Read Ўзбек тилидаги Муқаддас Китоб (ЎЗМК), 2013 Забур 108 Bible Online

Забур 108 - Ўзбек тилидаги Муқаддас Китоб (ЎЗМК), 2013 bible

Забур 108

¹Ижрочилар раҳбарига. Довуд саноси. [1] Сени олқишлайман, эй Худо, Сукут сақламагин.

²Фосиқ, ёлғончилар менга қарши оғиз очган, Ёлғончи тиллар билан менга қарши гапирар.

³Нафратга тўла сўзларни устимга ёғдирарлар, Сабабсиз менга ҳужум қиларлар.

⁴Менга айб қўярлар дўстлигимга жавобан, Ибодат қиламан ҳамон.

⁵Яхшилик эвазига менга ёмонлик қайтарарлар, Дўстлигим эвазига менга адоват қиларлар.

⁶Фосиқни уларга қарши қўй, Уларнинг ўнг томонида айбловчи турсин.

⁷Синалганда, улар айбдор бўлсин, Уларнинг ибодати гуноҳ деб ҳисоблансин.

⁸Уларнинг умри қисқа бўлсин, Йўлбошчилигини бошқаси олсин.

⁹Етим бўлиб қолсин болалари, Бева бўлиб қолсин хотинлари.

¹⁰Болалари кулбасидан айрилиб, дарбадар бўлсин, Нон излаб тиланчи бўлсин.

¹¹Мол–ҳолини судхўрлар эгалласин, Меҳнат самарасини бегоналар тортиб олсин.

¹²Бирон кимса уларга шафқат қилмасин, Уларнинг етим болаларига ҳеч ким ачинмасин.

¹³Уларнинг насл–насаби қирилиб кетсин, Бир наслдан сўнг номлари йўқ бўлсин.

¹⁴Эй Эгамиз! Оталари айбини эсга олгин, Оналарининг гуноҳини ҳеч қачон унутмагин.

¹⁵Эй Эгамиз, уларнинг гуноҳидан доим хабардор бўлгин, Ўша инсонларнинг хотирасини ер юзидан ўчиргин.

¹⁶Ахир, улар ҳеч қачон шафқат қилишни ўйламади. Муҳтожларни, умидсизликка тушганларни, Камбағалларни таъқиб қилди, ўлдирди.

¹⁷Улар лаънатлашни яхши кўрарди, Энди лаънати ўзларининг бошига келсин. Дуо қилишни ёқтирмасди, Энди дуо улардан узоқ бўлсин [1].

¹⁸Лаънатни улар кийимдай киярди, Уларнинг танасига лаънат сув каби кирарди, Суякларига мой каби сингарди.

¹⁹Ҳа, кийим кийгандай, улар лаънатга ўраниб олсин, Лаънатни ҳар куни белга тақадиган камардай қилиб олсин.

²⁰Эй Эгам! Менга қарши ёмон гапирувчиларга, Мени айбловчиларга Сендан ана шулар мукофот бўлсин.

²¹Сен, эй Эгам Раббий, Ўз номинг ҳақи менга мадад бер, Эзгудир содиқ севгинг, мени қутқар.

²²Мен бир бечора, йўқсилман, Ичимда юрагим яралангандир.

²³Оқшомги соядай йўқ бўлиб боряпман, Чигирткадай мен улоқтирилганман.

²⁴Рўза тутганимдан тиззаларимда дармон йўқ, Этим суягимга ёпишиб қолган.

²⁵Душманларим ҳақоратининг нишониман, Мени кўрганларида масхаралаб, бошларини чайқашар.

²⁶Эй Эгам Худо, менга мадад бергин, Содиқ севгинг ҳақи мени халос қилгин.

²⁷Буни Сенинг қўлинг қилганини душманларим билсин, Эй Эгам, менга нажот берган Сен эканингни улар билсин.

²⁸Майли, улар мени лаънатласин, Сен эса менга барака берасан. Улар ҳужум қилганда, шарманда бўлишсин, Мен, Сенинг қулинг эса шод–хуррам бўлай.

²⁹Мени айбловчилар бадномликка буркансин, Чопон кийгандай, шармандаликка ўрансин.

³⁰Эгамга чексиз шукроналар айтаман, Халойиқ орасида Унга ҳамду сано ўқийман.

³¹Эгамиз турар йўқсулларнинг ўнг томонида, Уларни ўлимга маҳкум этганлардан қутқармоқ учун.