Read Муқаддас Китоб Uzbek 1 Салоникаликлар 1 Bible Online

1 Салоникаликлар 1 - Муқаддас Китоб Uzbek bible

1 Салоникаликлар 1

¹Отамиз Худо ва Раббимиз Исо Масиҳнинг Салоника шаҳридаги имонлилар жамоатига Павлус, Силас[1] ва Тимўтийдан[2] салом! Худонинг[3] инояти ва тинчлиги сизларга ёр бўлсин.

²Биз доим сизлар учун ибодат қилиб, ҳаммангиз учун Худога шукурлар айтамиз.

³Имон ва севги билан қилган ишларингиз учун, Раббимиз Исо Масиҳга боғлаган собит умидингиз учун доимо Отамиз Худога миннатдорчилигимизни билдирамиз.

⁴Эй Худо севган биродарларимиз, Худо сизларни танлаб олганини биламиз.

⁵Ахир, биз Хушхабарни сизларга қуруқ сўзлар билан эмас, балки тўлиқ ишонч ва Муқаддас Руҳнинг қудрати билан келтирдик. Орангизда бўлганимизда, сизларнинг манфаатингизни кўзлаб, қандай яшаганимизни биласиз.

⁶Сизлар биздан ва Раббимиз Исодан ўрнак олдингиз. Ахир, кўп азоб — уқубат чекканингизга қарамай, Муқаддас Руҳ берадиган қувонч билан Худонинг сўзини қабул қилдингиз.

⁷Шундай қилиб, Македония ва Ахая вилоятларидаги[4] барча имонлиларга ўрнак бўлдингиз.

⁸Раббимизнинг каломи сизлардан фақатгина Македония ва Ахаяга ёйилиб қолмади, балки сизларнинг Худога бўлган имонингиз ҳамма жойда маълум бўлди. Шунинг учун энди бизнинг бирор нарса гапиришимизга ҳожат қолмади.

⁹Бизни яхши қабул қилганингиз ҳақида, барҳаёт ва ҳақиқий Худога хизмат қилайлик, дея бутлардан юз ўгириб, Худога юз бурганингиз ҳақида ҳамма гапиряпти.

¹⁰Худонинг Ўғли Исонинг самодан тушишини кутаётганингиз ҳақида ҳам гапиряптилар. Худо Ўз Ўғли Исони тирилтирган, Исо бизни келажакда Худонинг ғазабидан қутқаради.