Read Муқаддас Китоб Uzbek Рут 4 Bible Online

Рут 4 - Муқаддас Китоб Uzbek bible

Рут 4

¹Бўаз шаҳар дарвозаси олдига чиқиб ўтирди[23]. Ўша пайт Бўаз айтган яқин қариндоши[24] ёнгинасидан ўтиб қолди. Бўаз унинг исмини айтиб чақириб: — Бу ёққа келинг, ўтиринг, биродарим, — деди. Қариндоши яқин келиб ўтирди.

²Бўаз шаҳар оқсоқолларидан ўн кишини гувоҳликка чақириб: — Шу ерда ўтиринглар! — деди. Улар келиб ўтиришди.

³Бўаз қариндошига деди: — Мўаб юртидан қайтиб келган Наима бор — ку, у Элималек акамизнинг даласини сотмоқчи.

⁴Мен шу ерда ўтирганлар ва қавмим оқсоқоллари ҳузурида ўша далани сотиб оласизми, йўқми, билай дедим. Агар сиз қариндошлик бурчингизни ўташни хоҳласангиз, майли, сотиб олаверинг. Борди — ю, хоҳламасангиз, айтинг, мен билайин. Чунки бу бурчни ўташ биринчи навбатда сизга тушади. Сиздан кейин навбат меники бўлади. У киши: — Қариндошлик бурчимни мен ўтайман, — деди.

⁵Бўаз деди: — Хўп. Лекин сиз Наиманинг даласини харид қилганингизда, дала билан бирга марҳум Махлўннинг[25] беваси Мўаблик Рутни ҳам олишингиз керак. Чунки марҳумнинг номи ўз мулкидан йўқолиб кетмаслиги шарт.

⁶Шунда қариндоши Бўазга: — Ундай бўлса, мен уни ололмайман, акс ҳолда, ўзимнинг мулкимни хавф остига қўйган бўламан[26]. Зиммамдаги қариндошлик бурчимни сиз ўтайверинг, менинг иложим йўқ, — деди.

⁷Илгари Исроилда қариндошлик бурчини ўтамоқчи ёки мол — мулкини алмаштирмоқчи бўлсалар, далил — исбот тариқасида биттаси чориғини ечиб, иккинчисига берарди. Мана шу одат Исроилда қонуний гувоҳлик ўрнини босарди.

⁸Шундай қилиб, қариндоши Бўазга: — Ўзингиз сотиб олаверинг, — деди — да, чориғини ечиб берди.

⁹Шундан кейин Бўаз оқсоқолларга ва ўша ердаги бошқа одамларга мурожаат қилди: — Сизлар гувоҳсиз: мен бугун Элималекдан Хилён ва Махлўнга қолган ҳамма мулкни Наимадан сотиб оляпман.

¹⁰Яна Махлўннинг хотини Мўаблик Рутни ҳам ўз никоҳимга оляпман, токи марҳумнинг номи ўз мулкида қолсин, биродарлари орасида ва киндик қони тўкилган юртида номи йўқолиб кетмасин. Бугун сизлар бунга гувоҳ бўлиб турибсизлар.

¹¹Шунда шаҳар дарвозаси ёнида турган одамлар ва оқсоқоллар: — Биз гувоҳмиз, — дедилар. — Эгамиз сенинг хонадонингга келадиган аёлни Роҳила ва Леахдай қилсин, ана ўша бибилардан Исроил халқи бино бўлган. Эфратда бойликлар эгаси бўлгин, Байтлаҳмда номинг улуғ бўлгай.

¹²Сенинг хонадонинг Яҳудога Тамара туғиб берган ўғли бобомиз Параз[27] хонадонидай баракали бўлсин. Эгамиз мана шу жувон орқали сенга ўшандай буюк насл ато этсин.

¹³Шундай қилиб, Бўаз Рутга уйланди. Улар турмуш қуриб, бир ёстиққа бош қўйишди. Эгамизнинг марҳамати билан Рут ҳомиладор бўлиб, ўғил туғди.

¹⁴Аёллар Наимага айтишди: — Эгамизга ҳамду санолар бўлсин! У бугун сенга ғамхўрлик қиладиган невара[28] берди, меросхўрсиз қолдирмади. Меросхўрингнинг номи Исроилда улуғ бўлсин.

¹⁵У туфайли ҳаётинг яна шодликка тўлади, қариганингда суянчиғинг бўлади. Чунки бу ўғилни сени яхши кўрадиган, сен учун ҳатто етти ўғилдан ҳам аъло бўлган келининг туғди.

¹⁶Наима чақалоқни ўзига олди, бир дам бағридан узмади. Ўзи энагалик қилди.

¹⁷Қўшни аёллар: “Наима учун ўғил туғилди”, деб чақалоққа Обид[29] исмини бердилар. Обид Довуднинг падари бузруквори Эссайнинг отаси бўлди.

¹⁸Параздан Довудгача бўлган авлод — аждод қуйидагича: Параздан Хазрон бунёд бўлди.

¹⁹Хазрондан Рам бунёд бўлди. Рамдан Оминадав бунёд бўлди.

²⁰Оминадавдан Нахшўн бунёд бўлди. Нахшўндан Салмўн бунёд бўлди.

²¹Салмўндан Бўаз бунёд бўлди. Бўаздан Обид бунёд бўлди.

²²Обиддан Эссай бунёд бўлди. Эссайдан Довуд бунёд бўлди.