Read Муқаддас Китоб Uzbek 1 Коринфликлар 9 Bible Online

1 Коринфликлар 9 - Муқаддас Китоб Uzbek bible

1 Коринфликлар 9

¹Мен озод эмасманми?! Мен ҳаворий эмасманми?! Раббимиз Исони кўрмаганманми?! Раббимиз йўлида қилган меҳнатимнинг маҳсули сизлар эмасми?!

²Агар бошқалар учун ҳаворий бўлмасам ҳам, ҳеч бўлмаса сизлар учун ҳаворийдирман. Ахир, сизлар Раббимизга тегишли бўлганингиз учун ҳаворийлигимнинг муҳрисизлар.

³Мени танқид қилаётганлар олдида қуйидагилар билан ўзимни оқлайман.

⁴Наҳотки Раббимиз йўлида қилган хизматимиз учун текин еб — ичишга ҳуқуқимиз бўлмаса?!

⁵Нима, бошқа ҳаворийлар каби, Раббимиз Исонинг укалари[36] ва Бутрусга[37] ўхшаб, имонли бир аёлга уйланиб, уни ёнимизда олиб юришга ҳақимиз йўқми?!

⁶Ёки фақатгина мен билан Барнабо кун кечириш учун ўз қўлимиз билан меҳнат қилишимиз керакми?!

⁷Ким ўз ҳисобидан аскарлик қилади?! Ким ток ўтқазиб, унинг мевасини емайди?! Ким пода боқиб, поданинг сутини ичмайди?!

⁸Буларни фақатгина инсоний нуқтаи назардан айтаётганим йўқ! Мусонинг қонуни ҳам худди шундай буюради — ку!

⁹Унда: “Ғалла янчаётган ҳўкизнинг оғзини тўсманг”[38], деб ёзилган — ку. Нима, Худо ҳўкизлар ҳақида қайғуряптими?!

¹⁰Йўқ, Худо буни бизнинг манфаатимиз учун айтган. Ҳа, булар биз учун ёзилган. Шудгор қилувчи ҳам, ғалла янчувчи ҳам ўз ҳақини олиш умиди билан ишлайди — ку.

¹¹Биз руҳий жиҳатдан сизларга хизмат кўрсатсак — да, моддий ёрдамингизни бизга кўп кўрасизми?

¹²Бошқалар сизларнинг ёрдамингиздан баҳраманд бўлаётган экан, бизнинг ҳақимиз уларникидан ҳам кўпроқ эмасми?! Лекин биз бу ҳуқуқимиздан фойдаланмадик. Аксинча, Масиҳнинг Хушхабарига тўсиқ бўлмайлик деб, ҳар нарсага чидаб юрибмиз.

¹³Билмайсизларми, Маъбадда хизмат қилувчи руҳонийлар[39] Маъбаддан овқат олиб ейдилар. Қурбонгоҳда хизмат қилувчилар келтириладиган қурбонликлардан улуш оладилар.

¹⁴Шунингдек, Раббимиз Исонинг Ўзи буюргани бўйича[40], Хушхабар ёйиш вазифасини бўйнига олганлар бу иши орқали кун кечира олишлари керак.

¹⁵Аммо мен бу ҳуқуқларимдан фойдаланмадим ва бундан фахрланаман. Бу хатни ўша ҳуқуқимдан фойдаланай, деб ҳам ёзаётганим йўқ. Менга фахрланиш ҳуқуқини бераётган сабабни йўқотишдан кўра, ўлганим яхшироқдир.

¹⁶Мен Хушхабарни айтар эканман, бу билан мақтанишга ҳақим йўқ, чунки бу зиммамдаги вазифамдир. Аммо Хушхабарни ёймасам, менинг ҳолимга вой!

¹⁷Мен буни ўз ташаббусим билан қилаётган бўлсам, мукофотга лойиқ бўлардим. Лекин мукофотга лойиқ эмасман, чунки бор — йўғи зиммамдаги вазифани бажаряпман, бу ишни қилишдан бошқа иложим йўқ.

¹⁸У ҳолда менинг мукофотим нима? Мукофотим шундаки, мен Хушхабарни ёйганимда, ҳеч кимдан бирон нарса сўрамайман. Шунинг учун Хушхабарни ёйиш менга баъзи бир ҳуқуқларни берса — да, улардан фойдаланмайман.

¹⁹Мен қул эмас, эркин инсон бўлсам — да, ҳаммага қулдай хизмат қилдим. Янада кўпроқ одам Исонинг шогирди бўлсин деб, шундай қилдим.

²⁰Ўша мақсадимни кўзда тутиб, яҳудийлар учун яҳудийдай бўлдим, Мусонинг қонунига тобе бўлмасам — да, бу қонунга тобе бўлганлар орасида худди улардай яшадим.

²¹Мусонинг қонунини билмаганлар орасида бўлганимда, улар ҳам Исонинг шогирдлари бўлсин деб, худди шулардай яшадим. Тўғри, мен Худонинг қонунидан озод эмасман, Масиҳнинг амрларига тобеман.

²²Заиф инсонлар ҳам Исони танисинлар деб, уларнинг орасида бўлганимда заиф инсондай бўлдим. Ҳеч бўлмаса баъзиларни қай йўл билан бўлса — да, қутқарай деб, ҳаммага ҳамма нарса бўлдим.

²³Мен буларнинг ҳаммасини Хушхабарни ёйиш ниятида қиляпман, токи Хушхабар келтирадиган қут — баракалардан баҳраманд бўлай.

²⁴Биласизлар — ку, мусобақада кўпгина югурувчилар қатнашади, аммо фақат бир киши ғолиб келиб, мукофот олади. Сизлар ҳам шундай югурингки, мукофотни қўлга киритинглар.

²⁵Ахир, мусобақада қатнашадиган одам ўз нафсини тийиб, тартиб — интизом билан машқ қилади — ку! Улар сўлиб қоладиган гул тож олиш учун, биз эса боқий тож олиш учун ҳаракат қиламиз.

²⁶Шунинг учун мен мақсадсиз югурмайман, курашганимда зарбаларим аниқ бўлади.

²⁷Танамни чиниқтириб, уни ўз ихтиёримга бўйсундираман, токи бошқаларга Хушхабарни ваъз қилиб туриб, ўзим мукофотга нолойиқ бўлиб қолмайин.