] тасдиқлайди.

²²Биз Исо Масиҳга бўлган имонимиз орқали Худонинг олдида оқланамиз. Одамлар орасида ҳеч бир фарқ йўқ.

²³Ахир, ҳамма гуноҳ қилган ва Худонинг улуғворлигидан маҳрумдир.

²⁴Лекин гуноҳкорлар Исо Масиҳ орқали гуноҳларидан озод бўладилар. Улар оқланишга лойиқ бўлмасалар — да, Худонинг инояти билан оқланадилар.

²⁵Худо Исо Масиҳни бу дунёга юборди. Масиҳга ишонганларнинг ҳаммаси Унинг тўкилган қони орқали Худо билан ярашди[21]. Шундай қилиб, Худо Ўзининг адолатини намоён қилди. У ўтмишда сабр — тоқат қилиб, илгари қилинган гуноҳларни жазосиз қолдирган эди, энди эса Исо Масиҳга ишонганларни оқлаб, Ўзининг ҳақ эканлигини кўрсатмоқда.

²⁷Энди мақтанишга арзигулик нарсамиз қолдими? Йўқ, мақтовга ўрин йўқ. Нима сабабга кўра? Амрларни бажо келтиришни талаб қилувчи қонунга кўрами? Йўқ, инсонлар имон орқали оқланганда мақтанишга ҳеч ўрин қолмайди.

²⁸Ахир, инсон қонун талабларини бажо қилиш орқали эмас, балки имон орқали оқланади, биз бунга қаноат ҳосил қилдик.

²⁹Наҳотки Худо фақат яҳудийларнинг Худоси бўлса?! У бошқа халқларнинг ҳам Худоси эмасми? Албатта, У бошқа халқларнинг ҳам Худосидир.

³⁰Ахир, Худо ягона — ку! Суннатлиларни ҳам, суннатсизларни ҳам Худо имон орқали оқлайди.

³¹Демак, биз бу имон билан қонунни бекор қиляпмизми? Йўқ, асло! Аксинча, қонунни тасдиқлаяпмиз.