Read Муқаддас Китоб Uzbek 1 Шоҳлар 20 Bible Online

1 Шоҳлар 20 - Муқаддас Китоб Uzbek bible

1 Шоҳлар 20

¹Довуд Рамадаги Нойўт маҳалласидан қочиб, Йўнатаннинг олдига келди. — Мен нима қилибман? Айбим нима? Отангга қарши нима гуноҳ иш қилибманки, мени ўлдирмоқчи бўлади? — деди Довуд унга.

²— Худо сақласин, ўлмайсан! — деди Йўнатан. — Отам мени хабардор қилмай, хоҳ муҳим бўлсин, хоҳ муҳим бўлмасин, бирор иш қилмайди. Нимага энди буни мендан яширсин?! Ҳеч нарса бўлмайди.

³Довуд яна онт ичиб деди: — Сен мени яхши кўрасан, буни отанг ҳам яхши билади. Йўнатан нима қилишимни билмай қўя қолсин, акс ҳолда, азоб чекади, деб ўйлайди. Худо шоҳид! Тўғрисини айтсам, жар ёқасида турибман.

⁴— Тила тилагингни, сен учун бажо келтираман, — деди Йўнатан.

⁵— Қара, эртага янги ой шодиёнаси бўлади, — деди Довуд. — Шоҳ билан бирга дастурхонда ўтиришим керак[92]. Лекин менга ижозат бер, индин кечгача далада яшириниб юрай.

⁶Агар отанг йўқлигимни сезиб қолса, унга шундай дейсан: “Довуд шошилинч ўз шаҳри Байтлаҳмга кетадиган бўлиб қолди, мендан қаттиқ туриб илтимос қилди. У ерда бутун уруғ — аймоғи йиллик қурбонлик маросими ўтказар экан.”

⁷Отанг “яхши” деса, демак, бу қулингга хавф — хатар йўқ. Агар ғазабланса, билгинки, менга зарар етказишга қатъий қарор қилган.

⁸Эгамиз олдида аҳд қилгансан — ку! Энди менга содиқ қол. Агар айбдор бўлсам, мени ўзинг ўлдир! Мени отангнинг ҳузурига олиб боришингга на ҳожат?!

⁹— Худо сақласин! — деди Йўнатан, — отам сенга ёмонлик қилмоқчи бўлганини билганимда, сенга айтмасмидим?!

¹⁰— Отанг сенга дағал жавоб берса, ким менга билдиради? — деб сўради Довуд.

¹¹— Юр, далага чиқайлик, — деди Йўнатан. Икковлари далага кетишди.

¹²Йўнатан гапида давом этиб, Довудга деди: — Исроил халқининг Худоси — Эгамиз шоҳид бўлсин! Эрта ё индинга худди шу вақтгача отамнинг ниятини ўсмоқчилаб билиб оламан. Отам сенга мойиллик билдирса, албатта хабар юбораман.

¹³Борди — ю, отам сени ўлдирмоқни ният қилган бўлса — ю, сени хабардор қилмасам, бехатар кетишингни таъминламасам, Эгам мени ёмон кўйга солсин, ҳатто ундан ҳам баттарроғини қилсин! Эгам, илгари отам билан бўлганидай, доимо сен билан бўлсин.

¹⁴Агар мен тирик бўлсам, Эгамизга ўхшаб ваъдангда тур, менга содиқ бўл. Агар ўлсам,

¹⁵Эгамиз душманларингни йўқ қилганда, менинг хонадонимдан садоқатингни дариғ тутмагин.

¹⁶Йўнатан Довуд хонадони билан аҳд тузди ва: — Эгамиз ҳамма душманларингни қириб ташласин, — деди.

¹⁷Йўнатан Довудни жонидан ҳам ортиқ яхши кўрарди. У: “Менга бўлган дўстона севгингни тасдиқлагин”, деб Довудга яна бир бор онт ичирди.

¹⁸— Эртага янги ой шодиёнаси бўлади, — деди Йўнатан Довудга. — Ўрнинг бўш қолади, йўқлигинг билинади.

¹⁹Индинга дарҳол пастга туш, олдинги сафар яширинган жойингга бориб яширин. Эзел деган тошнинг ёнида кутиб тур.

²⁰Мен мўлжаллаб ўша тош томонга учта ўқ отаман.

²¹Кейин хизматкоримни: “Бор, ўқларни топиб кел”, деб жўнатаман. Агар унга: “Қара, ўқлар орқангда, уларни олиб бу ёққа қайт”, деб айтсам, сен уйингга қайтиб боргин. Демак, ҳеч қандай хавф — хатар йўқ. Худо шоҳид, сен тинч — омон бўласан.

²²Агар хизматкоримга: “Қара, ўқлар олдингда”, десам, сен кетгин. Демак, Эгамиз кетишингни хоҳлаган бўлади.

²³Бир — биримизга қилган аҳдимизга Эгамиз абадий шоҳид бўлсин.

²⁴Шундай қилиб, Довуд далада яшириниб олди. Янги ой чиққани муносабати билан байрам бошланганда, шоҳ Шоул келиб, байрам дастурхонига ўтирди.

²⁵У одатдагидай, девор ёнидаги ўриндиқдан жой олди. Йўнатан Шоулнинг рўпарасидан[93], Абнур эса унинг ёнидан ўз жойларини эгаллашди. Довуднинг ўрни бўш қолди.

²⁶Аммо Шоул ўша куни ҳеч нарса демади. Бирор тасодиф бўлса керак, Довуд ҳаром бўлган — у, ювинмагандир[94], деб ўйлади.

²⁷Эртасига, янги ой шодиёнасининг иккинчи куни Довуднинг жойи яна бўш қолди. Шоул ўғли Йўнатандан сўради: — Эссайнинг ўғли нимага кеча ҳам, бугун ҳам таомга келмади?

²⁸— Довуд Байтлаҳмга кетмоқчи экан, мендан қаттиқ илтимос қилди, — деб жавоб берди у.

²⁹— “Илтимос, ижозат берсанг, оиламиз ўша шаҳарда қурбонлик қилади. Акам, ўша ерда бўл, деб буюрди. Менга илтифот кўрсатсанг, бориб, акаларимни кўриб келсам”, деди. Шу важдан шоҳнинг дастурхонига кела олмади.

³⁰Шоул ғазабланиб, Йўнатанга бақирди: — Сен, ярамас, суюқоёқ хотиннинг боласи, у билан дўстлашганингни билмасмидим?! Бу қилиғинг билан ўзингни ҳам, сени туққан онангни ҳам иснодга қолдирдинг — ку.

³¹Эссайнинг ўғли ер юзида яшар экан, на ўзинг, на шоҳлигинг сақланиб қолади. Энди бирорта одамни жўнатиб, уни менинг олдимга чақиртириб кел. Уни ўлим кутяпти.

³²— Нега у ўлдирилар экан? У нима қилди? — деди Йўнатан отасига.

³³Шоул Йўнатанни ўлдирмоққа шайланиб, найзасини унга қаратиб отди. Йўнатан тушундики, отаси Довудни ўлдирмоққа қатъий қарор қилган экан.

³⁴Йўнатан дарғазаб бўлиб дастурхондан турди, янги ой шодиёнасининг иккинчи куни ҳеч нарса емади. Отаси Довудни бу қадар ҳақорат қилганига хафа бўлди.

³⁵Эрталаб Йўнатан Довуд билан кўришмоқ учун далага кетди. Ёнига бир кичкина болани олди.

³⁶Йўнатан болага: — Югур, мен отган ўқларни қидир! — деди. Бола югуриб кетди. Йўнатан боланинг олд томонига бир ўқ отди.

³⁷Йўнатаннинг ўқи тушган ерга бола етиб борган ҳам эдики, у: — Ўқ олдингда!

³⁸Тез бўл, югур, тўхтаб турма! — деб овоз берди. Бола ўқни олиб, хўжайинига келтириб берди.

³⁹Бола бундан бехабар, бу гапнинг маъноси Йўнатан билан Довудга аён эди, холос.

⁴⁰Йўнатан қурол — аслаҳаларини ўша болага бериб: — Кўтар буларни, шаҳарга олиб бор, — деди.

⁴¹Бола кетиши биланоқ, Довуд тош орқасидан чиқиб келди ва юзи билан ерга мук тушиб, уч марта таъзим қилди. Иккала дўст бир — бирларини қучоқлаб, ўпиб, йиғлашди. Довуд Йўнатанга қараганда қаттиқроқ йиғлади.

⁴²Ниҳоят Йўнатан: — Энди эсон — омон йўлингга кет, — деди. — Икковимиз: “Худо сену менинг орамизда, уруғларимиз орасида абадий шоҳид бўлсин”, деб Унинг номини ўртага қўйиб онт ичганмиз.

⁴³Шундан кейин Довуд ўз йўлига кетди. Йўнатан эса шаҳарга қайтди.