Read Муқаддас Китоб Uzbek Галатияликлар 4 Bible Online

Галатияликлар 4 - Муқаддас Китоб Uzbek bible

Галатияликлар 4

¹Мен бундай демоқчиман: меросхўр ҳали ёш бола экан, гарчи у бутун мулкнинг эгаси бўлса ҳам, қулдан ҳеч фарқ қилмайди.

²У отаси белгилаган фурсатгача васийга ва уй — рўзғорни бошқарувчи хизматкорга бўйсунади.

³Худди шу сингари, бизлар ҳам олдин болалардай бўлиб, хурофот кучларига[35] қул эдик.

⁴Муддат битгандан кейин, Худо Ўз Ўғлини юборди. Унинг Ўғли қонун[36] остидаги ҳаёт учун аёлдан туғилди.

⁵Худонинг Ўз Ўғлини юборишдан мақсади бизни қонун остидаги ҳаётдан халос этиб, Ўзига фарзанд қилиб олиш эди.

⁶Биз Худонинг фарзандлари эканлигимизни кўрсатиш учун У юрагимизга Ўз Ўғлининг Руҳини юборди. Бу Руҳ орқали биз Худони “Отажон”[37] деб чақирамиз.

⁷Демак, энди сиз қул эмас, балки фарзандсиз. Фарзанд экансиз, Худонинг шарофати билан У Ўз фарзандларига атаган қут — баракаларга эга бўласиз.

⁸Олдин сизлар Худони билмаган пайтингизда, асли худолар бўлмаган кучларга қул эдингиз.

⁹Энди эса Худони биласизлар, тўғрироғи, Худо сизларни билади. Шундай экан, қандай қилиб яна ўша кучсиз, қадрсиз хурофотларга қайтяпсиз?! Қандай қилиб яна ўшаларга қул бўлишни хоҳлаяпсиз?!

¹⁰Сизлар белгиланган алоҳида кунлар, ойлар, йилларга риоя қилиб, диний маросимлар ўтказяпсиз!

¹¹Сизлар учун қайғуряпман! Наҳотки сизларни деб чеккан заҳматларим бекор кетган бўлса?!

¹²Эй биродарлар, сизлардан илтимос қиламан, менга ўхшаган бўлинглар, чунки мен ҳам сизларга ўхшаб қонун остидаги ҳаётдан озодман. Сизлар менга ҳеч ҳам озор бермагансиз.

¹³Ўзингиз биласиз, мен сизларга биринчи марта Хушхабар айтганимда, жисман ожиз эдим.

¹⁴Ожизлигим туфайли сизларга оғирлигим тушган бўлса ҳам, мендан нафратланмадингиз, мени рад этмадингиз. Аксинча, мени Худонинг фариштасидай, худди Исо Масиҳнинг Ўзини қабул қилгандай қабул қилдингиз.

¹⁵Қани энди ўша хайрихоҳлигингиз?! Ахир, ўзим шоҳидман: агар иложи бўлганда, ҳатто кўзларингизни ҳам суғуриб олиб, менга берган бўлардингиз!

¹⁶Наҳотки энди сизларга ҳақиқатни айтганим учун душманингиз бўлиб қолган бўлсам?!

¹⁷Баъзи бировлар сизларни ўзларига оғдириб олишга тиришмоқдалар[38]. Лекин улар сизларнинг фойдангизни кўзламаяптилар. Сизлар уларнинг атрофида гирдикапалак бўлишингиз учун улар бизни бир — биримиздан ажратиб ташламоқчи.

¹⁸Яхши ғояга бағишланиш яхшидир. Лекин бу фақат мен сизларнинг олдингиздалигимда эмас, балки доим шундай бўлиши керак.

¹⁹Болаларим, мен сизларни янгидан туғаётгандай, тўлғоқ азобидаман. Мақсадим шуки, сизларда Масиҳнинг табиати намоён бўлсин.

²⁰Сизлар мени таажжубга солиб қўйдингиз! Қани, энди сизларнинг олдингизда бўлсам — у, бошқа оҳангда гапира олсам!

²¹Эй сизлар, қонун остидаги ҳаётни афзал кўрганлар, менга айтинглар — чи, наҳот сизлар Тавротдаги қонунларни тушунмасангизлар?!

²²Ахир, унда ёзилганлардан биламизки, Иброҳимнинг икки ўғли бўлган. Ўғилларининг бири чўридан[39], иккинчиси эса озод аёлдан[40] туғилган.

²³Чўрисиники инсон ташаббуси билан, озод хотининики эса Худонинг ваъдасига биноан туғилган эди.

²⁴Бунда рамзий маъно бор. Икки она Худонинг икки аҳдини[41] билдиради: биринчиси — қулларни туғадиган Ҳожар биби Синай тоғида қилинган аҳднинг рамзидир.

²⁵Ҳожар Арабистондаги Синай тоғини[42] билдирса — да, у яҳудий динининг маркази бўлмиш ҳозирги Қуддуснинг рамзидир. Ахир, Қуддус ва унинг болалари қулликдалар — ку.

²⁶Самовий Қуддус эса озоддир: у бизларнинг онамиздир!

²⁷Муқаддас битикларда шундай ёзилган: “Эй бола кўрмаган бепушт аёл! Шод бўлгин! Эй тўлғоқ оғриғини билмаган аёл! Хитоб қил, ҳайқиргин! Ахир, ташлаб кетилган аёлнинг болалари Эри бор хотинникидан ҳам кўпроқ бўлади!”[43]

²⁸Сизлар эса, эй биродарлар, Исҳоққа ўхшаб ваъдага биноан туғилган фарзандларсиз.

²⁹Ўша замонда табиий йўл билан туғилган ўғил[44] Руҳнинг кучи билан туғилган ўғилни[45] қувғин қилди. Ҳозир ҳам худди шундай.

³⁰Аммо бу ҳақда Муқаддас битикларда нима дейилган? “Чўрини ва унинг ўғлини ҳайдаб юборинг, чунки чўрининг ўғли озод аёлнинг ўғли билан бирга меросхўр бўлмайди”[46], — деб ёзилган — ку!

³¹Шундай қилиб, эй биродарлар, биз чўрининг эмас, балки озод аёлнинг фарзандларимиз.