Read Муқаддас Китоб Uzbek Эфесликлар 3 Bible Online

Эфесликлар 3 - Муқаддас Китоб Uzbek bible

Эфесликлар 3

¹Мана, Исо Масиҳ ҳақи сиз — ғайрияҳудийларга қилган хизматим сабабли маҳбус[14] бўлганман.

²Худо Ўз иноятини сизларга етказиш вазифасини менга топширди. Сизлар албатта бу ҳақда эшитгансизлар.

³Юқорида қисқача ёзганимдай, Худо бу сирни менга ваҳий орқали маълум қилди.

⁴Сизлар ёзганларимни ўқиб, Масиҳ ҳақидаги сирни қандай фаҳмлаганимни тушуниб оласизлар.

⁵Бу сир олдинги наслларга аён қилинмаган эди. Энди эса Муқаддас Руҳ орқали Худонинг муқаддас ҳаворийлари ва пайғамбарларига[15] аён қилинди.

⁶Бу сирнинг моҳияти қуйидагичадир: ғайрияҳудийлар ҳам Хушхабарга ишониб, Исо Масиҳ орқали Худо Ўз халқига ато қиладиган баракаларга шерик бўладилар. Улар билан бирга бир тана аъзолари[16] бўлиб, Худонинг Ўз халқига берган ваъдасидан баҳраманд бўладилар.

⁷Хушхабарни тарқатиш хизмати менга Худонинг инояти бўйича топширилди. Бу иноятни Худо менга Ўзининг куч — қудрати орқали берди.

⁸Мен Худонинг азизлари орасида энг арзимагани эдим. Масиҳнинг ақл бовар қилмас бойлиги ҳақидаги Хушхабарни ғайрияҳудийларга етказишим учун менга Худонинг инояти берилди.

⁹Худонинг сирли режасини энди ҳаммага ошкор қилиш вазифаси менга юкланди. Бутун борлиқни[17] яратган Худо бу сирни асрлар давомида пинҳон тутган эди.

¹⁰Ўзининг кўп қиррали донолиги имонлилар жамоати орқали самовий кучлару салтанатларга маълум бўлиши учун Худо шундай қилди.

¹¹Худонинг Раббимиз Исо Масиҳ орқали рўёбга чиқарган азалий мақсади шу эди.

¹²Биз Исо Масиҳ туфайли ва Унга бўлган имонимиз туфайли Худонинг ҳузурига дадиллик ва тўла жасорат билан яқинлашиш имконига эгамиз.

¹³Шундай экан, сизлардан ўтинаман, менинг азоб — уқубатларимни деб, руҳингиз ҳеч тушмасин. Аксинча, сизлар учун чеккан азоб — уқубатларим билан фахрланинглар.

¹⁴Юқорида айтиб ўтганларим ҳақида ўйлаганимда, самовий Отамиз[18] олдида тиз чўкиб, ибодат қиламан.

¹⁵Ер юзидаги ва осмону фалакдаги ҳар бир жонзотнинг ҳаёт манбаи самовий Отадир.

¹⁶Менинг тоат — ибодатларим қуйидагичадир: Худо Ўзининг улуғвор бойлиги билан сизларга куч — қудрат бериб, Ўз Руҳи билан ички борлиғингизни бақувват қилсин.

¹⁷Имонингиз орқали Масиҳ юрагингиздан жой олсин.

¹⁸Сизлар илдизи чуқур дарахтдай бўлинг, Худонинг севгиси сизларни барқарор қилсин. Худонинг барча азизлари билан бирга, Масиҳнинг ақл бовар қилмас севгиси қанчалик кенг, қанчалик чексиз, қанчалик юксак ва теран эканлигини тўла англаб, билиб олинглар. Шунда ҳаётингиз Худонинг камолотига тўлиб — тошади.

²⁰Худо ҳаётимизда амал қилаётган қудрати билан биз сўраган ёки тасаввур қилганларимизни ва ҳатто хаёлимизга келмаганларни ҳам бажаришга қодирдир.

²¹Имонлилар жамоати ва Исо Масиҳ орқали Худога насллар оша то абад шон — шарафлар бўлсин! Омин.