Read Муқаддас Китоб Uzbek Рут 3 Bible Online

Рут 3 - Муқаддас Китоб Uzbek bible

Рут 3

¹Орадан маълум вақт ўтгач, Рутга қайнанаси Наима шундай деди: — Қизим, бирортаси билан рўзғор қилсанг, ўзингга яхши бўлармиди. Мен сенга қайлиқ топиб беришим лозим.

²Ўша Бўаз бизнинг қариндошимиз, сен унинг чўрилари билан бирга бўлган эдинг — ку. Биласанми, бугун кечқурун[18] у хирмонда арпасини совуради.

³Энди сен ювиниб — тараниб, чиройли кийимларингни кий, кейин хирмонга бор. Лекин Бўаз еб — ичиб бўлмагунча, унга кўринма.

⁴У ухлашга ётганда, ётган жойини билиб олгин — да, сўнг бориб оёқ томонини очиб, ўша ерда ёт[19]. Нима қилишни унинг ўзи айтади.

⁵Рут қайнанасига: — Ҳаммасини айтганингиздай қиламан, — деди.

⁶Рут хирмонга жўнади. Етиб келиб, қайнанаси айтгандай қилди.

⁷Бўаз еб — ичди, вақти чоғ бўлди. Сўнг ғарам ёнига бориб ёнбошлади — да, ухлаб қолди. Рут оҳиста келиб, унинг оёқ томонини очиб, ётди.

⁸Ярим кечаси Бўаз чўчиб уйғониб кетди. Қараса, оёқ томонида бир аёл ётибди.

⁹— Кимсан? — деб сўради аёлдан. Рут унга: — Сизнинг чўрингиз Рутман. Чўрингизни паноҳингизга олсангиз[20], ахир, сиз бизнинг оиламизни паноҳингизга олишга бурчли одамсиз[21], — деди.

¹⁰Бўаз Рутга деди: — Сени Худо ёрлақасин, қизим. Оилангга сенинг бу сафарги қилган садоқатинг олдингисидан ҳам аълодир. Сен камбағал ёки бойвачча йигитларнинг ортидан чопмадинг.

¹¹Энди хавотирланма, қизим. Айтганларингнинг ҳаммасини муҳайё қиламан. Бутун шаҳар халқи сенинг олижаноб аёл эканлигингни билади.

¹²Тўғри, мен сизларнинг оилангизни паноҳимга олишга бурчли одамман, лекин бу ишга мендан ҳам яқинроғи бор.

¹³Шу кеча ўтсин, ётавер. Агар эртага у киши сенга нисбатан ўз бурчини ўтамоқчи бўлса, майли, сени олаверсин. Борди — ю, ўз бурчини ўташни хоҳламаса, мен ўз зиммамга оламан. Худо ҳақи, мен ўз зиммамга оламан. Эрталабгача ухлайвер.

¹⁴Лекин тонг пайтида туриб кет, хирмонга келганингни одамлар билмай қўя қолишсин. Рут Бўазнинг оёқ томонида саҳаргача ухлади. Кўз кўрмайдиган, ғира — шира тонг пайтида Рут ўрнидан турди.

¹⁵Бўаз Рутга: — Шолрўмолингни очиб, ушлаб тур, — деди. Рут шолрўмолини очиб ушлаб турди. Бўаз эса олти тоғора[22] арпа ўлчаб, шолрўмолга солди ва орқасига кўтартириб қўйди. Кейин ўзи шаҳарга жўнаб кетди.

¹⁶Рут эса қайнанаси олдига қайтди. Қайнанаси ундан: — Нима бўлди, қизим? — деб сўради. Бўаз Рутга қандай муносабатда бўлган бўлса, Рут ҳаммасини қайнанасига айтиб берди.

¹⁷— У, қайнанангнинг олдига қуруқ қўл билан борма, деб мана бу олти тоғора арпани ҳам бериб юборди, — деди Рут.

¹⁸Қайнанаси Рутга деди: — Қизим, бу ишлар нима билан тугайди, ҳали билмайсан. Кутиб тургин — чи, у бу ишни бугуноқ охирига етказмай қўймаса керак.