Read Муқаддас Китоб Uzbek 1 Юҳанно 5 Bible Online

1 Юҳанно 5 - Муқаддас Китоб Uzbek bible

1 Юҳанно 5

¹Исонинг Масиҳ[23] эканлигига ишонган ҳар бир киши Худонинг фарзандидир. Ким Отани яхши кўрса, Унинг фарзандларини ҳам яхши кўради.

²Биз биламизки, Худони севиб, Унинг амрларини бажарсак, Худонинг фарзандларини ҳам яхши кўрган бўламиз.

³Худони севиш Унинг амрларини бажариш демакдир. Худонинг амрлари эса қийин эмас,

⁴чунки Худонинг ҳар бир фарзанди дунёни енгишга қодир. Биз имонимиз орқали дунё устидан ғалаба қозонамиз.

⁵Ҳа, Исо Худонинг Ўғли эканлигига ишонган одамгина дунёни енга олади!

⁶Исо Масиҳ келганда сувга чўмдирилиб, биз учун Ўз қонини тўкди. У сувга чўмиш билан чекланибгина қолмай[24], Ўз қонини тўкди[25]. Муқаддас Руҳнинг Ўзи бу ҳақда гувоҳлик беряпти[26] ва Унинг гувоҳлиги ҳақиқатдир.

⁷Шундай қилиб, бунга учта гувоҳ бор:

⁸Руҳ, сув ва қон[27]. Улар бир хил гувоҳлик беришяпти.

⁹Биз инсонларнинг гувоҳлигини қабул қиламиз, Худонинг гувоҳлиги эса ундан қанчалар муҳимроқ. Худо ҳам Ўз Ўғли ҳақида гувоҳлик берди.

¹⁰Худонинг Ўғлига ишонган одам Худонинг гувоҳлигини чин дилдан қабул қилган бўлади. Худога ишонмаган одам эса Худони ёлғончига чиқаради, чунки у Худонинг Ўз Ўғли ҳақида берган гувоҳлигига ишонмайди.

¹¹Худонинг гувоҳлиги шундан иборат: Худо бизга абадий ҳаёт берди ва бу абадий ҳаётнинг манбаи Худонинг Ўғли Исодир.

¹²Ким Худонинг Ўғлига эга бўлса, ҳаётга эгадир. Худонинг Ўғлига эга бўлмаган одамда эса ҳаёт йўқ.

¹³Эй Худонинг Ўғлига ишонганлар, сизлар абадий ҳаётга эгасизлар. Шуни билиб олинглар деб, сизларга бу мактубни ёзяпман.

¹⁴Биз абадий ҳаётга эга бўлганимиз учун Худонинг ҳузурида дадил бўламиз, чунки Худонинг иродасига кўра, нимани сўрасак, У бизга қулоқ тутишини биламиз.

¹⁵Худо ибодатларимизга қулоқ тутар экан, демак, ибодатларимизга жавоб олганимизга тўлиқ ишонч ҳосил қиламиз.

¹⁶Агар бирор киши биродарининг гуноҳ қилаётганини кўрса — ю, бу гуноҳ абадий ўлимга[28] сабаб бўлмаса, у учун ибодат қилсин. Унинг ибодати туфайли Худо гуноҳ қилган одамга ҳаёт бағишлайди. Мен гуноҳи абадий ўлимга сабаб бўлмайдиган одамни назарда тутяпман. Абадий ўлимга сабаб бўладиган гуноҳ[29] ҳам бор. Бундай гуноҳга қўл урган одамлар учун ибодат қилинглар, деб айтмаяпман.

¹⁷Ҳар қандай ёмонлик гуноҳдир, аммо ҳамма гуноҳ ҳам абадий ўлимга сабаб бўлавермайди.

¹⁸Худонинг фарзанди бўлган одам гуноҳ қилмаслигини биламиз, чунки Худо[30] бундай одамни Ўз паноҳида асрайди[31]. Ёвуз шайтон унга бирор зарар етказа олмайди.

¹⁹Биз Худодан эканимизни, бутун дунё эса ёвуз шайтон чангалида эканини биламиз.

²⁰Яна шуни биламизки, Худонинг Ўғли келиб, ҳақ Худони таниб — билишимиз учун бизга ақл — идрок берди. Биз Исо Масиҳ билан бирга яшар эканмиз, ҳақ Худо билан ҳам бирга яшаймиз. Исо Масиҳ ҳақ Худодир ва абадий ҳаёт манбаидир.

²¹Азиз болаларим[32], ўзларингизни бутлардан[33] сақланглар[34].