Read Муқаддас Китоб Uzbek 1 Коринфликлар 16 Bible Online

1 Коринфликлар 16 - Муқаддас Китоб Uzbek bible

1 Коринфликлар 16

¹Энди Худойимизнинг Қуддусдаги азизларига моддий маблағ тўплаш[69] масаласига келсак, сизлар ҳам Галатия ҳудудидаги жамоатларга берган йўл — йўриқларимга амал қилинглар.

²Ҳар якшанба куни ҳар бир одам қўлидан келганича бир миқдор пулни олиб қўйсин, токи олдингизга борганимда пул йиғишга ҳожат бўлмасин.

³Борганимдан кейин, эҳсонларингизни имонлиларга топширсин деб, ўзингиз муносиб кўрган кишиларни Қуддусга жўнатаман. Уларнинг ҳар бирини таништириб, мактуб ёзиб бераман.

⁴Агар боришга имкон бўлса, ўзим ҳам улар билан бирга бораман.

⁵Македониядан ўтиш ниятим бор. Шундан кейин сизларнинг олдингизга бораман.

⁶Сизлар билан бирмунча вақт бўламан, деб ўйлайман, балки ҳатто қишни ҳам сизлар билан ўтказарман. Ундан кейин қаерга бормоқчи бўлсам ҳам, сизларнинг ёрдамингиз билан сафаримни яна давом эттираман.

⁷Ахир, сизларни фақатгина йўл — йўлакай кўришни истамайман, Раббимиз Исо хоҳласа, сизлар билан кўпроқ вақт ўтказаман, деб умид қиламан.

⁸Лекин Ҳосил байрамига[70] қадар Эфес шаҳрида қоламан.

⁹Чунки бу ерда менга қарши чиққанлар кўп бўлишига қарамай, таъсирчан фаолият кўрсатишим учун йўл очилди.

¹⁰Тимўтий[71] олдингизга борганда унга ғамхўрлик қилинглар, у орангизда хотиржам юрсин, чунки у ҳам менга ўхшаб Раббимиз Исо хизмати билан машғул.

¹¹Ҳеч ким унга паст назар билан қарамасин. Тимўтий менинг олдимга қайтиб келаётганда, уни эсон — омон кузатиб юборинглар. Унинг биродарлар билан бирга келишини кутиб турибман.

¹²Биродаримиз Аполлосга[72] келсак, уни биродарларга қўшилиб сизларнинг олдингизга боришга кўп ундадим, лекин унинг ҳозир ҳеч боргиси йўқ. Имкони бўлса кейинроқ борар экан.

¹³Ҳушёр бўлинглар, имонда маҳкам туриб, жасоратли ва кучли бўлинглар.

¹⁴Ҳамма нарсани меҳр — муҳаббат билан қилинглар.

¹⁵Биродарлар, Стефанаснинг хонадонини биласизлар. Улар Ахая вилоятида[73] биринчи бўлиб Масиҳга имон келтирган ва ўзларини Худонинг азиз халқига хизмат қилишга бағишлаганлар. Сизлардан бир илтимосим бор:

¹⁶бундай инсонларни ва улар билан бирга берилиб хизмат қилаётганларни ҳурмат қилиб, уларнинг айтганларини қилинглар.

¹⁷Стефанас, Фортунатус ва Ахайкуснинг келганидан хурсанд бўлдим, улар сизларнинг йўқлигингизни билдирмади.

¹⁸Улар сизларнинг руҳингизни кўтаргандек, менинг ҳам руҳимни кўтардилар. Бундай инсонларни қадрланглар.

¹⁹Асия вилоятидаги жамоатлар сизларга салом йўллаяптилар. Акил билан Прискилла[74] ва уларнинг уйида йиғиладиган жамоат ҳам сизларга — Раббимиз Исонинг йўлидаги ҳамкорларига оташин салом айтяпти.

²⁰Ҳамма биродарларимиз салом айтяптилар. Бир — бирингиз билан ўпишиб кўришинглар.

²¹Мен, Павлус, мана шу мактубнинг якунини ўз қўлим билан ёзяпман[75].

²²Кимки Раббимиз Исони яхши кўрмаса, у лаънати бўлсин! Эй Раббимиз, келгин![76]

²³Раббимиз Исонинг инояти сизларга ёр бўлсин.

²⁴Сизларни яхши кўраман, чунки ҳаммамиз Исо Масиҳга тегишлимиз[77].