Read Муқаддас Китоб Uzbek Колосаликлар 4 Bible Online

Колосаликлар 4 - Муқаддас Китоб Uzbek bible

Колосаликлар 4

¹Эй хўжайинлар, сизнинг ҳам самода Хўжайинингиз борлигини билиб, қулларингизга одил ва тўғри муомала қилинг.

²Доим ибодат қилинг. Ибодатда ҳушёр бўлиб, шукроналар келтиринг.

³Шунингдек, бизлар учун ҳам ибодат қилинглар: биз Худонинг каломини эълон қилишимиз ва Масиҳ сирини[21] баён этишимиз учун Унинг Ўзи бизга йўл очиб берсин. Мен ана шу сир туфайли қамоқдаман.

⁴Бу сирни муносиб равишда изҳор эта олишимни Худодан сўранглар.

⁵Фурсатни ғанимат билиб, имонлилар қаторига қўшилмаганларга нисбатан оқилона йўл тутинглар.

⁶Улар билан қандай гаплашишни сизларга ўргатай: улар билан гаплашганингизда сўзингиз ҳамиша ёқимли ва мазмунли бўлсин.

⁷Мен ҳақимдаги барча янгиликларни Раббимиз Исонинг содиқ хизматкори, ҳамкорим ва суюкли биродарим Тихикус сизларга айтиб беради.

⁸Сизларга далда бериб, ҳол — аҳволимизни сизларга билдирсин[22] деб, мен уни сизларнинг олдингизга жўнатяпман[23].

⁹Тихикус билан бирга олдингизга содиқ ва севимли биродаримиз, ҳамшаҳарингиз Ўнисимус[24] ҳам боради. Улар бу ерда бўлиб ўтган ҳамма нарсани сизларга айтиб беришади.

¹⁰Мен билан бирга қамалган[25] Аристархус[26] ва Барнабонинг жияни Марк[27] ҳам сизларга салом йўллаяптилар. Марк ҳақида йўл — йўриқ олгансизлар: агар олдингизга борса, уни яхши қабул қилинглар.

¹¹Ёшуа, яъни Юстус ҳам сизларга салом йўллаяпти. Худонинг Шоҳлиги йўлида меҳнат қилаётган булардан бошқа яҳудий[28] ҳамкорларим йўқ. Улар менга тасалли бўлиб келмоқдалар.

¹²Исо Масиҳнинг қули, ҳамшаҳарингиз Эпафрас[29] сизларга салом йўллаяпти. Худонинг иродасини тўлиқ бажарадиган, имони комил инсонлар бўлинглар деб, Эпафрас зўр ғайрат билан, тинмай сизлар учун ибодат қилмоқда.

¹³У сизлар учун ҳамда Лаодикия ва Ҳейраполис шаҳарларидаги[30] имонлилар учун не — не заҳматлар чекканига ўзим шоҳидман.

¹⁴Севимли табиб Луқо[31] ва Димас сизларга салом йўллашяпти.

¹⁵Лаодикия шаҳридаги биродарларга, айниқса, Нимфага ва унинг[32] уйида йиғиладиган жамоатга салом айтинглар.

¹⁶Сизларга ёзган бу мактубимни ўқиганингиздан кейин, уни Лаодикиядаги жамоат ҳам ўқисин. Сизлар эса Лаодикия жамоатига ёзган мактубимни[33] ўқинглар.

¹⁷Архиппусга: “Раббимиз Исо зиммангга юклаган хизматни охирига етказгин”, — деб айтиб қўйинглар.

¹⁸Мен, Павлус, мана шу мактубнинг якунини ўз қўлим билан ёзяпман[34]. Қамоқда эканлигимни эсдан чиқарманглар. Худонинг инояти сизларга ёр бўлсин[35].