Read Муқаддас Китоб Uzbek Эфесликлар 4 Bible Online

Эфесликлар 4 - Муқаддас Китоб Uzbek bible

Эфесликлар 4

¹Раббимиз Исо ҳақи маҳбус[19] бўлган мен — Павлус сизлардан ўтиниб сўрайман: Худо сизларни Ўзига даъват қилганини ёддан чиқармай, шу даъватга муносиб тарзда яшанглар.

²Доимо камтар ва мулойим бўлинглар, меҳр — муҳаббат билан бир — бирингизга нисбатан сабр — тоқатли бўлинглар.

³Ўзаро тинч — тотув яшаб, Муқаддас Руҳ ато қилган бирдамликни сақлашга жон куйдиринглар.

⁴Ҳаммамиз бир тананинг аъзоларимиз[20], қалбимиздаги Муқаддас Руҳ ҳам бирдир. Шунингдек, Худо бизни даъват қилиб, ҳаммамизга берган умид ҳам бирдир.

⁵Раббимиз бир, имонимиз ҳам бирдир, бир мақсадда сувга чўмдирилганмиз.

⁶Барчамизнинг Отамиз Худо бирдир. У ҳаммамиздан устун бўлиб, ҳаммамиз орқали Ўз иродасини бажо қилади. У ҳаммамизнинг орамиздадир.

⁷Масиҳ Ўз иноятига кўра, ҳар биримизга турли хил инъомлар берган.

⁸Мана, Муқаддас битикларда қуйидагича ёзилган: “Юксакларга чиқди У, Асирларни ортидан эргаштирди. Инсонларга ҳадялар берди.”[21]

⁹У юксакларга чиқди деган сўзлар нимани билдиради? У олдин пастга — ер юзига тушгандан бошқа нимани билдириши мумкин?!

¹⁰Пастга тушган Зот, коинотни ҳар жиҳатдан бутун қилай деб, фалак тоқидан ҳам юқорироққа чиқди.

¹¹Масиҳ баъзиларни ҳаворий, баъзиларни эса пайғамбар, баъзиларни Хушхабар воизи, яна бошқаларни жамоатларнинг чўпонларию устозлари қилиб тайинлади,

¹²токи улар Худонинг азиз халқини хизмат қилишга тайёрласинлар. Шунда Масиҳнинг танаси, яъни жамоат имонда мустаҳкам туради.

¹³Бунинг натижасида ҳаммамиз имонда якдил, Худонинг Ўғли Масиҳни таниб — биладиган, Унинг камолига эришган етук одамлар бўламиз.

¹⁴Шунда биз норасида гўдакларга ўхшамаймиз, шамол эсган томонга эгиладиган новдадай бўлмаймиз. Ҳар хил таълимотлар ва қув одамларнинг ҳийлаю айёрликларига лаққа тушавермаймиз.

¹⁵Келинглар, меҳр — муҳаббат билан ҳақиқатни айтиб, жамоатнинг боши бўлган Масиҳга ўхшаб ҳар жиҳатдан етук инсонлар бўлайлик.

¹⁶Унинг бошчилигида бутун бадан паю бўғинлар ёрдамида ўзаро уланади ва бирикади. Ҳар бир аъзо ўз вазифасини бажарар экан, бутун бадан ўсиб боради ва меҳр — муҳаббат туфайли бақувват бўлади.

¹⁷Шундай экан, Раббимиз Исонинг номидан қатъий тайинлаб, сизларга айтаман: энди худосиз одамлардай яшаманглар, улар сингари беҳуда ўй — хаёлларга берилманглар.

¹⁸Уларнинг онгларини зулмат қоплаган, улар Худо берадиган янги ҳаётга бегонадирлар, чунки улар бағри тош бўлиб, жаҳолатда қолганлар.

¹⁹Улар ҳар қандай ор — номус туйғусини йўқотиб, фисқу фужурга берилганлар, ҳар хил ифлос ишларни иштиёқ билан қиладилар.

²⁰Аммо сизлар Масиҳдан бундай ишларни ўрганмагансиз.

²¹Сизлар Масиҳнинг сўзларини эшитиб, Унинг таълимотини олгансизлар, чунки ҳақиқат Масиҳда жамдир.

²²Олдинги яшаш тарзингизга тобе бўлманг, эски ўзлигингиздан воз кечинг, чунки у алдовчи эҳтирослар туфайли бузилиб кетган.

²³Янгичасига фикр — зикр қиладиган бўлинглар.

²⁴Худонинг суратида яратилган, ҳақиқий солиҳлик ва муқаддасликдан иборат бўлган янги табиатга бурканинглар.

²⁵Энди ёлғон гапиришни бас қилиб, ҳар бирингиз ўз яқинингизга ҳақиқатни айтинглар, ахир, ҳаммамиз бир тананинг аъзоларимиз — ку.

²⁶Ҳатто ғазабланганингизда ҳам гуноҳ қилманглар[22]. Қуёш ботгунча жаҳлдан тушинглар.

²⁷Иблисга фурсат берманглар.

²⁸Олдин ўғри бўлган энди ўғрилик қилмасин, балки ишласин, ўз қўллари билан меҳнат қилсин. Шунда муҳтожларга ҳам топган — тутганидан ёрдам бера олади.

²⁹Оғзингиздан ҳеч қандай ярамас сўз чиқмасин. Лекин тингловчиларнинг эҳтиёжига кўра, керакли гапларни айтиб, уларга далда беринг, шунда сўзларингиз уларга фойда келтиради.

³⁰Худонинг Муқаддас Руҳини хафа қилманглар, чунки Муқаддас Руҳ сизларнинг Худога тегишли эканингизнинг ҳамда бир кун келиб[23], бутунлай озод бўлишингизнинг далилидир.

³¹Ҳар қандай гина — кудурат, қаҳру ғазаб, жанжалкашлик, ғийбатчиликни ҳамда бошқа ҳар хил ёмонликларни ўзингиздан соқит қилинглар.

³²Бир — бирингизга нисбатан кўнгилчан ва меҳр — шафқатли бўлинглар. Худо сизларни Масиҳ орқали кечиргандай, сизлар ҳам бир — бирингизни кечиринглар.