Read Муқаддас Китоб Uzbek 1 Салоникаликлар 4 Bible Online

1 Салоникаликлар 4 - Муқаддас Китоб Uzbek bible

1 Салоникаликлар 4

¹Хуллас, эй биродарлар, сизлар Худони мамнун қилиб яшашни биздан ўргандингиз. Ҳа, шу тарзда яшаяпсиз ҳам. Аммо Раббимиз Исо номидан сизларга ёлворамиз, Худони янада кўпроқ мамнун қилишга астойдил ҳаракат қилаверинг.

²Раббимиз Исо бизга берган ваколат билан сизларга қандай йўл — йўриқ кўрсатганимизни биласиз.

³Сизларнинг муқаддас бўлишингиз Худонинг иродасидир. Шунинг учун жинсий ахлоқсизлик қилманг.

⁴Ҳар бирингиз муқаддаслик ва иззат — ҳурматга лойиқ тарзда ўзингизни тута билишингиз керак.

⁵Худони билмаган бутпарастлардай шаҳвоний ҳирсга қул бўлманг.

⁶Жинсий ҳаёт тарзига келганда, ўз биродарларингизнинг ишончини суиистеъмол қилманг, уларга хиёнат қилманг. Бундай қилганларни Эгамиз жазолайди. Биз сизларга бу ҳақда олдиндан айтиб, қаттиқ огоҳлантирганмиз.

⁷Худо бизни ҳаром йўлдан юришга эмас, балки муқаддас бўлиб яшашга чақирди.

⁸Шундай экан, ким мана шу таълимни рад этса, инсонларни эмас, сизларга Ўз Муқаддас Руҳини берадиган Худони рад қилган бўлади.

⁹Ўзаро муҳаббат ҳақида эса сизларга ёзишнинг ҳожати йўқ, чунки бир — бирингизни яхши кўришни сизлар Худодан ўргангансизлар.

¹⁰Зотан, сизлар Македония[10] ҳудуди бўйлаб яшовчи барча биродарларингизга ҳам шундай муносабатда бўляпсизлар. Лекин шунга қарамай, уларни янада кўпроқ яхши кўринг, деб ундаймиз.

¹¹Сизларга айтганимиздай, осойишта ҳаёт кечиришни, ўз ишингиз билан машғул бўлишни, қўлларингиз меҳнати билан тирикчилик қилишни ўз олдингизга мақсад қилиб қўйинг.

¹²Шунда Раббимиз Исога ишонмайдиганларнинг иззат — ҳурматини қозонасиз ва бошқаларнинг қўлига қараб қолмайсиз.

¹³Биродарлар, умидсиз яшаётган бошқа одамлар каби, қайғуга тўлманг деб, бу оламдан ўтганлар ҳақидаги ҳақиқатни сизларга билдиришни хоҳлаймиз.

¹⁴Биз Исонинг ўлиб, тирилганига ишонамиз. Шундай экан, Исога ишонган ҳолда ҳаётдан кўз юмган имонлиларни ҳам Худо тирилтириб, Ўз олдига олиб кетишига аминмиз. Бу воқеа Исо келганда юз беради.

¹⁵Раббимиз Исонинг таълимоти бўйича сизларга айтамизки, ўша пайтда биз — ҳали тирик бўлганлар ўлган биродарларимиздан олдин эмас, балки улар билан бирга Исони қаршилаб оламиз.

¹⁶Зотан, Раббимиз Исо Масиҳ буюк бир садо, бош фариштанинг овози ва Худонинг карнайи садоси остида самодан тушиб келганда, биринчи бўлиб Унга ишонган ҳолда ўлганлар тирилади.

¹⁷Сўнг биз — ҳали тирик бўлганлар ҳавода Раббимизни қаршилаб олиш учун улар билан бирга булутларда кўтариламиз. Шундай қилиб, ҳаммамиз Раббимиз билан абадий бирга бўламиз.

¹⁸Шунинг учун мана шу сўзлар билан бир — бирингизга далда беринг.