Read Муқаддас Китоб Uzbek Эфесликлар 5 Bible Online

Эфесликлар 5 - Муқаддас Китоб Uzbek bible

Эфесликлар 5

¹Худонинг севикли фарзандлари экансиз, энди Худодан ўрнак олинглар.

²Масиҳ бизни яхши кўриб, биз учун Ўзини фидо қилди ва шу йўсин Худога маъқул келадиган қурбонлик бўлди. Сизлар ҳам Исо Масиҳга ўхшаб, худди шундай меҳр — муҳаббат билан яшанглар.

³Сизларнинг орангизда фаҳш, зинокорлик, ифлослик ёки хасислигу очкўзлик ҳатто тилга ҳам олинмасин. Булар Худонинг азизларига муносиб эмас.

⁴Шунингдек, орангизда беадаблик, ножўя сўзлару қўпол ҳазиллар ҳам бўлмасин, чунки бундай қилиқлар сизларга тўғри келмайди. Яхшиси, Худога шукур қилинглар.

⁵Шуни билиб қўйингларки, ҳеч бир фаҳшбоз, ифлос ёки хасису очкўз инсон Масиҳнинг ва Худонинг Шоҳлигидан баҳраманд бўлмайди, чунки айтиб ўтилганларнинг ҳаммаси бутпарастлик билан тенгдир.

⁶Ўшандай гуноҳларни қилишга баҳона излаганлар сизларни қуруқ гаплар билан алдамасин, чунки Худонинг қаҳр — ғазаби Унга итоатсиз бандаларнинг бошига тушади.

⁷Шунинг учун уларга шерик бўлманглар.

⁸Бир вақтлар сизлар зулматга тўла эдингиз, энди эса Раббимиз Исога тегишли бўлганингиз учун нурга тўлдингиз. Шундай экан, нурга тўла инсонлар каби яшанглар.

⁹Ахир, ҳар қандай эзгулик, солиҳлик ва ҳақиқат нурнинг[24] самарасидир.

¹⁰Раббимизга нима мақбул эканлигини билишга тиришинглар.

¹¹Зулматнинг бесамара ишларида иштирок этманглар, аксинча, уларни фош этинглар.

¹²Махфий равишда қилинадиган ўша ишлар ҳақида гапириш ҳам уятдир.

¹³Аммо нур порлаганда ҳамма нарса фош бўлиб, очиқ — ошкор кўринади. Ахир, нур ҳамма нарсани очиқ — ойдин намоён қилади — ку!

¹⁴Мана шу сабабдан шундай деймиз: “Эй ухлаётган, тур! Ўликдан тирил! Масиҳ сенга нур сочар[25].”

¹⁵Шундай қилиб, қай тарзда яшаётганингизга диққат қилинглар. Нодонлар каби эмас, балки донолардай ҳаёт кечиринглар.

¹⁶Фурсатни ғанимат билинглар, чунки биз яшаётган бу кунлар ёмонликка тўла.

¹⁷Шунинг учун беақл бўлманглар, балки Раббимиз Исонинг иродаси нима эканлигини англашга ҳаракат қилинглар.

¹⁸Шароб ичиб маст бўлманглар, чунки бу бузуқликка олиб боради. Аксинча, Муқаддас Руҳга тўлиб — тошинглар.

¹⁹Бирга йиғилганингизда санолар, руҳий мадҳиялару қўшиқлар куйланглар. Мусиқа асбобларию хонишларингиз билан чин юракдан Раббимизга ҳамдлар айтинглар.

²⁰Ҳар доим, ҳар бир нарса учун Раббимиз Исо Масиҳ номи билан Отамиз Худога шукур қилинглар.

²¹Исо Масиҳни[26] иззат — ҳурмат қилганингиз учун бир — бирингизга бўйсунинглар.

²²Эй хотинлар, сиз Раббимиз Исога қандай бўйсунсангиз, эрларингизга ҳам шундай бўйсунинг.

²³Масиҳ имонлилар жамоатининг боши бўлгани каби, эр ҳам хотиннинг бошидир. Масиҳ Ўз танаси бўлган жамоатнинг Нажоткоридир.

²⁴Жамоат Масиҳга қандай тобе бўлса, хотинлар ҳам ҳар жиҳатдан ўз эрларига шундай тобе бўлишлари керак.

²⁵Эй эрлар, Масиҳ жамоатни яхши кўриб, Ўзини жамоат учун фидо қилганидай, сизлар ҳам хотинларингизни шундай яхши кўринглар.

²⁶Масиҳ жамоатни сув[27] ва Худонинг каломи орқали поклаб[28], муқаддас қилиш ниятида Ўзини фидо қилди.

²⁷Жамоатни Ўз ҳузурига келтирганда, жамоат ҳар қандай ғубор, ажин ва доғдан холи бўлиб, улуғвор, муқаддас ва бенуқсон бўлиши учун Масиҳ Ўз жонини аямади.

²⁸Эрлар ҳам ўз хотинларини ўз таналарини севгандай севишлари керак. Ўз хотинини севган эркак ўзини севган бўлади.

²⁹Ҳеч ким ҳеч қачон ўз танасини ёмон кўрмайди. Аксинча, уни озиқлантириб, парвариш қилади. Масиҳ ҳам Ўз жамоатини худди шундай озиқлантириб, парвариш қилади.

³⁰Биз Масиҳ танасининг аъзоларимиз[29].

³¹Муқаддас битикларда шундай ёзилган: “Шунинг учун эркак киши ота — онасидан бўлак бўлиб, хотинига боғланиб қолади, иккаласи бир тан бўладилар.”[30]

³²Бу буюк сирдир, энди бу сир Масиҳ ҳамда жамоатга ҳам тааллуқлидир.

³³Хулласи калом, ҳар бир эр ўз хотинини ўзини севгандай севсин. Хотин ҳам эрини ҳурмат қилсин.